San 1912 zuwɛnkalo tile 1 Tour de Garde y’a fɔ ko: “A bɛ se ka kɛ ko an ka gafew kalanbaga caman bɛ mɔgɔ dɔw dɔn minnu ye fiyentɔw ye. Fiyentɔw bɛ se ka gafew sɔrɔ fu la. . . . O gafe minnu dabɔra fiyentɔw kama, olu sɛbɛnna cogo la ni tomiw ye fiyentɔw bɛ se minnu mɔmɔ ni u bolo ye walasa ka kalan kɛ. K’a dɔn ko hɛrɛ bɛna sigi dugukolo kan, o cikan mɛnni ka di fiyentɔ caman ye.”

 Tuma min na o kumaw sɛbɛnna, braille, ni o ye fiyɛntɔw ka sɛbɛnni ye u bɛ se ka min mɔmɔ ni u bolo ye, o sɛbɛnniw cogoya tun tɛ kelen ye Angilɛ duguw bɛɛ la. O bɛɛ n’a ta, Jehova Seerew tun bɛ baara kɛ ni braille ye walasa ka Bibulu tiɲɛ kumaw jɛnsɛn. Wa halibi, an bɛ ka o de kɛ! Gafe minnu bɛ an bolo braille la, olu bɛ kan minnu na, o ka ca ni kan 50 ye. U bɛ dilan cogo di?

 Fɛn fɔlɔ min ka kan ka kɛ walasa ka gafew dilan braille la, o ye ka siginidenw yɛlɛma k’u kɛ braille siginidenw sɛbɛn cogo ye. Baara bɛ kɛ sɛbɛnniw kan baarada min na Patterson, New York, Michael Millen o min bɛ baara kɛ yen, o y’a fɔ ko: “Fɔlɔ la, an tun bɛ baara kɛ ni porogaramu feeretaw de ye walasa ka siginiden ninnu yɛlɛma ka u kɛ braille sɛbɛn cogo ye, nka an tun mago bɛ ka o yɛlɛmali kɛ kan minnu na, o kanw bɛɛ tun tɛ sɔrɔ o porogaramuw kɔnɔ. Sisan, an bɛ baara kɛ ni Watchtower Translation System de ye, o min bɛ siginidenw yɛlɛma ka kɛ braille ye kan caman na. Ne bolo, o porogaramu in ɲɔgɔn tɛ yen.”

 An ka gafe minnu bɛ braille la, olu kɔnɔ, sɛbɛnniw dɔrɔn tɛ yen nka jaw fana ɲɛfɔlen don u kɔnɔ. Misali la, an ka gafe min tɔgɔ ye ko Ɲɛnamaya kɛ nisɔndiya la fo badaa!, ja min bɛ o ɲɛ fɔlɔ kan, o ɲɛfɔlen bɛ tan cogo la: “Cɛ dɔ bɛ ka taama sira dɔ kan min jɛngɛn-jɛngɛnnen don, wa o sira kɛrɛfɛlaw la, filɛri, jiri, tintin, ani kulu cɛɲumanbaw bɛ yen.” Jamshed o min ye diinɛ maakɔrɔw kankɔrɔsigi dɔ ye ani tutigɛbaga fana, ikomi ale ye ɲɛfiyentɔ ye, a ko: “Ɲɛfɔli minnu bɛ to ka kɛ jaw kan, olu ka di ne ye kosɛbɛ.”

 Siginidenw yɛlɛmalen kɔ ka u kɛ braille siginidenw sɛbɛn cogo ye, o sɛbɛnw bɛ bila ka taa tɔn bolofaraw la, olu minnu bɛ u bila papiye kan, ka tomiw kɛ u la cogo la fiyentɔw bɛ se ka u mɔmɔ cogo min na walasa ka kalan kɛ. U bɛ o tomiw sigi papiye girinmanw kan walasa u kana sɔgɔ u dilantɔ ani tomiw kana bɔ papiye kan hali ni fiyentɔw ye u mɔmɔ siɲɛ caman. O kɔ, u bɛ o papiyew fara ɲɔgɔn kan, ka u kɛ gafe kelen ye ani ka u ci jɛkulu gafe tɔw nɔfɛ walima ka u ci fu pɔsti la, yɔrɔ min dabɔra fiyentɔw kama ni o bɛ sɔrɔ pɔsti min na. Tuma dɔw la, tɔn bolofaraw bɛ o gafew ci cogo teliman na walasa balima minnu fiyennen don ani minnu tɛ yeli kɛ ka ɲɛ, olu ka se ka u ka gafew sɔrɔ joona jɛkulu lajɛw kama.

 O baaraw bɛɛ bɛ waati caman ta ani wariba de bɛ bɔ walasa ka o baaraw kɛ. Misali la, an bɛ waati min ta walasa ka Bibulu 50.000 dilan mɔgɔ tɔw ye, an bɛ o waati kelen ɲɔgɔn de ta walasa ka Bibulu fila dɔrɔn dilan braille sɛbɛn cogo la fiyentɔw ye. Gafe 25 de bɛ Bibulu braillelama kelen kelen bɛɛ kɔnɔ Angilɛkan na, wa walasa ka o Bibulu dilan, o da ka ca fo siɲɛ 123 ka tɛmɛn mɔgɔ tɔw ka Bibulu dilanni kan. O gafe 25 ninnu minnu bɛ bɛn Bibulu kelen dɔrɔn ma braille la, olu ɲɛfɛla ni u kɔfɛla dɔrɔn dilanni sɔngɔ bɛ bɛn dolari wari 150 de ma ni o ye sefa wari 98.000 ɲɔgɔn ye.

 Mɔgɔ minnu bɛ u sen don braille dilanni na, olu bɛ mun de miiri u ka baara la? Nadia, o min bɛ baara kɛ Afriki worodugu yan fan fɛ tɔn bolofara la, o y’a fɔ ko: “An balima minnu ye fiyentɔw ye ani minnu tɛ yeli kɛ ka ɲɛ, kow man nɔgɔn olu bolo. O la, ka se ka fɛn dɔ kɛ u ye min bɛ u dɛmɛ, o ye koɲumanba de ye. A jɛlen don ko Jehova bɛ u kanu kosɛbɛ.”

 Ni fiyentɔ dɔ tɛ se ka braille sɛbɛn cogo kalan, o ko bɛ kɛ cogo di? A bɛ san damadɔ bɔ, an ye gafe dɔ bɔ angilɛkan na min tɔgɔ ye ko Learn to Read Braille, ni o kɔrɔ ye ko ‘braille kalanni dege.’ Wa braille sɛbɛn cogo bɛ o gafe kɔnɔ ani mɔgɔ minnu bɛ yeli kɛ, olu fana ka sɛbɛn cogo bɛ a kɔnɔ. O gafe dilanna cogo la, walasa mɔgɔ min bɛ yeli kɛ, o ka se ka fiyentɔ dɔ dɛmɛ ka braille dege. Gafe in ni fɛn dɔw bɛ ɲɔgɔn fɛ, fiyentɔw bɛ se ka baara kɛ ni minnu ye walasa ka sɛbɛnni kɛ braille la. Mɔgɔ min bɛ braille dege, o bɛ se ka baara kɛ ni o fɛnw ye walasa ka siginidenw sɛbɛn a yɛrɛ ye ni tomiw ye braille sɛbɛn cogo la. Ni a bɛ o tomiw kɛ braille sɛbɛn cogo la, o b’a to a hakili ka to siginidenw kelen kelen bɛɛ la ani k’a dɛmɛ ka o siginidenw dɔn ka ɲɛ a kɛtɔ ka u mɔmɔ.

 Balima minnu fiyennen don ani minnu tɛ yeli ka ɲɛ, olu bɛ nafa jumɛn sɔrɔ gafew la minnu bɛ braille la? Ernst, o min bɛ Ayiti, ale tun bɛ to ka taa lajɛw la k’a sɔrɔ gafe fosi tun tɛ a bolo braille la. O la, walasa ka se ka a ka tɛmuw kɛ ani ka jaabiw di lajɛw sen fɛ, a tun ka kan ka o kumaw bɛɛ to a hakili de la. A ko: “Sisan kɔni, ne bɛ se ka n’bolo kɔrɔta ka jaabiw di waati bɛɛ. Wa, ikomi ne ni balima tɔw bɛɛ bɛ dumuni kelen in de sɔrɔ alako ta fan fɛ, ne b’a ye sisan ko an gɛrɛlen bɛ ɲɔgɔn na kosɛbɛ!”

 Jan, o min ye diinɛ maakɔrɔ ye Otrisi, o bɛ Tour de Garde kalan ani jɛkulu ka Bibulukalan ɲɛminɛ, wa a tɛ yeli kɛ ka ɲɛ. A ko: “Kuma minnu bɛ an ka gafew kɔnɔ braille la, olu jɛlen don ne ɲɛkɔrɔ kosɛbɛ ka tɛmɛn gafe wɛrɛw kan minnu bɛ braille la. Misali la, ɲɛfuraw nimero bɛ sɔrɔ u kɔnɔ, duguma sɛbɛnniw b’u kɔnɔ minnu sɔrɔli ka nɔgɔn ani ɲɛfɔli minnu kɛlen bɛ jaw kan, olu faamuya ka di.”

 Seon-ok, o min ye tutigɛbaga ye Kore worodugu yan fan fɛ, ale fiyennen don, wa a tulo fana gerennen don. Fɔlɔ, walasa a ka lajɛw kumaw faamu, fo dɔ de tun ka olu ɲɛfɔ a ye signes tactile sababu fɛ, o min ye kan sugu dɔ ye min bɛ faamu mɔgɔ wɛrɛ tɛgɛw mɔmɔli fɛ, nka sisan a kelen bɛ se ka gafew kalan minnu sinsinnen Bibulu kan braille la. A ko: “Gafe tɔ minnu bɛ braille la, olu kalanni ka gɛlɛn bawo siginiden tomilama dɔw b’u jɛ, u siraw tilennen tɛ, wa u bɛ dilan ni papiye minnu ye, olu ka fɛgɛn kojugu. Nka Jehova Seerew bɛ gafew dilan braille la ni papiye girinmanw ye, wa u bɛ siginiden tomilamaw bila o papiyew kan cogo ɲuman na. O b’a to a kalanni bɛ nɔgɔya ne bolo kosɛbɛ ne kɛtɔ ka u mɔmɔ. Fɔlɔ, gafe minnu sinsinnen bɛ Bibulu kan, walasa ne ka se ka olu faamu, fo mɔgɔ wɛrɛw de tun ka ne dɛmɛ. Nka sisan kɔni, ne kelen bɛ se ka kalan kɛ n’yɛrɛ ye. Ka se ka lajɛw labɛn dɔgɔkun o dɔgɔkun ani ka jaabiw di lajɛw sen fɛ, o ye ko ye min bɛ ne nisɔndiya kosɛbɛ. Gafe fɛn o fɛn bɛ braille la, ne bɛ olu bɛɛ kalan. Tiɲɛ na, ne tɛ se ka ɲɛ u kɔ.”

 I n’a fɔ an ka gafe tɔw, nin kumasen bɛ an ka gafew fana kɔnɔ minnu bɛ braille la: “Nin sɛbɛn tɛ feere. A bɛ kɛ ka Bibulukalan kɛ diɲɛ bɛɛ kɔnɔ. Mɔgɔw ka bolomafara dilenw de bɛ o Bibulukalan baara kɔkɔrɔdon.” Aw bɛ o bolomafara sugu minnu di cogoyaw fɛ minnu kofɔlen bɛ donate.pr418.com kan, aw ni ce olu la. Aw ka bololabilalenya b’a to gafew minnu sinsinnen bɛ Bibulu kan, olu ka se ka dilan bɛɛ ye hali fiyentɔw ani mɔgɔ minnu tɛ yeli kɛ ka ɲɛ.