Ni an bɛ an krecɛn ɲɔgɔnw cɛma, Dawuda ka miirina ɲɔgɔn bɛ kɛ an na ni o ye ko: “Balimaw bɛnnen ka sigi ɲɔgɔn fɛ, o ye ko ɲuman ɲuman de ye, a ka di.” (Zaburu 133:1) An ka kelenya tɛ fɛn ye min bɛ kɛ a yɛrɛ ma ten. An kelen-kelen bɛɛ ka kan an jɔyɔrɔ fa walasa o kelenya ka to an cɛma.

1. Fɛn jumɛn de ɲɔgɔn tɛ yen, ni o bɛ ye Ala ka mɔgɔw cɛma?

Ni i taara an ka lajɛ la jamana wɛrɛ la, i b’a sɔrɔ ko i tɛ se ka o yɔrɔ mɔgɔw ka kumakan faamu, nka a mana kɛ cogo o cogo, i tɛ i yɛrɛ ye iko dunan o yɔrɔ la. Mun na? Ka d’a kan diɲɛ fan bɛɛ, an bɛ baara kɛ ni gafe sugu kelenw de ye walasa ka Bibulukalan kɛ. An bɛ an jija fana ka kanuya jira ɲɔgɔn na. An mana kɛ yɔrɔ o yɔrɔ, an bɛɛ bɛ “Matigi [Jehova] tɔgɔ wele ka baara kɛ a ye ni dusu kelen ye.”​—Sofoni 3:9.

2. I bɛ se ka mun kɛ walasa ka o kelenya yiriwa?

“A’ ye ɲɔgɔn kanu kosɛbɛ ni aw dusukun bɛɛ ye.” (1 Piɛrɛ 1:22) I bɛ se ka o laadilikan waleya cogo di? Sani i ka i sinsin tɔw ka dafabaliyakow kan, jogo ɲuman minnu bɛ u la, i ka i sinsin olu kan. Mɔgɔ minnu ni i ka kow ye kelen ye, kana jɛɲɔgɔnya don i ni olu dɔrɔn cɛ, a ɲini fana ka balimakɛw ani balimamusow dɔn minnu ni i ka kow tɛ kelen ye. I bɛ se ka i jija kosɛbɛ ka mɔgɔw bisigili hakilina suguw bɛɛ bɔ i la.​—1 Piɛrɛ 2:17 kalan. a

3. I bɛ mun de kɛ ni bɛnbaliyako dɔ donna i ni i balima krecɛn dɔ cɛ?

Kelenya bɛ an ni ɲɔgɔn cɛ nka an fana ye mɔgɔ dafabaliw ye. Tuma dɔw la an bɛ don ɲɔgɔn gasi la walima yɛrɛ ka ɲɔgɔn dusu tiɲɛ. O de la Ala ka Kuma b’a fɔ an ye ko: “A’ ye . . . yafa ɲɔgɔn ma”, a b’a fɔ fana ko: “Matigi [Jehova] yafara aw ma cogo min na, aw fana ka yafa ɲɔgɔn ma ten dɛ.” (Kolosekaw 3:13 kalan.) Tuma caman, an bɛ Jehova dusu tiɲɛ, o bɛɛ n’a ta, a bɛ yafa an ma. O de la, a jigi b’a kan ko an fana bɛ yafa an balimaw ma. Ni i y’a jateminɛ ko i ye mɔgɔ dɔ dusu tiɲɛ, i k’a bɔ i yɛrɛ la ka taa o ko ɲɛnabɔ i ni o tigi cɛ.​—Matiyu 5:23, 24 kalan. b

 DƆ FARA I KA DƆNNIYA KAN

4. Se sɔrɔ mɔgɔw bisigili kan

An b’a fɛ ka an balimaw bɛɛ kanu. Nka a bɛ se ka kɛ ko an ka kan ka jijaliba kɛ walasa ka sɔn mɔgɔ dɔw la minnu ni an ka kow tɛ kelen ye. Mun de bɛ se ka an dɛmɛ o kɛli la? Kɛwalew 10:34, 35 kalan, o kɔ aw ka baro kɛ nin ɲininkaliw kan:

• Jehova bɛ sɔn mɔgɔ suguw bɛɛ ka kɛ a Seerew ye. O ka kan ka nɔ jumɛn bila i ka mɔgɔ tɔw yecogo la minnu ni i tɛ bɔ yɔrɔ kelen na?

• Mɔgɔ bisigili sugu jumɛnw de ka ca aw ka yɔrɔ la, i b’a fɛ ka i yɛrɛ tanga minnu ma?

2 Kɔrɛntekaw 6:11-13 kalan, o kɔ aw ka baro kɛ nin ɲininkali kan:

• I hakili la, i bɛ se ka i gɛrɛ kosɛbɛ cogo di balimakɛw ani balimamusow la minnu ni i tɛ bɔ yɔrɔ kelen na?

5. A bɔ i yɛrɛ la ka yafa tɔw ma ani ka kɛ bɛn sigibaga ye

Jehova b’a bɔ a yɛrɛ la ka yafa an ma hali k’a sɔrɔ ale yɛrɛ tɛna ko jugu fosi kɛ minnu na anw b’a fɔ ko an bɛ yafa a ma. Zaburu 86:5 kalan, o  kɔ aw ka baro kɛ nin ɲininkaliw kan:

• Jehova ka yafali fanga ka bon fo ka se hakɛ jumɛn ma?

• Mun na waleɲumandɔn b’i la ka ɲɛsin a ka yafali ma?

• Ko jumɛnw de bɛ se k’a to a bɛ gɛlɛya an bolo ka bɛn kɛ an ni mɔgɔ tɔw cɛ?

An bɛ se ka Jehova ladege cogo di walasa an ni an balimaw ka ta’a fɛ ka to kelenya la? Ntalenw 19:11 kalan, o kɔ aw ka baro kɛ nin ɲininkali kan:

• Ni mɔgɔ dɔ ye i dusu bɔ walima ka i hakɛ ta, i bɛ se ka mun de kɛ walasa ka bɛn kɛ i ni o tigi cɛ?

 Tuma dɔw la, an yɛrɛw de bɛ tɔw hakɛ ta. Ni o kɛra an ka kan ka mun kɛ? A’ye WIDEYO lajɛ, o kɔ aw ka baro kɛ nin ɲininkali kan:

• Nin wideyo kɔnɔ, balimamuso ye mun de kɛ walasa ka bɛn sigi a ni a balimamuso cɛ?

 BAKURUBAFƆLI

I bɛ se ka i sen don kelenya toli la jɛkulu kɔnɔ i kɛtɔ ka yafa ani ka kanuya jira i balimaw bɛɛ la.

Seginnkanni

• I bɛ se ka se sɔrɔ mɔgɔw bisigili kan cogo di?

• I bɛ mun de kɛ ni bɛnbaliyako dɔ donna i ni i balima krecɛn dɔ cɛ?

• Jehova bɛ yafa mɔgɔw ma, mun na i b’a fɛ ka o misali ladege?