Vbe ẹghẹ uyunmwu vbe ukpo 2024, emwa ni rrie uye isẹn (5 billion) gha do ghee emwa ni ke otọ ẹvbo 206 rre, ni khian do ku iku isasegbe ọghe Olympics. Thomas Bach nọ re president ọghe International Olympic Committee khare wẹẹ, “Te ima mwẹ obọ vbe emwamwa nọ ya emwa ughughan ni rre uhunmwu otagbọn na mwẹ akugbe kevbe ọfunmwegbe. Te emwamwa ọghe Olympics ya ima rẹn wẹẹ, agharhemiẹn wẹẹ ima ne emwa nagbọn lughaẹn ne egbe, ma gha ye sẹtin gha rrọọ vbe uwu ọfunmwegbe kevbe akugbe; egbe iziro vbenian ẹre ọ khẹke ne ima hia gha mwẹ.”

 Olympics gha gele sẹtin ya emwa gha mwẹ akugbe ra? Emwa gha gele sẹtin gha mwẹ ọfunmwegbe kevbe akugbe ra?

 Ẹ i re ẹmwẹ iku isasegbe ọkpa, ẹre Olympics ọghe ukpo na ya emwa gha mu roro. Rhunmwuda, avbe iku isasegbe na, wa kakabọ niania ẹmwẹ otu azẹ kevbe emwi ughughan ni si ighaegbe. Usun avbe emwi na ọre, asẹ ne emwa mwẹ (human rights), ne emwa na roro wẹẹ ugamwẹ ne iran ye, ra ẹvbo ne iran ke rre ẹre ọ maan sẹ, kevbe wẹẹ, iran ẹre ọ maan sẹ emwa ọvbehe.

 Iku isasegbe ne emwa na ke ẹvbo ughughan rre, vbe na ghee Olympics keghi ya emwa sọyẹnmwẹ egbe. Vbọrhirhighayehẹ, ne avbe emwamwa iku isasegbe na gha te ya ya emwa gha mwẹ ọfunmwegbe kevbe akugbe; te avbe emwamwa na rhie ẹre ma wẹẹ, odẹ ne emwa ya yin, kevbe odẹ ne iran ya roro emwi wa si ighaegbe ye uwu ẹkpo iran, erriọ avbe emwamwa na vbe ya ya emwi vbenian tua sayọ.

 E Baibol guan kaẹn uyinmwẹ eso ne emwa khian gha mwẹ nọ gha yae gha lọghọ ne iran gha mwẹ akugbe. (2 Timoti 3:1-5) U gha hoo ne rẹn vbekpae ẹmwẹ akhasẹ na sayọ, ya tie uhunmwuta nọ khare wẹẹ, “Did the Bible Predict the Way People Think and Act Today?”

 E Baibol gi ima rẹn emwi nọ gha ya emwa gha mwẹ ọfunmwegbe kevbe akugbe vbe uhunmwu otagbọn hia. Ọ khare wẹẹ, “Arriọba Osanobua” nọ re arriọba nọ rre ẹrinmwi gha ya emwa hia ni rre uhunmwu otagbọn na gha mwẹ akugbe.—Luk 4:43; Matiu 6:10.

 Jesu Kristi nọ re Ọba ọghe Arriọba na gha ya ọfunmwegbe gha rre otagbọn hia. E Baibol khare wẹẹ:

•   ‘Te emwa esi khian gha muan yọ, te ọfunmwegbe khian vbe gha rre ehe hia.’—Psalm 72:7.

•   “Irẹn miẹn avbe ivbiogue, ni kpe tie ẹre fan . . . Ọ miẹn iran fan hin obọ a zẹ ọmwa kpokpo kevbe ọkpankpan.”—Psalm 72:12, 14.

 Vbe ẹdẹnẹrẹ, imamwaemwi ọghe Jesu wa ru iyobọ ne ẹbo emwa ni ke otọ ẹvbo 239 rre ya gha mwẹ kugbe. Zẹvbe Ivbi Otu e Kristi, Avbe Osẹe Jehova ni rre ehe hia vbe uhunmwu otagbọn na keghi hia ne iran gha re emwa ọfunmwegbe. U ghaa hoo ne u rẹn sayọ, ya tie ebe Owa Ọkhẹ nọ mwẹ uhunmwuta nọ khare wẹẹ, “Breaking the Cycle of Hatred.”