Ọ ma zẹdẹ gha khuẹrhẹ ne etẹn ima ni rre owa isinmwiegbe ra ehe ne a na gbaroghe avbe ọmaẹn, ya do Ugie Ayere Ọghe Uwu E Kristi, rhunmwuda emianmwẹ COVID-19. Iran ma sẹtin kpa hin ako ne iran ye rre, emwa ọvbehe ma vbe sẹtin do tuẹ iran. Ọrheyerriọ, ediọn ni rre iko iran, keghi ru iyobọ ne etẹn na, ne iran mieke na sẹtin do Ugie Ayere.

Vbe ovbi ẹvbo na tie ẹre Naju vbe South Korea, etẹn ima nikhuo ighẹ e Lee Jeom-soon nọ rre ukpo 91, Kwon Ae-soon nọ rre ukpo 88, kevbe edede ọvbehe nọ rre ukpo 96, nọ hoo ruẹ Baibol, na wa gha hoo ne iran do Ugie Ayere Ọghe Uwu e Kristi. Owa ne a na gbaroghe avbe ọmaẹn ẹre iran eha na ye. Ọkpa vbe uwu avbe ọbo ebo ni winna vba, keghi re Osẹe Jehova. Ọtẹn na ghi deba iko ọghẹe do Ugie Ayere nẹ vbe owa, ọ na werriegbe gha die isiwinna, ne ọ na do kpee vidio ọghe Ugie Ayere Ọghe Kristi nọ rre jw.org ne etẹn na kevbe edede nọkpa. Ọtẹn nokpia na, na vbe mu eka na ma gua kevbe ayọn nọ baa ọghe Ugie Ayere gie iran.

Ọ mwẹ ọtẹn nokpia ọkpa na tie ẹre Choi Jae-cheol, ovbi ẹvbo na tie ẹre Uijeongbu vbe South Korea ẹre ọ ye, ọwa ne a na gbaroghe avbe ọmaẹn ẹre ọtẹn na na winna, etẹn ima 14 ni khian ọmaẹn nẹ, rre usun emwa ne ọ gbaroghe. Agharhemiẹn wẹẹ emianmwẹ corona wa vẹwa vbe ẹvbo nii, te ọtẹn na ye sẹtin ru iyobọ ne etẹn ni rre evba ya do Ugie Ayere, uhiẹn ya sẹ egbe emwa ni hoo ne iran ruẹ e Baibols. Ọta ọghe Ugie Ayere Ọghe Uwu e Kristi na rrẹkọdi ye vidio, ẹre ọ kpee re ma iran. Iyeke ọni, etẹn keghi suẹn gha gu emwa ni hoo ne iran ruẹ e Baibol ruẹ semwi.

Ọ vbe mwẹ ọtẹn nokhuo ọvbehe na tie ẹre Kim Tae-sun nọ rre ẹvbo e Cheonan, ukpo 59 ẹre ọtẹn na ye. Ukpo isẹn ẹre ọ ye na, ne ọtẹn na ke khuọnmwi emianmwẹ cancer. Ọ ma he kpẹ vbe a mu ọnrẹn gha rrie owa isinmwiegbe, rhunmwuda obalọ ne ọ ghaa ye. Ughugha ọkpa ẹre a mu ọtẹn na kevbe ọtẹn nokhuo ọvbehe na tie ẹre Kim Jeong-mi yi. Ukpo 69 ẹre ọtẹn nokhuo Kim Jeong-mi ye, emianmwẹ cancer ẹre ọ vbe khuọnmwi. Etẹn na i khian sẹtin kpa hin owa isinmwiegbe rre rhunmwuda emianmwẹ dan na. Ọrheyerriọ, ediọn ma sẹ iran rae, iran wa ru iyobọ nọ khẹke ne iran, e videoconference ẹre iran ghi ya deba iko iran do Ugie Ayere.

Etẹn nikhuo eva na keghi gbẹn elẹta ọghe ekpọnmwẹ gie ediọn ni rre iko iran, ye ẹse ne iran ru. Iran khare wẹẹ: “Uwa ru ẹse vbe egbe ima, ne uwa na ru emwamwa, ne ima deba etẹn ne ima gba ga do Ugie Ayere Ọghe Uwu E Kristi vbe uwu ẹghẹ emianmwẹ COVID-19 na, agharhemiẹn wẹẹ egbe ma rhan ima.”

Ọtẹn nokhuo ọkpa na tie ẹre Mieko Fujiwara nọ rre ukpo 70, nọ rre Mie Prefecture vbe Japan, vbe gha rre owa ọsinmwiegbe vbe uwu ẹghẹ na ya do Ugie Ayere. Ọtẹn na i khian sẹtin ya videoconference deba iko ọghẹe do Ugie Ayere, rhunmwuda intanẹt i rre owa isinmwiegbe ne ọ ye. Sokpan ọ ke sẹ ẹdẹrriọ, ọdiọn ọkpa vbe amwẹ ọnrẹn ni rre iko ọghe ọtẹn na, keghi mu e vidio ọghe ọta ọghe Ugie Ayere ye efoni ọghẹe. E vidio nii, ẹre ọtẹn na ghi ya do Ugie Ayere Ọghe Uwu e Kristi vbe owa isinmwiegbe ne ọ ghaa ye.

Ọ mwẹ ọtẹn ima nokhuo ọvbehe na tie ẹre Yuki Takeuchi, e Zama City, Kanagawa Prefecture ẹre ọ ye, vbe ehe ne a na gbaroghe avbe ọmaẹn. Ukpo 102 ẹre ọ ye. Ọ te sẹ ẹdẹ na khian do Ugie Ayere, ovbiẹre nokhuo vbe ọdafẹn ọnrẹn, na mu eka na ma gua kevbe ayọn nọ baa ọghe Ugie Ayere gie ẹre. Ọ na ghi ya efoni deba iran do Ugie Ayere.

Ọdafẹn ovbi ẹre na tie ẹre Mimura, keghi kha wẹẹ: “Ke obọ ne iye ọvbokhan mwẹ ya dinmwiamẹ vbe ukpo 1954 gha dee, ọ ma he gbe ẹdẹ Ugie Ayere ọkpa re ẹdẹ. Agharhemiẹn wẹẹ Ugie Ayere ọghe ukpo na wa lughaẹn, te ọ wa gha sọyenmwẹ wẹẹ, irẹn ye sẹtin gha mwẹ obo vbọ.”

Ma wa mwẹ ilẹkẹtin wẹẹ, e Jehova i khian mianmian etẹn na, ya ẹrhiọn ne iran loo ro, ne iran mieke na gha mwẹ obọ vbe Ugie Ayere ọghe ukpo na, e Jehova gha vbe fiangbe ediọn ye iyobọ ne iran ru ne etẹn na.—Hibru 6:10.