Iko ọghe emwamwa ikporhu keghi rre usun emwi ne Jehova kpemehe ẹre nọ gha ru iyobọ ne ima ya gha rhie ahoẹmwọmwa ma kevbe ne ima ya gha ru emwi esi ne egbe. (Hib 10:​24, 25) Odẹ ifuanro isẹn ya sẹ ihinrọn ẹre ọ khẹke ne iko na ya vbe otọ, vbe uwu ẹghẹ na, a ghi ghae etẹn, a ghi rhie ako ne iran khian na kporhu ne iran, a ghi vbe na erhunmwu. (Deghẹ a ka do iko ọvbehe nẹ, a ke do iko ọghe emwamwa ikporhu, ọ ma kue khẹke ne ẹghẹ na khian loo tan sẹ vberriọ.) Ọ khẹke ne ọtẹn nọ khian siẹnro iko ọghe emwamwa ikporhu guan kaẹn emwi nọ gha wa ru iyobọ ne etẹn vbe ẹdẹrriọ. Vbe igiemwi, ọ ghaa re ẹdẹ Satọde, rhunmwuda ne a na miẹn wẹẹ, etẹn nibun ma he ladian vbe ikporhu ke ufomwẹ uzọla nọ gberra gha dee, ọ sẹtin guan kaẹn emwi ne iran gha sẹtin ta vbe ikporhu. De emwi ọvbehe na gha vbe sẹtin guan kaẹn vbe iko ọghe emwamwa ikporhu?

• Igiemwi ọghe vbene a ya kporhu hẹ nọ ladian vbe Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima Ne Ivbiotu E Kristi

• Vbene a gha ya sẹtin loo emwi nọ sunu ra iyẹn nọ khian vbe obọ ya suẹn gha gu ọmwa ziro

• Vbene a gha ya sẹtin kporhu deghẹ ọ yan owa ma hoo nọ danmwehọ

• Vbene a gha ya sẹtin kporhu ma ọmwa nọ ma yayi wẹẹ Osanobua rrọọ, ọmwa nọ yayi wẹẹ te emwi hia didaghori rre, ọmwa nọ zẹ urhuẹvbo ọvbehe, ra ọmwa nọ rre ugamwẹ nai kẹ miẹn vbe ẹdogbo ne uwa na kporhu

• Vbene a gha ya sẹtin loo ọkpa vbe usun emwi ni rre jw.org, JW Library^® app, ra e Baibol ya kporhu

• Vbene a gha ya sẹtin loo ọkpa vbe usun Emadogua Ne A Ya Maa Emwa Emwi

• Vbene a gha ya sẹtin loo obẹlẹ ughughan ya kporhu, vbe na ghee etẹlifoni, elẹta, ikporhu ọghe adesẹ orere, atuẹ werriegbe, ra e Baibol na gu ọmwa ruẹ

• Avbe ayere ni dekaẹn vbene a khian ya gha begbe hẹ vbe a ghaa rre ikporhu, vbene a gha ya sẹtin fi ẹmwẹ na khian ta werriẹ nọ mieke na guaero ighẹ emwi ne ọ yan owa la gberra, odẹ nọ khẹke na ya gha yin, vbene a khian ya gha sọyẹnmwẹ iwinna ikporhu hẹ, ra ayere ọvbehe ni ye vbenian

• Iruẹmwi ọkpa ra e vidio ọkpa nọ rre ebe ẹmu na tie ẹre Gha Mwẹ Alaghodaro Vbe Odẹ Ne U Ya Tie Ebe Kevbe Odẹ Ne U Ya Maa Emwa Emwi

• Vbene a khian ya ru iyobọ ne ọmwa ne ima gba winna vbe ikporhu

• Ako evbagbẹn nọhuanrẹn nọ dekaẹn ikporhu ra emwi ẹwaẹn nọ dekaẹn iwinna ikporhu nọ rhie igiọdu ne ọmwa