E Jehova i khian zin egbe ne agbọn na wa gha ye vbenian khian. A gha wabọ ugamwẹ ohoghe rua, okulugbe ọghe agbẹnvbo gha suẹn gha gu emwa ọghe Osanobua khọn, e Jehova gha vbe guọghọ emwa dan rua vbe okuo ọghe Amagẹdọn. Ma ne Ivbiotu e Kristi wa ya aro ye ẹghẹ ne ena hia khian ya sunu.

Vbene ẹmwata, ẹi re emwi hia ẹre ima rẹnrẹn vbekpa orueghe nọkhua. Vbe igiemwi, ma ma rẹn ẹghẹ nọ khian wa ya suẹn zẹẹ. Ma ma rẹn emwi ne avbe arriọba khian kha wẹẹ, ẹre ọ si ẹre ne iran na hoo ne iran wabọ ugamwẹ rua. Ma ma rẹn emwi ne avbe agbẹnvbo khian ru daa emwa ọghe Osanobua vbe ẹghẹ ne iran khian ya gha gu iran khọn, ma ma vbe rẹn vbene ọ khian kpẹẹ sẹ hẹ vbe otọ. Deba ọni, ma ma rẹn emwi ne Jehova khian loo ya guọghọ emwa dan rua vbe Amagẹdọn.

Sokpan, e Baibol tama ima emwi hia nọ khẹke ne ima rẹn, ne ima mieke na gha mwẹ udinmwẹ vbe ẹghẹ ne ena hia khian ya sunu. Vbe igiemwi, ma rẹnrẹn wẹẹ, ẹghẹ ufomwẹ ọghe “ẹdẹ okiekie” ẹre ima ye na. (2 Tim 3:1) Ma rẹnrẹn wẹẹ, te Osanobua khian fian ẹghẹ ne avbe arriọba khian ya werriẹ aro nọ khọọ daa ugamwẹ kanmwa, na ghẹ mieke na wabọ ugamwẹ ẹmwata rua. (Mat 24:22) Ma rẹnrẹn wẹẹ, e Jehova gha miẹn emwa rẹn fan. (2 Pit 2:9) Ma vbe rẹn wẹẹ, Ọmwa nọ gbae kevbe nọ mwẹ ẹtin ẹre Jehova zẹ nọ guọghọ emwa dan rua vbe Amagẹdọn, ọ ghi vbe miẹn emwa esi fan.​—Arhie 19:11, 15, 16.

Emwi nọ khian sunu vbe odaro gha wa ya “ohan” mu emwa. Sokpan, deghẹ ima na gha tie vbekpa vbene Jehova he ya miẹn emwa rẹn fan vbe ẹghẹ nọ gberra, kevbe emwi nọ he ma ima re vbekpa emwi nọ khian sunu vbe odaro, ma na vbe gha mu ena hia roro, ma ghi sẹtin “kpaegbe mudia,” ma ghi vbe “tọn uhunmwu mu,” rhunmwuda ne ima rẹn wẹẹ ẹghẹ imiẹnfan ọghe ima sẹ otọ fo nẹ.​—Luk 21:26, 28.