AVBE AKO ỌGHE BAIBOL NA RHAN OTỌ RE
Ebe Itan 16:3—“Rinmwian e NỌYAẸNMWA nọ yobọ ye emwamwa ruẹ”
“Rinmwian e Jehova nọ yobọ ye emwamwa ne u rhirhi gha ru, u gha ru vberriọ, emwamwa ruẹ gha dunna.”—Itan 16:3, New World Translation.
“Rinmwian e Nọyaẹnmwa nọ yobọ ye emwamwa ruẹ, u gha ru ẹre, te ọ wa dunna nuẹn.”—Itan 16:3, New International Version.
Emwi Ne Itan 16:3 Demu
Ako na vbe ebe Itan rhie ilẹkẹtin ne emwa hia ni ga Osa ọghe ẹmwata wẹẹ, emwamwa ọghe iran gha dinnodẹ, deghẹ iran na mu ẹtin yan Osanobua, iran na vbe gha lele adia ọghẹe.
“Rinmwian e Jehova nọ yobọ ye emwamwa ruẹ.” Vbene eguọmwadia e Jehova a te ru azẹ rhọkpa, iran ghi ka na erhunmwu ne Jehova ru iyobọ ne iran. (Jems 1:5) Vbọzẹ? Rhunmwuda, ma rhọkpa nọ rẹn vbene ẹdagbọn ima khian gha ye hẹ vbe akhuẹ i rrọọ. (Asan-Ibo 9:11; Jems 4:13-15) Vbe deba ọni, ma sẹtin gha mwẹ emwamwa vbe ekhọe, sokpan, ma i mwẹ ẹwaẹn ne ima khian ya muẹn sẹ. Rhunmwuda emwi na sunu yi na, te emwa ni bun wa rinmwian Osanobua nọ ru iyobọ ne iran, ne emwamwa ọghe iran mieke na dunna. Odẹ ne iran ya ru ọna ọre wẹẹ, iran keghi rinmwian Osanobua vbe erhunmwu nọ dia iran ye odẹ, iran vbe ya ilele ọghẹe nọ rre Baibol ru emwi.—Itan 3:5, 6; 2 Timoti 3:16, 17.
Evba ya ẹmwẹ na kha ighẹ “rinmwian e NỌYAẸNMWA b nọ yobọ ye emwamwa ruẹ” ọre, “mu iwinna ruẹ hia ne Nọyaẹnmwa.” Ebe ọkpa ghi rhan otọ ẹmwẹ na, ọ na wẹẹ, te ọ yevbe “okpia ọkpa nọ mu ihẹ nọ te khua ẹre, ne ọmwa nọ wegbe sẹ ọre kevbe nọ gha vbe sẹtin gu ẹre muẹn.” Emwa hia ni mu ẹtin yan Osanobua keghi mwẹ ilẹkẹtin wẹẹ, ọ gha ru iyobọ ne iran, kevbe wẹẹ ọ gha gbaroghe iran.—Psalm 37:5; 55:22.
Ẹmwẹ na ighẹ “emwamwa ne u rhirhi gha ru” ma wa rhie ma wẹẹ, Osanobua gha wa kpasẹ ye emwamwa hia ne emwa mwẹ, ra ọ gha vbe fiangbẹ. Deghẹ ima hoo ne Jehova fiangbe emwamwa ọghe ima, te ọ khẹke nọ gu iho ọghẹe ro. (Psalm 127:1; 1 Jọn 5:14) Osanobua i fiangbe emwa ni yin ehọ. Te irẹn kue “zagha uma [ọghe] emwa dan rua.” (Psalm 146:9) Sokpan, ọ ghi gha ru iyobọ ne emwa ni lele ẹmwẹ ni rre Baibol.—Psalm 37:23.
“Emwamwa Ruẹ Gha Dunna.” E Baibol eso keghi zedu ẹmwẹ na vbenian, “emwamwa ruẹ gha deziẹn.” Vbe abọ ọghe Baibol na ya e Hibru gbẹn, ra ne emwa mobọ tiẹre Ile Nẹdẹ, ẹmwẹ na, na zedu ẹre nọ re “deziẹn” keghi dekaẹn na do gbe ẹyotọ, a vbe loo ẹre vbe a ghaa guan kaẹn emwi ughughan ne Osanobua yi. (Itan 3:19; Jerimaia 10:12) Osanobua gha ye emwamwa ọghe emwa ni ru emwi nọ yẹẹ ọre deziẹn, ọni nọ wẹẹ, ọ gha ru iyobọ ne iran ne egbe mieke na rhọkhọ iran, ẹkun ghi sẹ iran otọ, iran ghi vbe gha sọyẹnmwẹ ẹdagbọn iran.—Psalm 20:4; Itan 12:3.
Emwi Ughughan Ni Ginna Itan 16:3
Ọba ighẹ Sọlomọn ẹre ọ gbẹn abọ nọ bun sẹ vbe ebe Itan, irẹn ẹre ọ vbe gbẹn abọ na. Rhunmwuda ẹwaẹn ne Osanobua ya we ẹre, ẹre ọ si ẹre nọ na sẹtin gbẹnnẹ avbe Itan na.—1 Ọba 4:29, 32; 10:23, 24.
Vbe uhunmwu ẹnrẹn 16, e Sọlomọn na ka rho Osanobua, rhunmwuda a i miẹn emwi na ya gie ẹwaẹn ọghe Osanobua kevbe wẹẹ, ọ vbe khuiwu emwa ni tọn egbe mu. (Itan 16:1-5) Ebe Itan 16, gha ru iyobọ ne emwa ni tie ẹre, ya rẹn emwi kpataki ne ebe Itan sunu yi inugba nọ khin, ọni ọre: Deghẹ emwa nagbọn hoo ne iran gele gha mwẹ ẹwaẹn kevbe ne agbọn maan iran, te ọ khẹke ne iran gha mu egbe rriotọ, iran ghi vbe gha lele adia ọghe Osanobua. (Itan 16:3, 6-8, 18-23) E Baibol wa mobọ guan kaẹn ẹmwata ne kpataki na.—Psalm 1:1-3; Aizaia 26:3; Jerimaia 17:7, 8; 1 Jọn 3:22.
Ghee vidio ne kuẹi na, ne u ya rẹn emwi ne ebe Itan guan kaẹn
a E Jehova ọre eni Osanobua. (Psalm 83:18) Ya ghee uhunmwuta na “Who Is Jehovah?”
b Vbe omuhẹn ọghe New International Version Study Bible, a keghi kha wẹẹ, te a loo “ENỌYAẸNMWA” (“ENỌYAẸNMWA” vbe abidi ni kọnkọn) ya rhie ihe eni Osanobua. Sokpan, te emwi vbenian ya e Baibol na tie lọghọ ọmwa, u ghaa hoo ne u rẹn evbọzẹe ya ghee uhunmwuta na “Aizaia 42:8—‘Mẹ Ọre ENỌYAẸNMWA.’”
You May Also Like
THE WATCHTOWER
Imamwaemwi Ni Rre Baibol—Ẹwaẹn Nọ Rrọọ I Fafa
Agharhemiẹn wẹẹ, irẹnmwi ọgbọn ẹre emwa ghi mwẹ vbe ẹdẹnẹrẹ, te irẹnmwi na wa ye gua emwi nọ rre Baibol ro, nọ so igiẹ yọ wẹẹ, ẹghẹ ọkpa i rrọọ ne ẹmwẹ ni rre Baibol khian ya fafa, ọ gha khọnrẹn wẹẹ ẹghẹ nọ kpẹẹ fua ẹre a ghi ya gbẹn ọnrẹn, te ọ wa ye mwẹ esa nọ ye vbe ẹdẹnẹrẹ.
IMAMWAEMWI NI RRE UWU E BAIBOL
Avbe Emadogua Ne A Ya Ruẹ E Baibol
Tobọ ruẹ zẹ emadogua ne u khian loo ya ruẹ e Baibol, ne emwi ne u ruẹ mieke na sẹ ruẹ ekhọe kevbe nọ vbe gha sẹ ruẹ ọyẹnmwẹ.
