Zanwuyekalo la san 2021, ɲɛmɔgɔ kulu ye Bibulu kalankɛ gafe kura dɔ bɔ min tɔgɔ ye ko Ɲɛnamaya kɛ nisɔndiya la fo badaa! aO kibaru mɛnni ye mun de kɛ aw la? Matthew o min bɛ bɔ Kanada, o ko: “Ne nisɔndiyara kosɛbɛ! Jɛmukan ni wideyo minnu b’a ɲɛfɔ o gafe in dilanna kun min na ani baara kɛra ni a ye cogo min na walasa k’a dɔn ni a bɛna mɔgɔw dɛmɛ, ne kɛlen ka olu lajɛ, ne ka nisɔndiya bonyana ka ta’a fɛ.”

 Ɲɛnamaya kɛ nisɔndiya la fo badaa! ye gafe ye min bɛ Bibulu kalan kɛcogo kura jira an na. Nka o kalan kɛcogo kura dɔrɔn tɛ danfara ye min bɛ a ni Bibulu kalankɛ gafe tɛmɛnnen tɔw bɔ ɲɔgɔn na. A bɛ se ka kɛ ko i y’a jateminɛ ko ni i magara o gafe papiyelama la, i b’a ye ko a dilancogo ni tɔw tɛ kelen ye. Walasa ka o faamu, an k’a lajɛ gafe in dilanna cogo min na.

 Papiye girinman. Mun na o tun ka kan? Ja kulɛriman minnu bɛ Ɲɛnamaya kɛ nisɔndiya la fo badaa! gafe kɔnɔ, olu ka ca ni ja 600 ye. O jaw ka ca ni Bibulu bɛ min fɔ gafe jaw ye fo siɲɛ 10. O gafe kura in kɔnɔ, yɔrɔ lankolon caman bɛ yen fana fɛn fosi tɛ yɔrɔ minnu na. Nka o ko fila bɛna ni gɛlɛya dɔ ye: Ni papiye ka fɛgɛn kojugu, ja minnu bɛ ɲɛfura kɔfɛla la, olu bɛ ye a fɛ. Walasa o kana kɛ, balima minnu bɛ baara kɛ Baarada la min bɛ sɔrɔ diɲɛ fan bɛɛ sɛbɛnw papiyelama labɔli kama, ni o bɛ Wallkill, New York dugu la, olu ye papiye suguya naani sɛgɛsɛgɛ minnu bɛ yen sisan u ka baarakɛyɔrɔ la. Ɲɛmɔgɔ kulu ka Sɛbɛnnikɛ komite ye o papiyew bɛɛ kelen kelen lajɛ ani ka dɔ sugandi yeli tɛ kɛ min fɛ kosɛbɛ. Tiɲɛ don ko o papiye da ka gɛlɛn dɔɔnin ka tɛmɛn papiyew kan an bɛ an ka gafe tɔw dilan ni minnu ye. Nka o papiye girinman b’a to Bibulukalandenw ka se ka Ɲɛnamaya kɛ nisɔndiya la fo badaa! gafe ɲɛfuraw kalan k’a sɔrɔ u ma o ɲɛfuraw kɔfɛla jaw ye.

 Gafe kɔkanna dilanna ni mana sugu dɔ ye min ni tɔw tɛ kelen ye. Gafe kura in kɔkanna ni gafe tɔw ta tɛ kelen ye bawo a dilanna ni mana sugu kɛrɛnkɛrɛnnen dɔ ye. Gafe tɔw kɔkanna bɛ dilan ni mana sugu dɔ ye min bɛ manamana. Nka gafe kura in kɔkanna dilanna ni mana sugu wɛrɛ ye min tɛ manamana walasa ja min bɛ a kan o ka se ka ye ka ɲɛ. O b’a to fana gafe kana tiɲɛ joona ni baara bɛ kɛ ni a ye tuma bɛɛ. Nka o mana sugu da ka gɛlɛn fo siɲɛ duuru ka tɛmɛn mana tɔw kan minnu bɛ manamana. O de la, tɔn bolofara dɔw farala ɲɔgɔn kan walasa ka o manaw sɔrɔ da nɔgɔn na.

 Mun na o fɛn da gɛlɛnw sugandira? Sɛbɛnw papiyelama labɔli baarada mɔgɔ dɔ ko: “Ikomi an b’a dɔn ko baara bɛna kɛ ni o gafe in ye kosɛbɛ, o de la an y’a dilan ka ɲɛ walasa hali ni baara kɛra ni a ye siɲɛ caman, a kana tiɲɛ.” Eduardo o min bɛ baara kɛ Berezil tɔn bolofara sɛbɛnw papiyelama labɔ yɔrɔ baarada la, o ko: “An nisɔndiyalenba don k’a ye ko Jehova ka jɛkuluba ye baarakɛminɛn ɲumanbaw sugandi walasa ka gafe in cɛɲa, a ka se ka mɛn ani baara ka se ka kɛ ni a ye nɔgɔya la. U ye baara kɛ ni hakilitigiya ye fana ka ɲɛsin bolomafaraw ma.”

 San 2021 Marisikalo la, an y’a daminɛ ka Ɲɛnamaya kɛ nisɔndiya la fo badaa! gafe papiyelama labɔ. O kɛra COVID-19 fiɲɛbana kɔnɔna na, wa o nana ni gɛlɛya caman ye. Balima dɔw bɛ yen minnu bɛ to ka na baara kɛ Betɛli la k’a sɔrɔ u sigilen tɛ yen. O balimaw tun tɛ se ka na baarada mɔgɔw dɛmɛ minnu bɛ sɛbɛnw papiyelama labɔ, tuma min na Betɛli daw tun tugulen don fiɲɛbana kosɔn. An tun tɛ se fana ka balima kuraw ta Betɛli baara la. O kama, baarada min bɛ sɛbɛnw papiyelama labɔ, baarakɛla caman tun tɛ o yɔrɔ la wa o ɲɔgɔnna baarada wɛrɛw fana datugura bawo gofɛrɛnaman ye dan sigi o baaraw la waatinin kɔnɔ.

 An sera ka o gɛlɛyaw ɲɛnabɔ cogo di? O baaradaw dayɛlɛlen kokura, balimakɛ ni balimamuso minnu tun bɛ baara kɛ Betɛli baarada wɛrɛw la, olu bilara ka taa dɛmɛ don sɛbɛnw papiyelama labɔli baarada ye waatinin kɔnɔ. Joel o min bɛ baara kɛ sɛbɛnw papiyelama labɔli baarada la, o ko: “U ye u yɛrɛ di o baara la, wa u sɔnna ka fɛn kuraw dege ni nisɔndiya ye. O y’a to baara min tun ka kan ka kɛ, o sera ka kɛ.”

 Gɛlɛyaw bɛɛ n’a ta, an sera ka Ɲɛnamaya kɛ nisɔndiya la fo badaa! gafe papiyelama miliyɔn caman bɔ ka ban. Walasa ka u dilan, an mago bɛ fɛn caman na i n’a fɔ papiye bɛ labɔ plakiw minnu kan, manaw gafe kɔkanna kama, papiyew, ankiri ani kɔli. Kalo duuru fɔlɔ min na an ye gafe in papiyelama labɔ, an ye dolari wari 2 300 000 ni kɔ de bɔ, ni o bɛ bɛn cfa wari miliyari kelen ni tila ma, ka o don o minɛnw dɔrɔn na. Walasa ka wari dɔ mara, jɛkuluw tun mago bɛ gafe hakɛ min na tigitigi, an ye an jija ka o dɔrɔn de labɔ.

 Bibulu karamɔgɔw ni u ka kalandenw bɛ mun de miiri nin kalankɛ gafe kura in ko la? Paul o min ye balimakɛ dɔ ye min bɛ bɔ Ɔstarali o ko : “Ka kalan kɛ ni mɔgɔ dɔ ye ni Ɲɛnamaya kɛ nisɔndiya la fo badaa! gafe ye, o ka di ne ye kosɛbɛ fo ne kɔrɔtɔlen bɛ kɛ ka kalan ɲɛminɛ ni a ye. Gafe in yecogo cɛ ka ɲi kosɛbɛ wa baro kɛli ka nɔgɔn mɔgɔw fɛ ni a ye. Kunnafoni jɛlen caman b’a kɔnɔ, ɲininkali minnu bɛ dusu don kalanden kɔnɔ, wideyow, jaw, tablow ani kuntilennaw kalanden bɛ se k’a ɲini ka minnu dafa, olu fana b’a kɔnɔ. A dilancogo ɲɛna kosɛbɛ wa o bɛ dusu don ne kɔnɔ ka n’ka kalankɛcogo fisaya.”

 Bibulukalanden dɔ min bɛ Etazuni, ale ko: “Gafe kura in ka di ne ye kosɛbɛ. Jaw bɛ ne dɛmɛ ne ka a yɔrɔ kolomaw faamu. Wideyow bɛ nɔ bila ne dusukun na ani ka dusu don ne kɔnɔ ka o wideyow kumaw waleya.” Nin Bibulukalanden min kofɔra, o bɛ Bibulukalan kɛ siɲɛ fila dɔgɔkun kɔnɔ, ani ka taa jɛkulu ka lajɛw la tuma bɛɛ.

 Ɲɛnamaya kɛ nisɔndiya la fo badaa! gafe miliyɔn caman de tora, an ka kan ka minnu papiyelama labɔ kan caman na. Fo ka se bi ma, Ɲɛmɔgɔ kulu ye yamaruya di walasa gafe in ka bɔ kan 710 na. Bibulu bɛ min fɔ gafe bɔra kan minnu na, nin gafe kura ta cayara ni olu ye ni kan 340 ye!

 An ye o gafe papiyelama bɔli wari sɔrɔ cogo di? O sɔrɔla bolomafaraw de sababu fɛ minnu bɛ di an ka baaraw kama diɲɛ bɛɛ kɔnɔ. O bolomafaraw caman bɛ di cogoyaw fɛ minnu kofɔlen don donate.pr418.com kan. Aw bɛ bololabilalenya min kɛ, aw bɛ fo o kama, o min bɛ an dɛmɛ ka kalankɛ gafew bɔ mɔgɔw ye minnu b’a fɛ ka Jehova dɔn ani ka ‘ɲɛnamaya kɛ nisɔndiya la fo badaa.’—Zaburu 22:27