KALANSEN 20

Jɛkulu labɛnnen bɛ cogo min na

A BILA A LA

Jehova tɛ ko ferekelenw ka Ala ye. (1 Kɔrɛntekaw 14:33) O la, an bɛ se ka sigi n’a ye ko a ka mɔgɔw bɛ kɛ mɔgɔw ye minnu ka kow labɛnnen don. Krecɛn jɛkulu labɛnnen bɛ cogo di? An bɛ se ka mun kɛ walasa o ka ta’a fɛ ka ɲɛ?

1. Jɔni de ye jɛkulu kuntigi ye?

“Krisita ye egilisi [jɛkulu] kuntigi ye”. (Efesekaw 5:23) A bɛ ka Jehova ka mɔgɔw ka baaraw ɲɛminɛ diɲɛ fan bɛɛ ka a to sankolo la. Yesu ye “jɔnkɛ dannamɔgɔ hakiliman” sigi ni o ye—diinɛ maakɔrɔ kɔgɔlenw alako ta fan fɛ kulu fitinin dɔ ye. O kulu fitinin in de fana bɛ wele Ɲɛmɔgɔ Kulu. (Matiyu 24:45-47 kalan.) Iko an san kɛmɛ fɔlɔ cidenw ani diinɛ maakɔrɔ minnu tun bɛ Jerusalɛm, Ɲɛmɔgɔ Kulu bɛ bilasiraliw di jɛkuluw ma diɲɛ fan bɛɛ. (Kɛwalew 15:2) Nka o cɛw tɛ an ka jɛkuluba kuntigiw ye. U b’u ɲɛsin Jehova ani a ka Kuma ma walasa ka ɲɛminɛliw sɔrɔ ani u bɛ u majigin Yesu ka kuntigiya kɔrɔ.

2. Diinɛ maakɔrɔw jɔyɔrɔ ye jumɛn ye?

Diinɛ maakɔrɔw ye krecɛn kɔgɔlenw ye alako ta fan fɛ. Cɛw don minnu bɛ Jehova ka mɔgɔw kalan Bibulu sababu fɛ, ka u dɛmɛ ani ka dusu don u kɔnɔ. U tɛ sara u ka baara kosɔn. Nka u bɛ baara kɛ “ni diyaɲe ye ka kɛɲɛ ni Ala sago ye.” U tɛ “o kɛ tɔnɔ jugu kosɔn, nka u bɛ “o kɛ ni ŋaniya ɲuman ye.” (1 Piɛrɛ 5:1, 2) Cidenyabaara magannaw ye cɛw de ye jɛkulu kɔnɔ minnu bɛ diinɛ maakɔrɔw dɛmɛ. Ni waati dɔ kɛra, olu fana bɛ se ka kɛ diinɛ maakɔrɔw ye ni u ye laɲinitaw dafa.

Ɲɛmɔgɔ Kulu bɛ diinɛ maakɔrɔ dɔw sigi ka kɛ kafo lakɔlɔsibagaw ye. Olu bɛ taa bɔ jɛkulu caman na walasa ka ɲɛminɛliw di u ma ani ka dusu don u kɔnɔ. Cɛ minnu ye laɲinitaw dafa ka kɛɲɛ ni Sɛbɛnniw ye, kafo lakɔlɔsibagaw bɛ olu sigi ka u kɛ diinɛ maakɔrɔw ani cidenyabaara magannaw ye.—1 Timote 3:1-10, 12; Tite 1:5-9.

3. Jehova Seerew kelen-kelen bɛɛ jɔyɔrɔ ye jumɛn ye?

Jɛkulu kɔnɔmɔgɔw bɛɛ bɛ “barika da Matigi [Jehova] ye”. Fɔcogo wɛrɛ la, u bɛɛ bɛ Jehova tanu. U b’o kɛ u kɛtɔ ka u sen don jɛkulu ka lajɛw la ani u kɛtɔ ka u sen don waajulibaara la ka kɛɲɛ ni u ka kow cogoyaw ye.—Zaburu 148:12, 13 kalan.

DƆ FARA I KA DƆNNIYA KAN

Yesu ye kuntigi sugu min ye, diinɛ maakɔrɔw bɛ k’a ka misali ladege cogo min na, ani an bɛ se ka Yesu kan minɛ cogo min na ani ka baara kɛ ni diinɛ maakɔrɔw ye, an ka o lajɛ.

4. Yesu ye kuntigi ɲuman ye

Yesu bɛ weleli ɲumanba bila an ma. Matiyu 11:28-30 kalan, o kɔ aw ka baro kɛ nin ɲininkali kan:

Yesu b’a fɛ an ka kɛ cogo di a ka kuntigiya kɔrɔ?

Diinɛ maakɔrɔw bɛ ka Yesu ka misali ladege cogo di? A’ye WIDEYO lajɛ.

WIDEYO: Dugukolo yɛrɛyɛrɛ ye mɔgɔ minnu sɔrɔ Nepal, diinɛ maakɔrɔw bɛ olu dɛmɛ (4:56)

Diinɛ maakɔrɔw ka kan ka u ka baara kɛ cogo min na, Bibulu b’o fɔ ka jɛya.

Esayi 32:2 ani 1 Piɛrɛ 5:1-3 kalan, o kɔ aw ka baro kɛ nin ɲininkaliw kan:

K’a dɔn ko, iko Yesu cogo, diinɛ maakɔrɔw bɛ u jija ka dusu don tɔw kɔnɔ, o bɛ mun kɛ i la?
Diinɛ maakɔrɔw bɛ ka Yesu ladege sira wɛrɛ minnu fɛ, olu dɔw ye jumɛnw ye?

5. Diinɛ maakɔrɔw bɛ misali di

Yesu b’a fɛ diinɛ maakɔrɔw k’u ka jɔyɔrɔ ye cogo di? A’ye WIDEYO lajɛ.

WIDEYO: Diinɛ maakɔrɔw bɛ ɲɛminɛli kɛ! (7:39)

Minnu bɛ ɲɛminɛli kɛ jɛkulu kɔnɔ, olu ka kan ka kow kɛ cogo min na, Yesu ye o sigi sen kan. Matiyu 23:8-12 kalan, o kɔ aw ka baro kɛ nin ɲininkali kan:

Diinɛ maakɔrɔw ka kan ka kow kɛ cogo min na Bibulu ye o fɔ. Ni i ye o ni diinɛ ɲɛmɔgɔ ka ko kɛtaw sanga ɲɔgɔn ma, mun de bɛ i dabali ban?

Diinɛ maakɔrɔw bɛ ta’a fɛ ka u yɛrɛw ani u ka denbaya kɔnɔmɔgɔw kɔgɔ alako ta fan fɛ.
Diinɛ maakɔrɔw b’u janto jɛkulu kɔnɔmɔgɔw bɛɛ la
Diinɛ maakɔrɔw bɛ waajuli kɛ tuma bɛɛ
Diinɛ maakɔrɔw bɛ mɔgɔw kalan. U fana bɛ u sen don yɔrɔ saniyali ani baara wɛrɛw kɛli la

6. An bɛ se k’a bɔ an yɛrɛ la ka diinɛ maakɔrɔw dɛmɛ

Bibulu bɛ kun jɔnjɔn di an ma, min kosɔn a nafa ka bon an ka diinɛ maakɔrɔw dɛmɛ. Heburuw 13:17 kalan, o kɔ aw ka baro kɛ nin ɲininkaliw kan:

Yala a bɛnnen don Bibulu ka dusu don an kɔnɔ an ka an ɲɛminɛbaaw kan minɛ ani ka kolo u ye wa? Mun na e sɔnnen bɛ o ma walima mun na e ma sɔn o ma?

Luka 16:10 kalan, o kɔ aw ka baro kɛ nin ɲininkali kan:

Mun a nafa ka bon an ka diinɛ maakɔrɔw kan minɛ hali fɛnw na, a bɛ iko nafaba tɛ minnu na?

MƆGƆ DƆW B’A FƆ KO: “I mago t’a la ka kɛ diinɛ la.”

E hakili la, mɔgɔ bɛ nafa jumɛnw sɔrɔ n’a bɛ Ala bato ka a to diinɛ dɔ la?

BAKURUBAFƆLI

Yesu de ye jɛkulu kuntigi ye. Diinɛ maakɔrɔw bɛ ka baara kɛ a ka ɲɛminɛli kɔrɔ. An b’a bɔ an yɛrɛ la ka u dɛmɛ bawo u bɛ dusu don an kɔnɔ ani ka misali di an ma.