Te odẹ ne amẹ, erhẹn, ogbigbi ẹhoho kevbe emwi nibun ọvbehe vberriọ ya mu emwi rhia ghi wa muan yọ. Emwi vbenian gha sunu, te ọ khẹke na mwamwa emwi hia ẹse, na mieke na sẹtin ru iyobọ ne emwa vbe odẹ nọ khẹke. Ọna ẹre ọ si ẹre ne Ẹbu Nọ Su na ghi wẹẹ ne dọmwadẹ abotu gha mwẹ ugha iwinna na tie ẹre Disaster Relief Department.

Etẹn ni rre ugha iwinna na gha họn wẹẹ odekun ẹrhia sunu, iran ghi hia ne iran gu ediọn ni rre eke nọ na sunu guan, ne iran mieke na rẹn iyobọ ne etẹn ni rre evba gualọ. Deghẹ odekun ẹrhia nii da otọ sẹrriọ wẹẹ, te etẹn ni rre evba ghi gualọ iyobọ vbe obọ emwa ọvbehe, abotu ghi zẹ etẹn eso, ne iran siẹnro emwamwa na khian ya ru iyobọ ne iran. Avbe etẹn na sẹtin wẹẹ iran hoo ne etẹn eso ke ihe ọvbehe rre do ru iyobọ, iran sẹtin sunu ye emwi eso ne iran gualọ, iran sẹtin vbe dẹlẹ emwi eso, iran ghi vbe ghae ẹre ne etẹn ni rre eke ne odekun ẹrhia na sunu.

Deghẹ a na ru emwamwa vbenian, ere nibun wa lae rre. Ọ ya etẹn rẹn iwinna nọ gele khẹke na ru, emwi hia ghi gha khian hẹnnẹhẹnnẹ, a ghi vbe sẹtin loo igho kevbe emwi ughughan ni rre otọ vbene ọ khẹke. Ọ gha lọghọ a ke sẹtin ru ena hia, deghẹ etẹn eso na tobọ iran ya gha ru iyobọ ne etẹn ni rre eke ne odekun ẹrhia na sunu.

Etẹn ne abotu wẹẹ nọ siẹnro iwinna na, ẹre ọ khian ta inu igho kevbe inu etẹn na gualọ, na mieke na sẹtin ru iyobọ ne emwa ni gualọ iyobọ. Iran sẹtin gu avbe ukọ arriọba ni rre ẹvbo nii guan, rhunmwuda avbe ukọ arriọba na gha sẹtin ru iyobọ ne ima, ne iwinna ne ima ru mieke na kẹ. Rhunmwuda ọni, ọ ma khẹke ne ọmwa rhọkpa tobọre si igho koko na khian ya ru iyobọ ne avbe etẹn na, ọ ma vbe khẹke ne ọmwa rhọkpa viọ emwi gie iran ra nọ mu otuẹ gha rrie eke ne iran ye, vbe ẹi re te a tama rẹn nọ ru vberriọ.

Ọrheyerriọ, emwi nọ wegbe gha sunu daa etẹn, ma wa hoo ne ima ru iyobọ ne iran. (Hib 13:16) Ma hoẹmwẹ etẹn ima ẹsẹse! De emwi ne ima khian ghi ru? Emwi nọ ghi ru ekpataki sẹ ne ima gha sẹtin ru ọre ne ima na erhunmwu ne etẹn ne odekun ẹrhia sunu daa, kevbe etẹn ni ru iyobọ ne iran. Ma sẹtin vbe ru iyobọ igho ye iwinna nọ khian vbe uhunmwu otagbọn hia. Ẹbu Nọ Su keghi ru iyobọ ne abotu ya rẹn odẹ nọ ghi maan sẹ na khian ya loo igho ne emwa ya ru izọhẹ. Deghẹ ima hoo ne ima tobọ ima ya ru iyobọ ne avbe etẹn na, ma sẹtin fill e fọm na tie ẹre Local Design/Construction Volunteer Application (DC-50), ẹghẹ nii, abotu ghi rẹn wẹẹ ima mu egbe ne ima ya ru iyobọ.

GHEE VIDIO NỌ MWẸ UHUNMWUTA NỌ KHARE WẸẸ, VBENE AMẸ YA MU EMWI RHIA VBE BRAZIL, IYEKE ỌNI, A GHI ZẸ EWANNIẸN YE INỌTA NA:

De emwi nọ yẹẹ ruẹ vbe odẹ ne Avbe Osẹe Jehova ya ru iyobọ ne emwa, vbe amẹ mu emwi rhia vbe Brazil vbe ukpo 2020?