YƆRƆ 4NAN

K’a ta Israɛl masakɛ fɔlɔ la ka n’a bila Israɛl ka jɔnya la Babilonɛ

Saul kɛra Israɛl masakɛ fɔlɔ ye. Nka, Jehova banna a la. Jehova ye Dawuda ta ka kɛ masakɛ ye Saul nɔ na. An bɛna fɛn caman ye Dawuda kan. A denmisɛnman ye cɛ janmanjanba dɔ kɛlɛ min tɔgɔ ye ko Goliyati. Kɔfɛ, a bolila masakɛ ɲɛngo Saul ɲɛ. Muso cɛɲi dɔ, n’o ye Abigali ye, o y’a bali a ka kojuguba dɔ kɛ .

O kɔfɛ, an bɛna fɛn caman kalan Dawuda denkɛ Solomani kan, o min kɛra masakɛ ye Dawuda kɔfɛ. Israɛl masakɛ fɔlɔ, a filanan ni a sabanan kelen-kelen bɛɛ ye san 40 kɛ fanga la. Nka, Solomani salen kɔfɛ, Israɛl jamana tilala fila ye: Jamana min bɛ kɔgɔduguyanfan fɛ, ani jamana min bɛ woroduguyanfan fɛ.

Israɛl ka kabila 10 kɛra kɔgɔduguyanfan jamana ye. O jamana ye san 257 kɛ, o kɔfɛ a halakira Asirikaw fɛ. San 133 o kɔfɛ, woroduguyanfan jamana, n’o tun ye Israɛl ka kabila fila ye, o fana halakira. O waati de la Israɛlkaw cɛra ka taa jɔnya la Babilonɛ. O la sa, an bɛna a ye ko gafe Yɔrɔ NAANINAN bɛ kuma dakabanakow kan minnu kɛra san 510 kɔnɔna na.