Maana 68nan

Cɛnin fila lakununna

A KA kɛ i ko den dɔ sara. Ni a seginna kokura ɲɛnamaya la, o bɛna mun kɛ a woloba la? A bɛna nisɔndiya kosɛbɛ dɛ! Nka, yala mɔgɔ salen bɛ se ka ɲɛnamaya kɛ kokura wa? Yala o delila ka kɛ wa?

E ka cɛ ani muso ani cɛnin lajɛ ja kan. Cɛ ye kira Eli ye. Muso cɛ sara. A bɛ bɔ Sarepta dugu la. Cɛnin ye a denkɛ ye. Don dɔ la, cɛnin banana. A ka bana juguyara fo a sara. Eli y’a fɔ muso ye ko: ‘Cɛnin di ne ma.’

Eli ye den su ta ka yɛlɛn ni a ye sanfɛ, sankanso la, ka a da dalan kan. O kɔfɛ, a ye Ala deli ko: ‘O Jehova! A kɛ cɛnin ka ɲɛnamaya kokura.’ Den ye ninakili daminɛ kokura. Eli jiginna ni den ye, k’a fɔ muso ye ko: ‘A filɛ, i den ɲɛnama don!’ O ko de ye cɛnin ba nisɔndiya kosɛbɛ nin cogo la.

Jehova ka kiraba dɔ wɛrɛ fana tun tɔgɔ ko Elise. A tun ye Eli dɛmɛbaga ye. Nka, a waati la, Jehova ye ale fana kɛ baarakɛminɛn ye walisa ka kabakow kɛ. Don dɔ la, Elise taara Sunɛm dugu la. O yɔrɔ la, muso dɔ tun bɛ to k’a ladon ka ɲɛ. Kɔfɛ, o muso ye denkɛ sɔrɔ.

Den kɔrɔbayara tuma min na, a wulila don dɔ sɔgɔma ka taa a fa fɛ foro la. Nka, yɔrɔnin kelen ten dɔrɔn, cɛnin sinna ka kule ko: ‘Ne kun bɛ n dimin!’ U ye cɛnin ta ka taa ni a ye so. Nka u selen so, cɛnin sara. Cɛnin ba dusu kasira kosɛbɛ. O yɔrɔnin bɛɛ la, a ye sira minɛ ka taa Elise nɔfɛ.

Elise sera u ka so tuma min na, den su tun dalen bɛ so min kɔnɔ, a donna yen. A ye Jehova deli, ka tila ka a da den kan. Sɔɔni den fari kalayara. A tisora siɲɛ wolonwula. A ba nana tuma min na ka a ye ko a den ɲɛnama don, a nisɔndiyara kosɛbɛ dɛ!

Mɔgɔ caman-caman sara. O ye u somɔgɔw ni u teriw dusu kasi kosɛbɛ. Se tɛ an ye ka suw lakunun, nka Jehova bɛ se k’o kɛ. Jehova bɛna su miliyɔn caman lasegin ɲɛnamaya la cogo min na, an bɛna o ye kɔfɛ.

1 Masakɛw 17:​8-24; 2 Masakɛw 4:​8-37.