San 2021 baaraw sen fɛ, a COVID-19 fiɲɛbana tun bɛ ka ta’a fɛ ka mɔgɔw tɔɔrɔ halisa. Barokun min tɔgɔ ye ko “Opérations de secours mondiales pour faire face à la pandémie,” ni o bɛ kuma dɛmɛw kan minnu kɛra diɲɛ fan bɛɛ fiɲɛbana in kosɔn, o barokun kɔnɔ a fɔra ko an ye dolari b wari miliyɔn caman de bɔ walasa ka balimaw dɛmɛ, wa komite 950 de sigira sen kan Kasaaratɔw dɛmɛni kama.

 Fiɲɛbana in tun bɛ ka tiɲɛniba kɛ waati min na, kasaara wɛrɛw fana kɛra. O kasaara dɔw kɛra u yɛrɛ ma ten ani dɔw fana sababu bɔra hadamadenw na. Wa, o kasaaraw ye an balimaw tɔɔrɔ diɲɛ fan bɛɛ. O kasaaraw cɛla, Ɲɛmɔgɔ kulu ka Komitew ka baarako labɛnbagaw ka komite ye a ka yamaruya di walasa miliyɔn 8 ka don kasaara 200 dafɛ ka fara wariw kan minnu tun dira ka ban COVID-19 fiɲɛbana kosɔn. Kasaaraba fila minnu kɛra kɔsa in na, aw y’a lajɛ baara kɛra ni aw ka bolomafaraw ye cogo min na walasa ka kasaaratɔw dɛmɛ.

 San 2021 mɛkalo tile 22, Nyiragongo, o min ye volkan dɔ ye min bɛ Kɔngo (Kinsasa) dugu la, tasumaji poyira ka bɔ o kɔnɔ. O tasumaji ye sow, lakɔliw ani ji marayɔrɔ dɔ tiɲɛ. Nka faratiko wɛrɛ tun bɛ yen min ni o tasumaji tun tɛ kelen ye. Tile caman o kɔ, bugurijɛ min bɛ mɔgɔ bana, o caman wulila Goma dugu la. Dugukolo yɛrɛyɛrɛ fitiniw caman fana kɛra. U y’a fɔ dugukɔnɔmɔgɔw tila bɛɛ ye, ko u ka dugu bila. Mɔgɔ ba caman bolila. Dɔw bolila ka taa fo Ruwanda dugu kɔnɔ.

 O mɔgɔ minnu bolila, Jehova Seere 5 000 ɲɔgɔn tun bɛ olu cɛla. Dɔw bɔnɛna u ka so la tasumaji kosɔn, nsonw donna dɔw fana fɛ yen ka u ka minɛnw bɛɛ ta u taalen kɔfɛ. Dɛmɛni komite min bɛ Ruwanda ani min bɛ Kɔngo (Kinsasa), olu ye baara kɛ ɲɔgɔn fɛ walasa ka mɔgɔw dɛmɛ. Ka ɲɛsin dɛmɛni komite dɔ ka ko kɛlen ma, Kɔngo (Kinsasa) tɔn bolofara y’a fɔ ko: “Tuma min na dugu tun ɲagaminenba tun don ani sani yɛrɛ u k’a fɔ mɔgɔw ye ko u ka boli, komite tun y’a daminɛ ka dumuni, ji, dilanw ani finiw di mɔgɔw ma.” An balima 2 000 ni kɔ ye ɲɔgɔn sɔrɔ dugu dɔ la, yɔrɔ min na dɛmɛni komite mɔgɔw ye finisow jɔ, ka maskiw di mɔgɔw ma ani k’a ɲɛfɔ u ye cogo min na u bɛ se ka u yɛrɛ tanga COVID-19 ni kolera ma.

 Kalo saba kasaara kɛlen kɔ, malo tɔni 6 ni kɔ, kabamugu tɔni 6 ni kɔ, tobilikɛtulu tɔni 3 ni kɔ ani ji tɔni 3 ni kɔ, an balimaw ye o de di kasaaratɔw ma. Walasa ka se ka wari dɔ mara, tɔn bolofara y’a jija ka dumuni caman san o yɔrɔw yɛrɛ la sani u ka dumuni san dugu wɛrɛw la ka na bawo o sɔngɔ ka gɛlɛn.

 Balimamuso dɔ, tasumaji ye min ka so kura tiɲɛ, o y’a fɔ ko: “ An tun farifagalenba don wa an dusu fana tun kasilen don kosɛbɛ.” Nka kɔfɛ, ale ni a ka denbaya ye dɛmɛ sɔrɔ wariko ta fan fɛ, wa dusu fana donna u kɔnɔ u ka to kantigiya la. Sisan a ko: “Ni Jehova ka dɛmɛ ye, an mago bɛ fɛn minnu na, olu bɛ an bolo halisa. An y’a ye ko Jehova bɛ an ka doniw ta cogoya dɔ la ani ka u fɛgɛya an bolo.”

 San caman kɔnɔna na, wariko gɛlɛyaba de kɛra Venezuwela. An balima minnu bɛ yen, olu ka ɲɛnamaya kɛcogo gɛlɛyara kosɛbɛ, dumuniko gɛlɛyaba tun bɛ yen wa binkanniw cayara kosɛbɛ. O ko kɔnɔna na, Jehova ka jɛkuluba ma ɲinɛ u kɔ.

 San 2021 baaraw kɔnɔna na, an ye dolari wari 1 500 000 ni kɔ de bɔ ni o bɛ bɛn sefa wari miliyari kelen ma walasa ka dumuni ni safunɛw san ani k’u lase denbayaw ma minnu tun mago bɛ o fɛnw na. Venezuwela tɔn bolofara mɔgɔw y’a fɔ ko: “A man nɔgɔn ka dumuni tɔni 130 lase jamana yɔrɔ bɛɛ la kalo o kalo ani k’a dɔn ni o dumuniw donna balimaw bolo minnu mago bɛ dɛmɛ la tiɲɛ na.” Walasa o dumuniw kana tiɲɛ joona, tuma caman na, dumuni minnu bɛ mɛn kosɛbɛ k’a sɔrɔ u ma tiɲɛ, balimaw bɛ o de ci. Tɔn bolofara mɔgɔw y’a fɔ tuguni ko: “Ni dumuni minnu bɔlenba don waati min na, an bɛ olu de caman san ɲɔgɔn fɛ bawo u da ka nɔgɔn o waatiw la. Walasa ka o dumuniw lase u seyɔrɔ la, an bɛ u lataga cogoyaw fɛ minnu da ka nɔgɔn kosɛbɛ.”

 Leonel, o min ye Kasaaratɔw dɛmɛni komite mɔgɔ dɔ ye Venezuwela jamana na, o y’a fɔ ko baara min kalifara a ma, ko o baara ka di a ye kosɛbɛ. A ko: “Ka se ka mɔgɔw dɛmɛ, o ye baara kɛrɛnkɛrɛnnenba ye. Ne muso salen kɔfɛ COVID-19 bana kosɔn, o baara kɛrɛnkɛrɛnnen min kalifara ne ma, o kɛra sababu ye ka dusu don ne kɔnɔ. O y’a to ne sigilen ma to ten wa ne sera ka ɲɛ balimaw ma minnu mago bɛ dɛmɛ la. Jehova ye layidu min ta ko a tɛna a ka mɔgɔw bila, ne ye o ye tiɲɛ yɛrɛ la.”

 Balima dɔ, min ye dɛmɛ sɔrɔ, o yɛrɛ fana tun ye baara kɛ dɛmɛni komite dɔ la ka tɛmɛn. A ko: “Sisan, ne de tun mago bɛ dɛmɛ na. U ye fɛnw di an ma nka u ma dan o dɔrɔn ma. Balimaw ye ne ni n’muso dɛmɛ fana an hakili sigilen ka to. U ye u janto an na, ka an dusu saalo ani ka dusu don an kɔnɔ.”

 Kasaara dɔw bɛ yen minnu bɛ cun mɔgɔw kan. Nka ni o kɛra, an balimaw magoɲɛfɛn jɔnjɔnw ye min ye, tuma caman na, Jehova ka jɛkuluba bɛ o fɛnw ɲini ani ka olu lase u ma teliya la. O bɛ se ka kɛ aw ka bolomafaraw de sababu la aw bɛ minnu di an ka baaraw kama diɲɛ bɛɛ kɔnɔ. Aw bɛ olu di cogoya minnu fɛ, olu dɔw kofɔlen don donate.pr418.com kan. Aw ka bololabilalenya ka di an ye kosɛbɛ.