A fan ọtẹn nokpia Vladimir Alushkin vbe eghan nẹ, March 30, 2020 ẹre irẹn vbe ọvbokhan rẹn ghi miẹn egbe.

Ohiẹn na buru vbe Penza Regional Court vbe March 25, ẹre ọ ya iran fan ọtẹn na vbe eghan. Ọbuohiẹn nii keghi kha wẹẹ, ọ ma khẹke na mu avbe etẹn na khui. Etẹn na ba re ifiẹzọ ọre Ọtẹn Nokpia Vladimir Alushkin, Vladimir Kulyasov, Andrey Magliv, Denis Timoshin, Ọtẹn Nokhuo Tatyana Alushkina kevbe Galiya Olkhova. Penza Regional Court keghi werriegbe mu ẹmwẹ na gha die ekọtu na na ka suẹn gha gui ẹzọ na, ne ọbuohiẹn ọvbehe mieke na bu ohiẹn etẹn ima. Vbe na guan na, etẹn ima ehan na, i mwẹ asẹ ne iran khian ya kpa hin Russia rre, emwi nibun vbe rrọọ ne iran i khian ghi na gha mwẹ obọ.

Ẹmwata nọ wẹẹ a fan Ọtẹn Nokpia Alushkin nẹ vbe eghan, sokpan vbọ ghi rre ikpẹdẹ eva vba, iran na vbe bu ohiẹn gbe ọtẹn ima nokpia ọkpa, vbe odẹ ọkuọ ọghe Russia, rhunmwuda iyayi ọghẹe. Ma rẹnrẹn wẹẹ, etẹn ima nikpia kevbe nikhuo ni rre Russia i khian mianmian ẹmwẹ igiọdu nọ rre ebe Nahum 1:7: “E Nọyaẹnmwa wa maan, ọ degue avbe emwa rẹn vbe ẹghẹ ibaro; ọ gbaroghe iran ni lẹ bu ẹre rre.”