Vbe March 23, 2020, vbe otọ ẹvbo ọghe Khabarovsk vbe Russia, avbe olakpa ọghe FSB nọ re (Federal Security Services) keghi kun egbe gha rrie owa ọtẹn nokpia Igor Avramenko, na kha na, ikpẹdẹ ehan ẹre ọ ghi ye ne ọtẹn na wu rhunmwuda emianmwẹ u. Ọkpa vbuwe iran na rhie ebe asẹ ọghe na ya zanzan owa ọghe Avramenko ma ọvbokhan rẹn. Iyeke ọni, iran na mu e kamẹrra, e kọmputa kevbe emwi ewe eso ọghe ọvbokhan rẹn ighẹ Yelena.

Ọ ke sẹ ẹghẹ nii, avbe olakpa eso na ya ke isiwinna ọvbokhan Avramenko rrie ẹre gha die owa, vbene enọwanrẹn iran na tiẹre Stanislav Grebenkin na gha khẹ iran vbe owa. Iran ghi sẹ owa, ọ na rhie ebe asẹ ọghe na ya zanzan owa Avramenko ma ọvbokha rẹn. Ọvbokhan Avramenko na tama okpia nii wẹẹ ọdafọn irẹn wu nẹ, ọ wẹẹ irẹn rẹnrẹn, sokpan te iran khian ye ru emwi ne iran rre ba rhunmwuda, arriọba rhie asẹ ne iran nẹ, ọdafọn ẹnrẹn ke wu.

Sokpan ọ keghi tama ọvbokhan Avramenko nẹ ghẹ fian afianma, wẹẹ te iran khian wa ru vbene ebe khare, gberra ọni, ọ khẹke ne iran zanzan ehe hia, ne iran mieke na miẹn iyẹn vbene iran khian hẹ na ma arriọba, iyeke ọni, iran ghi mu ne ẹzọ yotọ. Sokpan ẹre vbene iran ta ẹre iran ghi ru, iran wa suẹn gha zagha ehe hia, erriọ iran vbe ya guọghọ emwi nibun.

Vbe Khabarovsk, Ọsẹe Jehova igbe ẹre arriọba ba ẹre ifiẹzọ wẹẹ iran rraa uhi. Agharhemiẹn wẹẹ arriọba wa kpokpo etẹn ima, ne iran mieke na mu imudiase ọghe iran fua, ima rẹnrẹn wẹẹ, iran i khian mianmian ẹmwẹ ne Erha mwa e Jehova khare, ọ wẹẹ, “uwa hẹko mu ẹtin yan mwẹ. Ẹghẹ nii wa gha wegbe, wa ghi vbe gha re ne ẹkun sẹ ọre otọ.”—Aizaia 30:15.