RHIEGBE YE IWINNA IKPORHU IYẸN NỌ MAAN | EMWI NỌ GHA YA RUẸ GHA SỌYẸNMWẸ IWINNA IKPORHU SAYỌ
Ru Iyobọ Ne Emwa Ne U Ya E Baibol Maa Re Emwi Ne Iran Khian Ọsie Jehova
E Jehova hoo ne ahoẹmwọmwa ne emwa nagbọn mwẹ ne irẹn gu iran kpa ya gha ga irẹn. (Mat 22:37, 38) Ahoẹmwọmwa ne emwa ne u ya e Baibol maa re emwi mwẹ ne Jehova, ẹre ọ khian gu iran kpa ya ru afiwerriẹ nọ khẹke vbe arrọọ ọghe iran, ọ ghi vbe ru iyobọ ne iran ya mudia gbain vbe iran ghaa werriẹ aro daa edanmwẹ. (1 Jọn 5:3) Ahoẹmwọmwa ne iran mwẹ ne Jehova ẹre ọ khian ya iran dinmwiamẹ.
Ru iyobọ nọ khẹke ne iran, ne iran mieke na bẹghe ẹre wẹẹ, e Jehova gele hoẹmwẹ iran. U sẹtin nọ iran wẹẹ: “De emwi ne ọna maa ruẹ re vbekpa e Jehova?” ra “De vbene ọna ya rhie ẹre ma wẹẹ, e Jehova hoẹmwẹ ruẹ?” Ru iyobọ ne emwa ne u ya e Baibol maa re emwi, ne iran bẹghe odẹ ughughan ne Jehova ya ru iyobọ ne iran. (2 Krọ 16:9) Sunu ye odẹ eso ne Jehova he ya họn erhunmwu ruẹ, u ghi vbe tama iran ne iran gha gbarokotọ, ne iran mieke na vbe miẹn odẹ ughughan ne Jehova he ya họn erhunmwu ọghe iran. Ọyẹnmwẹ nọ khian gha sẹ ima i gia gie, vbe ima gha bẹghe ẹre wẹẹ, emwa ne ima ya e Baibol maa re emwi ya ekhọe hia yayi wẹẹ e Jehova gele hoẹmwẹ iran kevbe deghẹ iran na vbe gha rhie ẹre ma wẹẹ iran hoẹmwẹ ọnrẹn.
GHEE VIDIO NỌ MWẸ UHUNMWUTA NỌ KHARE WẸẸ, RU IYOBỌ NE EMWA NE U YA E BAIBOL MAA RE EMWI NE IRAN KHIAN ỌSIE JEHOVA, IYEKE ỌNI, A GHI ZẸ EWANNIẸN YE AVBE INỌTA NA:
-
De ọlọghọmwa ne Jade werriẹ aro daa?
-
De iyobọ ne Neeta ghi ru nẹẹn?
-
De vbene Jade ghi ya la ọlọghọmwa nii gberra hẹ?
