Jehova b’a fɛ mɔgɔ sugu bɛɛ ka ale dɔn ani ka a ka sankolola Masaya fana dɔn, o mɔgɔw ka kow cogoya mana kɛ fɛn o fɛn ye. (1 Timote 2:3, 4) O de kosɔn, Bibuluw ani kalankɛ gafe minnu sinsinnen bɛ Bibulu kan, Jehova Seerew bɛ olu caman bɔ walasa mɔgɔ fanba ka se ka u sɔrɔ, hali tulogerenw yɛrɛ sen bɛ o la. An ka jɛkuluba ye wideyo a ba caman de bɔ fo bobow ka kan kɛmɛ ni kɔ la, tulogerenw bɛ se ka minnu faamu! O wideyow bɛ dilan ani ka jɛnsɛn cogo di? An ye yɛlɛmali jumɛnw de kɛ walasa o wideyow cogoya ka ɲɛ ka ta’a fɛ?

 Ekipu minnu bɛ kanw bayɛlɛma diɲɛ fan bɛɛ, olu de bɛ wideyow dilan bobow ka kanw na tulogerenw kama. Ni u ka kan ka gafe dɔ bayɛlɛma o kanw na, o ekipu mɔgɔw kelen-kelen bɛɛ bɛ o gafe sɛgɛsɛgɛ koɲuman fɔlɔ. O kɔ, tulogerenw bɛ se ka o gafe kumaw faamu ka ɲɛ cogo min na u ka kan na, ekipu mɔgɔw bɛ bɛn o kan. Ni u bɛnna o kan waati min na, u bɛ o dilan ka kɛ wideyo ye. Sisan, gafe minnu sinsinnen bɛ Bibulu kan, ekipu 60 de bɛ ka olu bayɛlɛma bobow ka kanw na, wa u bɛ o kɛ tuma bɛɛ. Ekipu wɛrɛw fana bɛ yen minnu bɛ o baara kɛ tuma ni tuma, wa olu hakɛ bɛ bɛn 40 ma.

 Fɔlɔ la, o wideyow dilanni tun da ka gɛlɛn kosɛbɛ. Kameraw ni baarakɛminɛn wɛrɛw minnu ka kan o baara kama, olu tun da ka gɛlɛn kosɛbɛ fɔlɔ ka tɛmɛn sisan kan. Ani fana, o wideyow baara tun ka kan ka kɛ so minnu kɔnɔ, an yɛrɛ de tun bɛ olu jɔ, walima ka so dɔ lakuraya o baara kama. Ekipu minnu bɛ o kanw bayɛlɛma, walasa olu ka baarakɛminɛnw bɛɛ sɔrɔ o baara kama, o sɔngɔ tun bɛ taa fo dolari wari 30 000 b ni kɔ la ni o bɛ bɛn cfa wari 19 500 000 ni kɔ ɲɔgɔn ma.

 Walasa ka baara kɛ koɲuman ni an ka bolomafaraw ye, an ka jɛkuluba ye baaraba de kɛ walasa ka o kanw bayɛlɛmali kɛcogo fisaya ani ka u nɔgɔya. An ye baarakɛminɛn kurabɔlen dɔ sugandi min baarakɛcogo ka ɲi ani min da ka nɔgɔn. Sani ka so kɛrɛnkɛrɛnnen dɔ ta o baara kama, o kanw bayɛlɛmalikɛlaw bɛ se ka fɛn dɔ bila u kɔfɛ kogo la min kulɛri ye binkɛnɛ ye walasa ka wideyow dilan ka u to u yɛrɛw ka yɔrɔw la. O fɛn bɛ wele ko fond vert. Ni balimakɛ ni balimamuso caman ka kan ka bɔ wideyo dɔ la, u ka kan ka yɔrɔ min kɛ, o balimaw bɛ se ka o yɔrɔ ta ka u to u ka baarakɛyɔrɔ la walima u yɛrɛ ka so. U mago t’a la bilen ka taa so kɛrɛnkɛrɛnnen dɔ kɔnɔ o baara kama.

 Balima minnu bɛ o baaraw kɛ, an ye porogaramu dɔ fana sigi sen kan walasa ka olu dɛmɛ u ka baara la. O y’a to, kanw bayɛlɛmalikɛ ekipuw tun bɛ waati min ta walasa ka wideyo dɔ bɔ bobow ka kanw na, caman bɔra o waati la kosɛbɛ. U tun bɛ waati min ta fɔlɔ wideyo kelen dilanni kama, u bɛ o waati tilancɛ dɔrɔn de ta sisan walasa ka o wideyo kelen dilan. O yɛlɛmaliw diyara an balimaw ye kosɛbɛ. Balima dɔ, min tɔgɔ ye ko Alexander, o y’a fɔ ko: “Wideyo minnu bɛ dilan bobow ka kanw na, olu caman bɛ bɔ sisan ka tɛmɛn fɔlɔ kan. Ne nisɔndiyalenba don o ko la. Ne bɛ o wideyow lajɛ don o don.”

 Sisan, o kanw bayɛlɛmalikɛlaw mago bɛ fɛn minnu na o baara kama, olu sɔngɔ tɛ hali dolari wari 5 000 bɔ ni o bɛ bɛn cfa wari 3 200 000 ɲɔgɔn ma. O y’a to sisan, an bɛ se ka wideyow bɔ bobow ka kanw na.

 Ni ekipu dɔ tilara gafe dɔ bayɛlɛmali la ka a kɛ wideyow ye bobow ka kan dɔ la, o wideyow ka kan ka lase mɔgɔw ma minnu mago bɛ u la. Fɔlɔ la, an tun bɛ wideyo kasɛtiw ni DVD caman dilan, nka u dilanni tun da ka gɛlɛn, wa u kɛli tun bɛ waati caman ta. An tun bɛ wideyow bila ka taa baarakɛyɔrɔ dɔ mɔgɔw ma, minnu tɛ an ka jɛkuluba kɔnɔ walasa u ka u labugun. O kɔ, o wideyo kasɛtiw ni DVD tun bɛ bila ka taa jɛkuluw kɔnɔ. San 2013 dɔrɔn kɔnɔ, an ye dolari wari 2 000 000 ni kɔ de bɔ ni o bɛ bɛn cfa wari 1 300 000 000 ni kɔ ɲɔgɔn ma walasa ka wideyow dilan ka u bila DVD caman kan bobow ka kanw na ani ka u jɛnsɛn.

 O fɛn minnu tun bɛ bɔ tulogerenw kama, o tun ka di u ye kosɛbɛ. Nka baara kɛli tun man nɔgɔn ni o wideyo kasɛtiw ni DVD ye bawo u hakɛ tun bɛ ka caya ka ta’a fɛ. Tuma dɔw la, Bibulu kitabunin kelen dɔrɔn kama, DVD caman de tun ka kan ka dilan. Balimakɛ dɔ, o min bɛ Berezil ni a tɔgɔ ye ko Gilnei, o ko: “Fɔlɔ la, ni an tun b’a fɛ ka tɛmɛsira dɔ kalan, o bɛ wideyo kasɛti min kɔnɔ, fo an tun ka o de ɲini fɔlɔ walasa ka o tɛmɛsira sɔrɔ, wa o tun ka gɛlɛn kosɛbɛ yɛrɛ de.” Wideyo minnu bɛ bɔ bobow ka kanw na, balimamuso dɔ min tɔgɔ ye ko Rafayane, o tun bɛ to ka olu DVD lama lajɛ, a ko: “Yɛrɛkalan kɛli tun sɛgɛn ka bon kosɛbɛ. An tun bɛ waati caman de kɛ tɛmɛsiraw ni gafew ɲinini na.” Ni balimakɛw ni balimamusow tun bɛ taa waajuli kɛ, tuma caman na, u tun bɛ taa ni wideyo kasɛtiw ni DVD ye u bolo. O la, ni mɔgɔ min tun b’a fɛ ka o wideyow lajɛ, u tun bɛ o kasɛtiw k’a la o tigi yɛrɛ ka tele la. DVD bɛ lajɛ ni min ye, balima dɔw yɛrɛ tun bɛ o ta u bolo ka taa waajuli la. Nka dɔɔnin o kɔ, DVD bɛ lajɛ ni min ye, o ekranlama nana caya kosɛbɛ, o la balima caman sera k’a sɔrɔ ani ka baara kɛ ni a ye. Bobby o min bɛ Etazuni, o ko: “Ni an tun tilara tɛmɛsira dɔ jirali la, walasa ka tɛmɛsira wɛrɛ jira, tuma dɔw la, an tun ka kan ka DVD wɛrɛ de k’a la tuguni. O kɛli tun bɛ waati caman ta, wa tɛmɛsiraw jirali tun ka gɛlɛn kosɛbɛ an ka barow kɔnɔna na mɔgɔw fɛ.”

 San 2013, Jehova ka jɛkuluba ye JW Library application bɔ bobow ka kan na. O y’a to balimakɛw ni balimamusow ka se ka wideyow ta ani ka u lajɛ u ka telefɔni walima u ka tablɛti kan. O application in fɔlɔla ka bɔ Ameriki bobow de ka kan na. O kɔ, san 2017 yɛlɛmaliw kɛra JW Library application kɔnɔ walasa bobow ka kan tɔw bɛɛ ka se ka bila a kɔnɔ. Diɲɛ fan bɛɛ, balimakɛw ni balimamusow nisɔndiyara kosɛbɛ o ko la. Juscelino, o min ye Berezil balimakɛ dɔ ye, o ko: “Ne dabali banna kosɛbɛ! K’a ye ko Ɲɛmɔgɔ kulu mɔgɔw bɛ kanuya jira an tulogerenw na nin cogo la ani k’a ye ko u b’a fɛ an ka ɲɛtaga kɛ tiɲɛ kɔnɔna na i n’a fɔ mɔgɔ tɔw minnu bɛ se ka kuma ani ka mɛnni kɛ, o bɛ ne nisɔndiya kosɛbɛ wa application in ye dusu don ne kɔnɔ ne ka dɔ fara n’ka Bibulukalan kan.”

 Bi bi in na, an bɛ wideyow dilan bobow ka kanw na ani ka u bila an ka siti kan ani JW Library application kan. O la, mɔgɔw bɛ se ka u lajɛ u ka masinimafɛnw kan. O y’a to sisan, gafew bɛ se ka bayɛlɛma bobow ka kanw na, ka u kɛ wideyow ye ani ka u jɛnsɛn tile damadɔ dɔrɔn kɔnɔna na k’a sɔrɔ fɔlɔ, o bɛɛ kɛli tun bɛ kalo caman walima san caman yɛrɛ ta. Bobow ka kanw wideyow caman ni mɔgɔ tɔw ka gafew fila bɛɛ bɛ ka bɔ waati kelen na ɲɔgɔn fɛ sisan.

 An balima minnu tulo gerennen don, olu ye min fɔ nin ko ninnu bɛɛ ko la, an ka o lajɛ. Balimamuso dɔ min tɔgɔ ye ko Klízia, o ko: “Jɛkuluba jumɛn bɛ u janto kosɛbɛ tulogerenw na, fo ka u magoɲɛfɛnw di u ma alako ta fan fɛ nɔgɔya la nin cogo la? Jehova ka jɛkuluba bɛ fɛn minnu kɛ an ye, o ɲɔgɔn tɛ diɲɛ fan si.” Vladimir ko: “Wideyo ninnu b’a jira ne la ko Jehova bɛ a janto mɔgɔ tɔw la cogo min na minnu bɛ mɛnni kɛ, a bɛ janto tulogerenw fana na o cogo kelen na.”

 Wideyo minnu bɛ dilan bobow ka kanw na, tuma caman na, nin kuma fɔlen bɛ olu kɔnɔ: “Nin wideyo in bɛ kɛ ka Bibulukalan kɛ diɲɛ bɛɛ kɔnɔ. Mɔgɔw ka bolomafara dilenw de bɛ o Bibulukalan baara kɔkɔrɔdon.” Aw bɛ bolomafara minnu di cogoyaw fɛ minnu caman kofɔlen don donate.pr418.com kan, aw ni ce olu kosɔn. Bibuluw ani kalankɛ gafe minnu sinsinnen bɛ Bibulu kan, o bolomafaraw b’a to an ka se ka olu dilan mɔgɔ sugu bɛɛ ye, hali kanw na tulogerenw bɛ minnu faamu.