Maana 114nan

Kojugu bɛɛ laban

I ƝƐ bɛ mun na yan? I ɲɛ bɛ so jɛmanw na. Nka e k’a lajɛ u bɛ ka bɔ yɔrɔ min na. O sow bɛ ka bɔ sankolo la. U bɛ boli la kabanɔgɔ kan ka jigin. Yala so yɛrɛ-yɛrɛw bɛ sankolo la wa?

Ayi, so yɛrɛ-yɛrɛw tɛ sankolo la. An bɛ o dɔn bawo sow tɛ se ka boli kabanɔgɔw kan. Nka, Bibulu dun b’a fɔ ko sow bɛ sankolo la. Mun na ?

Bibulu bɛ o fɔ bawo fɔlɔ la, mɔgɔw tun bɛ yɛlɛn sow de kan ka taa kɛlɛ kɛ. O la sa, ni Bibulu b’a fɔ ko mɔgɔw bɛ ka sow boli ka bɔ sankolo la, a bɛ o fɔ walisa k’a jira ko Ala bɛna dugukolo kan mɔgɔw kɛlɛ. O kɛlɛ bɛna kɛ yɔrɔ min na, yala i bɛ o tɔgɔ dɔn wa? O bɛ wele ko Harmagedɔn. O kɛlɛ bɛna kɛ walisa ka kojugu bɛɛ ban dugukolo kan.

Yesu bɛna Harmagedɔn kɛlɛ ɲɛminɛ. I kana ɲinɛ ko Jehova ye ale de sugandi ka kɛ A ka gɔfɛrɛnaman masakɛ ye. O de y’a to masakɛ fugula bɛ Yesu kun na. Npanmuru b’a jira ko a bɛna Ala juguw bɛɛ faga. Yala a ka kan ka bala an na ko Ala bɛna mɔgɔjugu bɛɛ halaki wa?

E ka segin i kɔ ka na maana 10nan na. E ɲɛ bɛ mun na o ja la? An ɲɛ bɛ sanjiba la min nana ka mɔgɔjugu bɛɛ halaki. Jɔni de ye o sanjiba lana? Jehova Ala de ye o lana. E ka maana 15nan lajɛ sisan. Mun kɛra yan yɔrɔ la? Tasuma bɔra Ala yɔrɔ ka Sodɔmɛ ni Gomɔrɛ duguw halaki.

Maana 33nan ta. E k’a lajɛ fɛn min ye Misirakaw ka sow ni u ka kɛlɛkɛwotorow sɔrɔ. Ji seginna u kan ka u bɛɛ tunun. Jɔni de ye o kɛ? Jehova don. Jehova ye Misirakaw ka sow ni u ka kɛlɛkɛwotorow halaki walisa ka a ka mɔgɔw lakana. Maana 76nan lajɛ sisan. I ɲɛ bɛ a la ko Jehova y’a to a ka mɔgɔw yɛrɛ, n’o ye Israɛlkaw ye, olu fana ka halaki bawo u ye kojugu kɛ.

O kow kɛlen kosɔn, a man kan ka bala an na ko kɛlɛkɛla minnu bɛ Jehova bolo sankolo la, a bɛna olu bila ka kojugu bɛɛ ban dugukolo kan. O kɔrɔ bɛna kɛ min ye, e ka miiri o la. An ka maana nata ta ka o lajɛ.

Jirali 16:16; 19:​11-16.