E Russia Mu Okuo Lae Ukraine
Vbe owiẹ vbe February 24, 2022, ivbiyokuo ọghe Russia keghi mu okuo lae Ukraine, agharhemiẹn wẹẹ emwa ni rre ukpo arriọba vbe otọ ẹvbo nibun te hia, ne emwi vbenian ghẹ sunu. De ọlọghọmwa ne okuo na gha sẹtin si ye uhunmwu otagbọn na? Vbe ikpẹdẹ eso nọ gberra, e secretary-general ọghe United Nations, na tie ẹre António Guterres keghi kha wẹẹ: “Usẹ ne okuo na khian si ye emwa egbe i gia gie, ọ gha rhia emwi nibun rua, ọ ghi vbe mu arrọọ ọghe emwa nibun ni rre Europe kevbe uhunmwu otagbọn hia ye ikpadede.”
De emwi ne Baibol tae vbekpa egbe emwi nọ wa sunu na?
Jesu tae yotọ wẹẹ, ẹghẹ dee ne ‘agbẹnvbo ọkpa gha ya gu agbẹnvbo ọvbehe khọn, arriọba ọkpa ghi vbe gha gu arriọba ọvbehe khọn.’ (Matiu 24:7) Ya tie uhunmwuta na tie ẹre “What Is the Sign of ‘the Last Days,’ or ‘End Times’?” U gha tie uhunmwuta na, u gha miẹn emwi ne Baibol tae nọ ya ima rẹn wẹẹ, odẹ ne emwa ya khọn okuo vbe ẹdẹnẹrẹ rhie ẹre ma wẹẹ, ẹmwẹ akhasẹ ne Jesu tae yotọ gele sunu.
Ebe Arhie Maan keghi gie okuo zẹvbe ọmwa nọ hin ẹsin nọ baa khian, ọ na vbe rhie ọfunmwegbe hin uhunmwu otagbọn na rre. (Arhie Maan 6:4) Ya tie uhunmwuta na tie ẹre “The Four Horsemen—Who Are They?” Ọna gha ya ruẹ rẹn vbene ẹmwẹ akhasẹ na ya dekaẹn okuo ne emwa khọn vbe ẹdẹnẹrẹ.
Ebe Daniẹl tae yotọ wẹẹ, te “ọba ọghe okuọ” kevbe “ọba ọghe ahọ” khian gha gu egbe suan. (Daniẹl 11:25-45) Ya ghee vidio na tie ẹre, Ẹmwẹ Akhasẹ Nọ Mwẹ Amusẹ Nẹ—Ebe Daniẹl Uhunmwu Ẹnrẹn 11. E vidio na gha ya ruẹ rẹn emwi nọ si ẹre ne a na kha wẹẹ, e Russia kevbe avbe agbẹnvbo ni yẹrike ọre ọba ọghe okuọ. a
Ebe Arhie Maan vbe guan kaẹn “okuo ọghe ẹdẹ nọkhua ọghe Osanobua ne Oghodua.” (Arhie Maan 16:14, 16) Okuo na i khian gha yevbe okuo ne avbe agbẹnvbo khọn vbe ẹdẹnẹrẹ. Deghẹ u hoo ne u rẹn emwi nibun ọvbehe vbekpa okuo na, ya tie uhunmwuta na tie ẹre, “What Is the Battle of Armageddon?”
Vbọzẹ ne u gha na sẹtin gha mwẹ ilẹkẹtin wẹẹ emwi hia gha dunna vbe odaro?
E Baibol khare wẹẹ, Osanobua gha “dobọ okuo yi vbe uhunmwu otagbọn hia.” (Psalm 46:9) Ya tie uhunmwuta na tie ẹre, “A Real Hope for a Better Tomorrow” ne u mieke na rẹn emwi nibun ne Osanobua tae yotọ wẹẹ, ọ gha sunu vbe odaro.
Jesu tama erhuanegbe ẹre ne iran gha na erhunmwu ne Arriọba Osanobua rre. (Matiu 6:9, 10) Ọna keghi re arriọba ne Osanobua mu gbọọ vbe ẹrinmwi. Arriọba na, ẹre Osanobua khian loo ya ru emwi ne irẹn gualọ vbe agbọn na. Ọkpa vbe usun emwi ne Osanobua gualọ, ọre ne ọfunmwegbe gha rre uhunmwu otagbọn hia. Deghẹ u hoo ne u rẹn vbekpa avbe afiangbe ne u gha miẹn vbe Arriọba Osanobua gha suẹn gha kha yan agbọn na nẹ, u ghi ya ghee vidio na tie ẹre, De Emwi Ne Arriọba Osanobua Khin?
Avbe Osẹe Jehova ni rre Ukraine gberra 129,000. Vbe na ghee Avbe Osẹe Jehova ni rre ẹvbo ọvbehe, te iran wa ya egbe tae Jesu, iran i mwẹ obọ vbe otu azẹ, iran i vbe mwẹ obọ vbe okuo. (Jọn 18:36) Vbe uhunmwu otagbọn hia, Avbe Osẹe Jehova keghi ya “iyẹn nọ maan ọghe Arriọba” wewe, iran vbe tama emwa wẹẹ, Arriọba na ẹre ọ khian sọfurre ye ọlọghọmwa hia ni rre agbọn na, uhiẹn ya sẹ egbe okuo. (Matiu 24:14) U sẹtin tama ima, deghẹ u hoo ne u rẹn sayọ vbekpa ẹmwẹ ne Baibol tae, nọ ya ima mwẹ ilẹkẹtin wẹẹ, emwi hia gha dunna vbe odaro.
a Deghẹ u hoo ne u rẹn emwi nibun ọvbehe vbekpa ẹmwẹ akhasẹ na, lahọ ya tie uhunmwuta eva na, “Gha Re ‘Ọba Ọghe Okuọ’ Vbe Ẹghẹ Okiekie Ẹdẹ Ne Ima Ye Na?” kevbe “Gha Re ‘Ọba Ọghe Okuọ’ Vbe Ẹdẹnẹrẹ?”
You May Also Like
WA GHA BODẸ!
Emwa Nibun Lẹẹ Hin E Ukraine Rre—Emwi Ne Baibol Khare
E Baibol gi ima rẹn emwi nọ gele si ẹre, kevbe vbene a khian ya sọfurre yọ vbe odaro.
ESSENTIAL BIBLE TEACHINGS
De Emwi Ne Arriọba Osanobua Khin?
Arriọba Osanobua ẹre Jesu wa mobọ guan kaan vbe ọ rre uhunmwu otagbọn. Ke ẹghẹ nii gha dee, te erhuaengbe ẹre wa na erhunmwu ne Arriọba na rre.
