January 22, 2020, ẹre a khian bu ohiẹn ọtẹn nokpia Roman Markin kevbe Viktor Trofimov. Emwi na tie iran ẹzọ keghi tama ọbuohiẹn wẹẹ, iran hoo ne etẹn na gbe ukpo ehan vbe ukhiọnmwẹ vbe eghan.

April 18, 2018, ẹre avbe olakpa suẹn gha kpokpo etẹn ima na, iran keghi ya ẹtin vbe iwegbe gbe urho la owa etẹn na, vbe ovbi ẹvbo Polyarny vbe Russian. Ogie asọn ẹre avbe olakpa ya gha rrie owa ọtẹn nokpia Markin, iran keghi hẹ rhu ẹkhu nii sẹrriọ wẹẹ, ọ na de. Iran na mu osisi da ọtẹn nokpia Markin, iran na wẹẹ nọ lovbiẹ mu aro rhu otọ, iyeke ọni, iran na suẹn gha zanzan owa ẹre. Ovbi ẹre nokhuo nọ rre ukpo 16, vbe gha rre owa vbe ẹdẹrriọ vbe avbe olakpa rre, ọ na vbe deba erhae lovbiẹ mu aro rhu.

Owa enẹ ọghe Avbe Osẹe Jehova vbe Polyarni, ẹre avbe olakpa khọn la vbe asọn nii. Iran na viọ etẹn ni gberra iweva gha rrie station ọghe iran, ya gha nọ iran ọta. Ọtẹn nokpia Markin kevbe Trofimov vbe deba etẹn ne iran viọ re. Vbe iyeke ena hia, Polyarny District Court ọghe Murmansk na ghi wẹẹ, na mu ọtẹn nokpia Markin kevbe Trofimov ye eghan, a te miẹn wẹẹ a bu ohiẹn iran. Odẹ uki ehan ẹre etẹn na gbe vbe eghan, iyeke ọni, a na vbe khui iran ye owa vbe owara uki enẹ. February 7, 2019, ẹre kọtu ghi fan obọ ne iran, ne iran ladian vbe owa. Ẹmwata nọ wẹẹ a fan iran nẹ, sokpan a keghi gbe uhi ne etẹn na, ne iran ghẹ kpa hin ẹvbo nii rre, ne iran ghẹ vbe gha gu etẹn mu obọ vbene iran ka ru ẹre dee yi.

Avbe Osẹe Jehova ni rhie odẹ 300, ẹre Russia he ba ẹre ifiẹzọ. Ẹghẹ hia ma ya mu ẹmwẹ etẹn na ya erhunmwu ne ẹtin ghẹ fue iran, ne iran wegbe kevbe ne iran gha mwẹ udinmwẹ. Ma vbe mwẹ ilẹkẹti wẹẹ, emwi rhọkpa i rrọọ nọ gha sẹtin wannọ iran hin ahoẹmwọmwa ọghe Jehova rre.​—Rom 8:​38, 39.