Vbe ẹghẹ ne ima ye na, intanẹt ẹre Avbe Osẹe Jehova ghi mobọ loo ya miẹn evbare orhiọn nibun. Sokpan vbe ẹvbo nibun vbe uhunmwu otagbọn na, etẹn i miẹn igho ya la intanẹt. Etẹn eso keghi rre ẹvbo nai na miẹn ukpa, eso rre ẹvbo ne network i na maan ra ne intanẹt i ye hiehie.

Vbọrhirhighayehẹ, etẹn nikpia kevbe etẹn nikhuo nibun keghi sẹtin danlod avbe ebe kevbe vidio ughughan vbene iran i na la intanẹt! De vbene ọna ya sunu hẹ?

E JW Box keghi re ovbi ẹkpẹti nekherhe, na mu gie avbe iko ni rre ẹvbo ne intanẹt i na maa ra ne intanẹt i ye hiehie. E JW Box na mwẹ emwi na tie ẹre router na dẹ vbe obọ emwa ni do ẹki, ọ mwẹ software ọkpa ne Computer Department vbe Bẹtẹl ru ye uwu ẹre, kevbe avbe ebe kevbe vidio ni rre jw.org na gha vbe sẹtin loo efoni ra e kọmputa ya kie. Ọkpọkpa vbe JW Box na gha sẹ odẹ $75 U.S.

Etẹn gha ghi sẹ Ọgua Arriọba, iran ghi ke eke ne iran ye cọnẹt efoni iran la e JW Box na, iyeke ọni, iran ghi suẹn gha danlod avbe ebe kevbe vidio. Uhiẹn te etẹn ni mwẹ efoni nọ khian ọmaẹn nẹ ra efoni nẹi vbe ghaan vberriọ, ye sẹtin loo efoni ọghe iran ya danlod emwi vbe JW Box. Sokpan deghẹ iko nii na gha rre ẹdogbo ne intanẹt i ye, de vbene a khian ghi ya gha viọ avbe ebe kevbe vidio ni da ladian ye JW Box hẹ? Ẹghẹ hia ẹre abotu ya viọ e USB gie egbe avbe iko vbenian, iran ghi viọ avbe ebe kevbe vidio ni da ladian vbe jw.org ye uwu ẹre, ne etẹn mieke na sẹtin loo e JW Box ya danlod avbe ebe kevbe vidio na. Igho na ya dẹ ọkpọkpa vbe avbe USB na gha sẹ odẹ $4 U.S.

De vbene JW Box he ya ru iyobọ ne etẹn hẹ? Ọ mwẹ ọtẹn nokpia ọkpa nọ mwẹ emọ, eni ẹnrẹn ọre Nathan Adruandra, ẹvbo na tie ẹre Democratic Republic of Congo ẹre ọ ye, ọtẹn nokpia na keghi kha wẹẹ: “I zẹ hia ni danlod ikueta na tie ẹre ‘Eo Jehova, . . . I Mu Ẹtin Yan Ruẹ’ kevbe Yee Amwẹ E Lọt Rre, sokpan I ma sẹtin, egbe na wa wọọ mwẹ. Sokpan vbe ẹghẹ na nia, te I ghi sẹtin ye efoni mwẹ danlod avbe vidio na, ọna wa vbe ru iyobọ ne ima zẹvbe evbibiẹ emọ, ne ima ya sẹtin gha maa ivbi ima emwi sayọ.”

Ọtẹn nokpia ọkpa nọ mwamwa e JW Box ne iko ughughan vbe Nigeria keghi kha wẹẹ: “Te etẹn wa ghee JW Box zẹvbe ẹse ne kpataki nọ ke obọ e Jehova rre. Ẹko wa sẹ iran ọyẹnmwẹ rhunmwuda ne iran na sẹtin danlod avbe ebe kevbe vidio ni rre avbe Emadogua Ne A Ya Maa Emwa Emwi.”

E JW Box na he viọ gie etẹn ima ni rre Africa, Oceania, kevbe South America gberra 1,700. Vbe na guan na, emwamwa wa rre otọ, na khian vbe ya viọ e JW Box nibun gie avbe iko nẹi re mwẹ. Sokpan, de eke ne a na miẹn igho na loo ya ru ena hia? Izọhẹ ne emwa ru ẹre a loo ya ru avbe iwinna na. E donate.pr418.com ẹre emwa nibun loo ya ru izọhẹ. Ma kpọnmwẹ uwa ye odẹ ne uwa ya ya ekhọe hia ru izọhẹ ye iwinna Arriọba.