Vbe uki e September, ma gha hia vbe odẹ ke odẹ ne ima gi emwa hia ni rre dọmwadẹ owa vbe ẹdogbo ne ima na kporhu rẹn wẹẹ, ma gha hoo ne ima gha loo ebe ẹmu na tie ẹre Sọyẹnmwẹ Arrọọ Vbe Etẹbitẹ! ya gu iran ruẹ e Baibol. Etẹn gha vbe sẹtin ya ughaẹdẹ 30 ru iwinna arọndẹ ọghe ọyọmwabọ vbe uki na. De vbene ima khian ya ru emwamwa ikporhu ne kpataki na hẹ?

• U Gha Khian Kporhu Ma Ọmwa Vbe Ẹghẹ Okaro: Loo emwi na gbẹn ye iyeke ebe ẹmu na, ya kporhu ma emwa vbe odẹ nọ gha yẹẹ iran, u ghi vbe hia ne u ma iran vbene ima ya loo ebe ẹmu na, ya gu emwa ruẹ e Baibol hẹ. Ghẹ mianmian emwa ne u ka kporhu ma kevbe iran ni mwẹ ẹkorhiẹnrhiẹnmwẹ ye ẹmwẹ nọ rre Baibol. Ọ gha khọnrẹn wẹẹ iran ma kue ne u gu iran gha ruẹ e Baibol vbe ẹghẹ nọ gberra, ebe ọgbọn na kevbe odẹ ne ima ya loo ẹre ya gu emwa ruẹ emwi sẹtin gha yẹẹ iran. Ọ ma khẹke na rhie ebe ẹmu na yotọ khẹ emwa nẹi rre owa, ọ ma vbe khẹke ne ima rhie ebe na ba elẹta, na sẹnd ẹre gie ọmwa vbe ẹi re wẹẹ te ọmwa nii ka mwẹ ẹkorhiẹnrhiẹnmwẹ ye ẹmwẹ nọ rre Baibol. Vbe uki e September, Agbaziro Ọghe Iko sẹtin ru emwamwa iko ọvbehe na khian gha do a ke ladian vbe ikporhu, bae na ka ru.

• Avbe Ẹkpotọ Ọvbehe Ne U Gha Sẹtin Loo: Deghẹ a loo uhanhan na waa ebe yi ya kporhu vbe iko ne u ye, uwa sẹtin viọ ebe ẹmu na tie ẹre Sọyẹnmwẹ Arrọọ Vbe Etẹbitẹ! yọ. Deghẹ u na miẹn ọmwa nọ mwẹ ẹkorhiẹnrhiẹnmwẹ, u ghi vbe tama rẹn wẹẹ, te ima loo ebe na ya gu emwa ruẹ e Baibol vbe ọghe ọhẹ. Vbobọvbobọ nii, u ghi ma re vbene ima ya loo ebe ẹmu na ya gu emwa ruẹ emwi hẹ, ra uwa ghi mwamwa ẹghẹ ọvbehe ne u khian ya ma re. Ọdiọn nọ siẹnro iwinna ikporhu sẹtin gie etẹn eso ni kakabọ gua kporhu, gha rrie ako ne a na do ẹki vbe ẹdogbo ne uwa na kporhu, ne iran ya gualọ emwa ni gha hoo ne iran ruẹ e Baibol. U sẹtin vbe nọ emwa ne uwa gba winna, ra emwa ọvbehe ne u miẹn, deghẹ iran gha hoo ne iran gha ruẹ e Baibol.

Jesu wẹẹ ne ima gha ‘ya emwa khian erhuanegbe ọghe irẹn’ kevbe ne ima gha ‘maa iran emwi.’ (Mat 28:​19, 20) Ma yayi wẹẹ emwamwa ikporhu ne kpataki na, gha ru iyobọ ne ima ya ru emwi ne Jesu tama ima ne ima gha ru, zẹvbe ne ima ya loo ebe na tie ẹre Sọyẹnmwẹ Arrọọ Vbe Etẹbitẹ!