Ẹi re iwinna nekherhe ẹre etẹn ru, vbe iran ghaa ru emwamwa ọghe igiemwi ọghe vbene a ya kporhu hẹ. Avbe igiemwi na, wa vbe ru iyobọ ne etẹn nibun ya kporhu ma emwa ni rre ẹdogbo ọghe iran, vbe odẹ nọ gha mu iran ekhọe. Vbọrhirhighayehẹ, ugbẹnvbe a miẹn wẹẹ, odẹ na ya ru emwi vbe ẹvbo ọkpa sẹtin lughaẹn ne ọghe ẹvbo ọvbehe, etẹn ghaa kporhu, iran sẹtin loo odẹ ọvbehe ra uhunmwuta ọvbehe ne iran rẹnrẹn wẹẹ ọ gha mu ekhọe emwa ni rre ẹdogbo ne iran na kporhu. Sokpan deghẹ a na gha ru emwamwa ikporhu ne kpataki, ọ ye khẹke ne etẹn lele adia na rhirhi rhie ne iran. Emwi ne ima hoo ne ima ru, ọre ne ima kporhu iyẹn nọ maan ọghe Arriọba Osanobua, zẹvbe ne Jesu tama ima.​—Mat 24:14.

Deghẹ a na wẹẹ ne etẹn ru orhiema ọghe vbene a ya kporhu hẹ, iran ghi ziro yan emwi na guan kaẹn vbe igiemwi ọghe vbene a ya kporhu hẹ nọ ladian vbe Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima. Vbọrhirhighayehẹ, vbe ẹi re te a rhie adia ọvbehe ne iran, iran sẹtin loo inọta ọvbehe, ako ọghe evbagbẹn nọhuanrẹn ọvbehe, inọta ọvbehe na ya gbe ẹyotọ atuẹ werriegbe ra obẹlẹ ọvbehe, nọ gha mu emwa ekhọe vbe ẹdogbo ọghe iran. Ọna rhie ma wẹẹ, ẹi re adia nọ ladian vbe ipapa 8 ọghe ebe iwinna ọghe June 2020 ẹre ima khian ghi gha lele.