Vbọ re Baibol na rrẹkọdi? Ọna ọre rrẹkọdi ọghe New World Translation na dọlọ gbẹn. Kherhe kherhe ẹre a ya rhie ẹre ladian vbe urhuẹvbo ughughan na na sẹtin ru ẹre. Emwi ọkpa ne Baibol na rrẹkọdi na ya maan ọre wẹẹ, emwa ughughan ẹre a loo ro ya rrẹkọd edọmwadẹ emwa na guan kaẹn vbe uwu e Baibol. A ghaa rrẹkọd e Baibol na, a ghi tie ẹre ladian vbene ọ khẹke nọ gha ye, a vbe tie ẹre vbe odẹ nọ gha ya ima rẹn vbene emwi gele gha ye hẹ ne emwa ne Baibol guan kaẹn vbe ẹghẹ nii.

De ere ne emwa eso he miẹn, ke ne iran ya suẹn gha danmwehọ e Baibol na rrẹkọdi na? Emwa nibun ni danmwehọ e Baibol na rrẹkọdi na vbe ẹghẹ hia khare wẹẹ, ọ keghi ru iyobọ ne iran ya rẹn wẹẹ, ẹi wa re okha kẹkan ẹre ọ rre uwu e Baibol, sokpan emwi ni gele sunu ẹre Baibol guan kaẹn. Rhunmwuda na na miẹn wẹẹ, emwa ughughan ẹre a loo ya rrẹkọd edọmwadẹ emwa na guan kaẹn vbe uwu e Baibol, ọna keghi ru iyobọ ne iran ya muẹn roro ẹsẹsẹmwẹse, avbe okha ughughan ni rre uwu e Baibol, ọ ghi vbe ya iran rẹn otọ re sayọ. (Itan 4:5) Emwa nibun vbe kha wẹẹ, e Baibol na rrẹkọdi na wa mu iran orhiọn sotọ vbe iran ghaa si osi.—Psm 94:19.

Ere nọkhua ma wa miẹn vbe ima ghaa danmwehọ zẹvbe na ya tie Ẹmwẹ Osanobua ladian. (2 Krọ 34:19-21) Adeghẹ e Baibol na rrẹkọdi na rrọọ vbe urhuẹvbo ne u họn, ra abọ eso vbọ ẹre a he ru ladian, u ghi hia ne u gha danmwehọ re vbe ẹghẹ hia.

GHEE VIDIO NỌ MWẸ UHUNMWUTA NỌ KHARE WẸẸ, VBENE A YA RU E BAIBOL NA RRẸKỌDI LADIAN HẸ—ABỌ NE KUẸI VBỌ, IYEKE ỌNI, A GHI ZẸ EWANNIẸN YE AVBE INỌTA NA:

De emwi nọ yẹẹ ruẹ sẹ vbe odẹ na ya ru e Baibol na rrẹkọdi ladian?