Deghẹ ima na gha ru emwamwa yotọ, ne ima mieke na sẹtin rhiegbe ye iwinna ugamwẹ e Jehova sayọ, ọ rhie ma wẹẹ ima loo ẹrhiọn ọghe ima vbe odẹ nọ khẹke. (1 Kọr 9:26) Ovbi ẹghẹ kherhe ẹre ọ ghi kẹ ne agbọn na sẹ ufomwẹ, rhunmwuda ọni, odẹ nọ ghi maan sẹ ne ima gha ya sẹtin loo ẹghẹ ọghe ima, ọre ne ima gha mwẹ emwamwa ọghe emwi ne ima gha hoo ne ima ru vbe ugamwẹ e Jehova. (Ẹfis 5:​15, 16) Uwa ghaa ru iruẹmwi ẹgbẹe, uwa sẹtin vbe guan kaẹn emwi eso ne uwa gha sẹtin ru, vbe ukpo ugamwẹ ọgbọn na khian la na, ọni ọre ke September 2022 ya sẹ August 2023. Uhunmwuta eso rre ebe iwinna na, nọ guan kaẹn emwi eso nọ ma lọghọ gbe ne u gha sẹtin ru vbe ugamwẹ e Jehova. U sẹtin muẹn roro deghẹ eso rrọọ ne u gha sẹtin ru, u vbe na erhunmwu vbekpa re.​—Jems 1:5.

Vbe igiemwi, emwa hia vbe uwu ẹgbẹe gha sẹtin ku obọ kugbe, ne iran mieke na sẹtin ru iyobọ ne orhunmwu ọkpa vbe uwu ẹgbẹe ya suẹn gha ga zẹvbe arọndẹ ọghe ẹghẹ hia ra? Deghẹ u na gha roro ẹre wẹẹ, u i khian sẹtin miẹn inu ughaẹdẹ na gualọ vbe obọ avbe arọndẹ, u sẹtin gu arọndẹ eso guan, ne u rẹnrẹn wẹẹ ọ gha sẹtin ru iyobọ nuẹn. (Itan 15:22) Uwa sẹtin vbe nọ arọndẹ ọkpa ọta eso, vbe uwu ẹghẹ ne uwa ya ru iruẹmwi ẹgbẹe. U sẹtin vbe gbẹnnẹ ọnrẹn ladian, ẹghẹ ne u mwamwa yọ wẹẹ u khian ya yo ikporhu. Deghẹ u ka ru iwinna arọndẹ vbe ẹghẹ nọ gberra, hia ne u ghee ẹre deghẹ ẹkpotọ gha kie nuẹn nia, ne u ya werriegbe suẹn.

Ọmwa rhọkpa vbe ẹgbẹe ruẹ gha sẹtin ru iwinna arọndẹ ọghe ọyọmwabọ vbe uki ọkpa ra uki eso ra? Deghẹ orhiọn i mobọ rrọọ ruẹ iwu, rhunmwuda vbene egbe ruẹ ye hẹ, u gha ye sẹtin ru iwinna arọndẹ ọghe ọyọmwabọ deghẹ u na gha ya ovbi ẹghẹ kherhe kporhu vbe ẹdẹgbegbe. Deghẹ u i mobọ miẹn ẹghẹ ya kporhu vbe uwu uzọla, rhunmwuda iwinna ne u ru ra rhunmwuda ne u na yo owebe, u gha sẹtin ru iwinna arọndẹ ọghe ọyọmwabọ vbe ẹghẹ ne uwa ya rre irhiẹdẹ ra vbe uki nọ mwẹ Satọde kevbe Sọnde isẹn. Uwa gbẹnnẹ dọmwadẹ uki ne uwa hoo ne uwa ya ru iwinna arọndẹ ọghe ọyọmwabọ ye calendar ọghe uwa, uwa ghi vbe gbẹnnẹ dọmwadẹ ẹdẹ kevbe ẹghẹ ne uwa khian ya gha ladian vbe ikporhu yọ.​—Itan 21:5.

GHEE VIDIO NỌ MWẸ UHUNMWUTA NỌ KHARE WẸẸ, GHA MWẸ UDINMWẸ ZẸVBE . . . ARỌNDẸ, IYEKE ỌNI, A GHI ZẸ EWANNIẸN YE AVBE INỌTA NA:

• De emwi ne okha ọghe Ọtẹn Nokhuo Aamand maa ima re, vbekpa odẹ ne Jehova ya gbaroghe emwa ni sẹ emwi eso rae, ne iran mieke na sẹtin ru iwinna arọndẹ?