Otọ ẹvbo nọ gberra 200, ẹre Avbe Osẹe Jehova na kporhu Iyẹn Nọ Maan, erriọ iran vbe ya ru iyobọ ne emwa ni gualọ iyobọ vbe avbe ẹvbo na. Sokpan, agbẹnvbo 35 kẹkan, ẹre igho ne emwa ya ru izọhẹ vbe ẹvbo iran sẹ iran ya gha ru iyobọ ye iwinna ugamwẹ nọ khian vbe ẹvbo iran. De vbene a ghi ya miẹn igho na loo vbe otọ ẹvbo ne emwa i na mobọ mwẹ igho?

Ẹbu Nọ Su ọghe Avbe Osẹe Jehova keghi mu ukpa mu uwerhẹn ghee emwi ne Avbe Osẹe Jehova ni rre ehe hia vbe uhunmwu otagbọn na gualọ, ne iran mieke na sẹtin gha ga e Jehova kevbe ne iran gha kporhu Iyẹn Nọ Maan. Te a fẹko mwamwa emwi na khian loo igho yi, iyeke ọni, a wa vbe loo ẹre zẹvbe na ya mwamwaẹn. Deghẹ igho nọ sẹ abotu obọ na gberra igho ne iran gele gualọ, iran ghi ya eso ru iyobọ ne etẹn ni rre avbe ẹvbo nai na miẹn igho loo somwa. Erriọ ẹre Ivbiotu e Kristi ni ghaa rrọọ vbe orre nokaro wa vbe gha ru ẹre, te iran wa vbe gha ru iyobọ ne egbe, ‘ne ọ mwẹ na gha ru iyobọ ne nẹi mwẹ.’ (2 Kọrinti 8:14) Ivbiotu e Kristi eso rrọọ ni ghaa mwẹ emwi nibun, iran keghi loo emwi ne iran mwẹ ya gha ru iyobọ ne Ivbiotu e Kristi ne obọ ma sẹ ọre.

Vbọ ye etẹn eso hẹ deghẹ a na loo igho eso nọ ke obọ abotu ọvbehe rre ya ru iyobọ ne iran? Vbe igiemwi, a gha ghae emwa hia ni rre Tanzania ye ihe eva, igho ne emwa ni gberra abọ ọkpa vbọ miẹn gha loo vbe ẹdẹ, ma sẹ two dollars. Vbọrhirhighayehẹ, a keghi loo igho nọ ke obọ abotu ọvbehe rre ya dọlọe yi ighẹ Ọgua Arriọba ne Iko ọghe Mafinga na gha do iko. Vbe elẹta ne etẹn ni rre iko na gbẹn, iran keghi kha wẹẹ: “Ke na ya dọlọ Ọgua Arriọba ọghe ima yi, te emwa nibun ghi wa deba ima do iko! Ma kpọnmwẹ otu e Jehova kevbe etẹn hia ne ima gba ga. Ne iran na zẹ emwi obọ, ẹre ọ si ẹre ne ima na sẹtin gha mwẹ owa ugamwẹ ne mosee vbenian.”

Etẹn ima eso ni rre Sri Lanka i ghi miẹn evbare re sẹ ọkẹn rhunmwuda ẹmwẹ COVID-19. Usun etẹn na kha na ọre ọtẹn nokhuo Imara Fernando kevbe ovbi ẹre nokpia na tie ẹre, Enosh. Rhunmwuda izọhẹ ne emwa ni rre ẹvbo ọvbehe ru, otu e Jehova keghi sẹtin kpemehe emwi ne iran gualọ ne iran. Iran keghi ya obọ ru ekadi ọkpa, iran na vbe gbẹnnẹ emwi yọ, emwi eso ne iran gbẹnnẹ yọ ọre wẹẹ: “Ma kpọnmwẹ etẹn ye odẹ ne iran ya rhie ẹre ma wẹẹ iran hoẹmwẹ ima vbe ẹghẹ nọ wegbe ne ima ye na. Ma ghọghọ wẹẹ ima rre otu e Jehova, ẹghẹ hia ma ya na erhunmwu ne Jehova gha ru iyobọ ne etẹn hia ne ima gba ga vbe ẹghẹ okiekie ẹdẹ ne ima ye na.”

Ehe ke ehe ne etẹn rhirhi gha ye vbe uhunmwu otagbọn na, iran wa loo emwi ne iran mwẹ ya ru izọhẹ. Vbe igiemwi, rhunmwuda wẹẹ Enosh hoo nọ gha ru izọhẹ, na mieke na gha miẹn igho na khian gha loo ya ru iyobọ ne avbe ẹgbẹe ni gualọ iyobọ, ọ keghi kun ovbi ẹkpẹti nọ khian gha koko igho yi. Egbe ekhọe na ya rhie ladian vbenian ẹre ọtẹn nokhuo Guadalupe Álvarez wa vbe mwẹ. Vbe ẹvbo ne ọtẹn nokhuo na ye vbe Mexico, ibozẹghẹ emwa ẹre ọ sẹtin gha miẹn igho nọ ghi kherhe sẹ ne arriọba wẹẹ na gha ha emwa re, eso i zẹdẹ miẹn hiehie. Ọrheyerriọ, te ọtẹn nokhuo na ye ye emwi nọ mwẹ ru izọhẹ. Vbe elẹta nọ gbẹn, ọ keghi kha wẹẹ: “I kpọnmwẹ e Jehova ye ekhọe esi kevbe ahoẹmwọmwa nẹi beghe nọ mwẹ, I rẹnrẹn wẹẹ, a gha rhie igho ne I ya ru izọhẹ ba ọghe emwa ọvbehe, na mieke na yae ru iyobọ ne etẹn ni gualọ iyobọ.”

Avbe abotu ni mu igho ye ẹvbo ọvbehe ne etẹn na gualọ iyobọ wa ghọghọ vbe iran ghaa ru vberriọ. Ọtẹn nokpia Anthony Carvalho nọ re ọkpa vbe Agbaziro Ọghe Abotu nọ rre Brazil keghi kha wẹẹ, “Vbe ukpo nibun, te ima wa gha gualọ igho ne ima khian gha loo ye iwinna ugamwẹ nọ khian vbe ẹvbo na, vbe obọ avbe abotu ọvbehe. Rhunmwuda iyobọ ne ima miẹn vbe obọ avbe abotu ọvbehe, te etẹn ni ya iyẹn wewe vbe ẹvbo ọghe ima ghi wa muan yọ. Sokpan vbene a guan na, emwi hia fiwerriẹ nẹ, te ima ghi miẹn igho loo somwa, ẹi re ọni ọkpa, te ima ghi vbe sẹtin ru iyobọ ne emwa ọvbehe. Etẹn ni rre Brazil gha ghee iwinna ikporhu nọ khian vbe ehe hia vbe uhunmwu otagbọn na, iran ghi gha gualọ vbene iran khian ya ru iyobọ ye iwinna na hẹ.”

De odẹ nọ ghi maan sẹ ne Avbe Osẹe Jehova gha ya sẹtin ru iyobọ ne etẹn nikpia kevbe etẹn nikhuo ni gualọ iyobọ? Ẹi re te iran khian wa gha rhie igho gie etẹn ni rre abotu vbe ẹvbo ọvbehe, sokpan iran ghi gha ru izọhẹ ye iwinna ikporhu nọ khian vbe uhunmwu otagbọn hia. Odẹ ne iran khian ya ru ọna ọre ne iran gha rhie igho ye ẹkpẹti okozẹ na gbẹn “Worldwide Work” yi vbe iko ọghe iran, ra ne iran gha ya e donate.pr418.com, ya ru izọhẹ vbe intanẹt. Ma wa gbọyẹnmwẹ ye avbe izọhẹ na.