Ke January 2018 gha dee, ẹre igiemwi ọghe vbene a ya kporhu hẹ ke ladian vbe Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima Ne Ivbiotu e Kristi. De vbene ọ khẹke ne ima ya gha loo ẹre hẹ?

A Gha Rhie Abọ Ọghe Owebe Nuẹn: Te ọ khẹke ne u loo inọta, evbagbẹn nọhuanrẹn kevbe inọta na ya gbe ẹyotọ atuẹ werriegbe nọ rre igiemwi ọghe vbene a ya kporhu hẹ. Sokpan ọna ma rhiema wẹẹ emwi na wa ta vbe vidio ọghe igiemwi ọghe vbene a ya kporhu hẹ, ẹre uwẹ khian wa vbe ta zẹẹ. U sẹtin mwamwaẹn vbene u gualọe yi, u vbe ya ẹmwẹ obọ ruẹ mu ẹmwẹ so, u sẹtin vbe gie vbene u khian ya gu ọ yan owa ziro lughaẹn ne nọ rre vidio nii. U sẹtin vbe rhie ọkpa vbe usun ebe ni rre Emadogua Ne A Ya Maa Emwa Emwi ne ọ yan owa, ọ gha khọnrẹn wẹẹ, a ma wa wẹẹ ne u ru vberriọ.

Vbe U Ghaa Rre Ikporhu: Te a ru emwamwa ọghe igiemwi ọghe vbene a ya kporhu hẹ, nọ mieke na gha ru iyobọ ne ima vbe ima ghaa rre ikporhu. Adeghẹ u miẹn ọmwa nọ mwẹ ẹkorhiẹnrhiẹnmwẹ kevbe nọ hoo nọ ruẹ sayọ, u sẹtin loo igiemwi ọghe atuẹ werriegbe ya gu ẹre ziro. U sẹtin vbe ru afiwerriẹ eso ye igiemwi na ra u ghi loo emwi ọvbehe ya gu ẹre ziro. A sẹtin miẹn wẹẹ, inọta nọ ladian vbe uki eso nọ gberra ra ako ọghe evbagbẹn nọhuanrẹn ọvbehe fẹẹrẹ ẹre ọ khian mu ekhọe emwa ni rre ẹdogbo ne u na kporhu. A sẹtin vbe miẹn wẹẹ emwa ni rre ẹdogbo ne u na kporhu wa mobọ guan kaẹn iyẹn nọ khian vbe obọ ra emwi nọ da sunu vbe ẹdogbo nii. Ọna rhiema wẹẹ, u gha sẹtin loo igiemwi ọghe vbene a ya kporhu hẹ vbe odẹ ughughan, sokpan emwi nọ ru ekpataki ọre ne ima ‘rhunmwuda iyẹn nọ maan gha ru emwi hia, na miẹn ehe na ghae re sẹ emwa ọvbehe obọ.’—1 Kọr 9:22, 23.