EVBỌZẸE NỌ NA RU EKPATAKI: Adeghẹ ima na gha ruẹ Evbagbẹn Nọhuanrẹn ne egbe ima, ma ghi do rẹn “uvbẹmwẹ, utanmwẹ, uyomwẹ kevbe udinmwimwẹ” ọghe ẹmwata nọ rre uwu Ẹmwẹ ọghe Osanobua. (Ẹfis 3:18) Ọ gha vbe ru iyobọ ne ima ya gha re emwa nẹi mwẹ abe vbe agbọn dan ne ima ye na, ẹghẹ nii, ma ghi sẹtin ‘da ẹmwẹ ọghe Osanobua yi ẹse.’ (Fil 2:15, 16) Emadogua ughughan rrọọ ne ima gha sẹtin loo vbe ima ghaa ruẹ ne egbe ima. Ma sẹtin loo ne ima rẹnrẹn wẹẹ ọ dekaan emwi ne ima la gberra. De emwi ne ima gha sẹtin ru, ne ima mieke na miẹn ere vbe Baibol ne ima tie kevbe ne ima ruẹ ne egbe ima?

VBENE A YA RU ẸRE HẸ:

• Adeghẹ u na gha tie Baibol, u sẹtin ya ẹmu ughughan sẹ ama ye uviẹn eso vbọ, u sẹtin vbe gbẹnnẹ emwi eso ne u ma hoo ne u mianmian yotọ

• Zẹvbe ne u ya tie Baibol, u sẹtin nọ egbuẹ wẹẹ: ‘De ọmwa na guan kaẹn mwa? De emwi na guan kaẹn? De ẹghẹ nọ ya sunu? De ehe nọ na sunu? Vbọzẹe? De vbene ọ ya sunu hẹ?’

• Gualọ otọre. U sẹtin loo emadogua ne ima mwẹ ya ru ezanzan yan uhunmwuta ra ako ọghe evbagbẹn nọhuanrẹn ne u hoo ne u rẹn otọre

• Gha ru erria yan emwi ne u tie, ne u mieke na rẹn vbene ọ ya dekaan ruẹ hẹ

• Gha rhie emwi ne u ruẹ ye uyinmwẹ.—Luk 6:47, 48

VBE A GHA GHI GHEE ẸRE FO NẸ IGHẸ E VIDIO NỌ MWẸ UHUNMWUTA NỌ KHARE WẸẸ GHA RUẸ E BAIBOL NE EGBUẸ VBE ODẸ NỌ GHA BIẸ ỌMỌ ESI NE U MIEKE NA SẸTIN ‘DA ẸMWẸ ỌGHE OSANOBUA YI ẸSE,’ A GHI ZẸ EWANNIẸN YE AVBE INỌTA NA:

• De vbene emwa eso ya gie Baibol na ruẹ ne egbe ọmwa?

• Vbọzẹe nọ na khẹke ne ima gha na erhunmwu, ẹghẹ ke ẹghẹ ne ima khian ya suẹn gha ruẹ e Baibol?

• Adeghẹ ima hoo ne ima rẹn otọ ako Evbagbẹn Nọhuanrẹn ne ima tiere sayọ, vbọ khẹke ne ima ru?

• De ama eso ne ima gha sẹtin vinnọ ye Baibol ọghe ima vbe ima ghaa tie ẹre?

• Vbọzẹe nọ na khẹke ne ima gha ru erria yan emwi ne ima tie vbe Evbagbẹn Nọhuanrẹn?

• De vbene ima khian ya loo emwi ne ima ruẹre hẹ?