Te Jesu wa gha loo emwi ughughan ni ghaa sunu vbe ẹghẹ nii ya kporhu ma emwa. (Luk 13:1-5) U gha vbe sẹtin ya unu kaẹn emwi eso ni sunu, vbe u ghaa kporhu ma emwa ne iran mieke na gha hoo ne iran rẹn vbekpa Arriọba Osanobua. U sẹtin ya unu kaẹn odẹ ne emwi hia ghi ya khian aghanghan, odekun ẹrhia nọ sunu, odẹ ne emwa ya gbe olighi vbe ẹvbo, vbene emwa ghi ya loo ikpẹ ukhunmwu ni wegbe ra emwi ọvbehe vberriọ. Iyeke ọni, u ghi ya ẹwaẹn nọ rẹn ọta ọkpa nọ gha yae mu ẹmwẹ ne u ta roro. U sẹtin nọ wẹẹ: “Uwẹ yayi wẹẹ . . . . gha fo vbe ẹdẹ ọkpa ra?” ra “De emwi ne u yayi wẹẹ ọ gha sẹtin sọfurre ye . . . ?” U ghi do tie ako ọghe Baibol ọkpa nọ gha rhie ewanniẹn ye inọta nii. Deghẹ ọmwa nii na gha hoo nọ rẹn sayọ, u ghi ma re ebe ra e vidio ọkpa nọ rre Emadogua Ne A Ya Maa Emwa Emwi. Zẹ vbene ima ya hia ne ẹmwẹ ne ima ta gha mu emwa ekhọe, gi ima gha ru emwi hia ne ima gha sẹtin ru, rhunmwuda “iyẹn nọ maan.”​—1 Kọr 9:22, 23.

De emwi eso ne u gha sẹtin guan kaẹn, nọ gha yẹẹ emwa ni rre ẹdogbo ne u na kporhu?