Zẹ vbene ọdan ya sikan emwi kugbe, erriọ ahoẹmwọmwa vbe ya ku ẹgbẹe kugbe. Deghẹ ahoẹmwọmwa i rre uwu ẹgbẹe, ọ gha lọghọ iran ke sẹtin gha mwẹ akugbe, iran i vbe sẹtin gha si irri ọkpa. De vbene avbe ọdọ, amwẹ kevbe evbibiẹ emọ khian ya gha rhie ahoẹmwọmwa ma vbe uwu ẹgbẹe?

Okpia nọ hoẹmwẹ ọvbokhan rẹn keghi mu ọghe ọvbokhan rẹn roro, erriọ vbe ya rhie ehọ nẹẹn ta yi. (Ẹfis 5:28, 29) Ọ keghi kpemehe ne ẹgbẹe ọre vbe odẹ ọghe ikpakpa kevbe odẹ ọghe orhiọn, vbe igiemwi, ẹi ya Iruẹmwi Ẹgbẹe ku, ọ keghi hia ne iran gha ru ẹre vbe ẹghẹ hia. (1 Tim 5:8) Okhuo nọ hoẹmwẹ ọdafẹn ọnrẹn keghi gbe uhunmwu kotọ nẹẹn, erriọ vbe ya rhie “ọghọ” nẹẹn ẹsẹsẹmwẹse. (Ẹfis 5:22, 33; 1 Pit 3:1-6) Ọ khẹke ne ọdọ vbe amwẹ gha ya ekhọe hia yabọ egbe. (Ẹfis 4:32) Evbibiẹ emọ ni họemwẹ ivbi iran keghi hia ne iran rẹn vbene emwi ye iran hẹ, erriọ iran vbe ya maa iran emwi ne iran mieke na hoẹmwẹ e Jehova. (Diut 6:6, 7; Ẹfis 6:4) De isievẹn ne ivbi iran werriẹ aro daa vbe owebe? Iran sẹtin mudia gbain vbe ihua iran ghaa zẹ iran kpokpo ra? Deghẹ emwa vbe uwu ẹgbẹe na kakabọ hoẹmwẹ egbe, egbe ghi rọkhọ iran.

GHEE VIDIO NỌ MWẸ UHUNMWUTA NỌ KHARE WẸẸ, YE GHA RHIE AHOẸMWỌMWA MA VBUWE ẸGBẸE, IYEKE ỌNI, A GHI ZẸ EWANNIẸN YE AVBE INỌTA NA:

• De vbene okpia nọ hoẹmwẹ ọvbokhan rẹn ya gbaroghe ẹre, kevbe wẹẹ, de vbene ọ ya rhie ẹre ma wẹẹ irẹn ya aro nọ ghaan ghee ẹre?

• De vbene okhuo nọ hoẹmwẹ ọdafẹn ọnrẹn ya rhie ẹre ma wẹẹ irẹn rhie ọghọ nẹẹn ẹsẹsẹmwẹse?

• De vbene evbibiẹ emọ ni hoẹmwẹ ivbi iran ya kọ Ẹmwẹ Osanobua ye iran ekhọe?