Maana 61nan

Dawuda kɛra masakɛ ye

SAUL y’a ɲini kokura ka Dawuda minɛ. A ka sɔrɔdasi 3 000 minnu tun ka fisa ni u bɛɛ ye, Saul ye olu ta ka taa Dawuda ɲini. Dawuda ye o mɛn tuma min na, a ye mɔgɔ dɔw ci walisa u ka taa a lajɛ, Saul ni a ka mɔgɔw bɛ si yɔrɔ min na. O kɔfɛ, Dawuda y’a fɔ a ka cɛ fila ye ko: ‘Aw la, jɔn bɛna taa ne fɛ Saul siyɔrɔ la?’

Abisayi ko: ‘Ne bɛ taa e fɛ.’ Abisayi ye Dawuda balimamuso Zeruja denkɛ ye. Saul ni a ka mɔgɔw bɛ sunɔgɔ la tuma min na, Dawuda ni Abisayi donna dɔɔnin-dɔɔnin o yɔrɔ la yen. U ma mankan si bɔ. Saul ka tama ni a ka jidaganin min tun bɛ a kun kɔrɔ, Dawuda ni Abisayi ye olu ta ka taa. Mɔgɔ si ma u ye, mɔgɔ si ma u mankan mɛn. U bɛɛ tun bɛ sunɔgɔba la.

E ka Dawuda ni Abisayi lajɛ sisan. U sera yɔrɔ jan. Fɛn fosi tɛ se k’u sɔrɔ kulu kunna yen. O la sa, Dawuda y’i pɛrɛn u fan fɛ, k’a fɔ Israɛl sɔrɔdasi kuntigi ye, ko: ‘Abnɛr, mun na i ma matigi kɔlɔsi? A dayɔrɔ lajɛ. A ka tama ni a ka jidaganin bɛ min?’

Saul kununna ka bɔ sunɔgɔ la. A ye Dawuda kumakan dɔn. A ko: ‘Yala e don wa Dawuda?’ I ɲɛ bɛ Saul ni Abnɛr la dugumana na yan wa?

 Dawuda ye Saul jaabi ko: ‘Ɔwɔ, ne don, ne matigi ni ne ka masakɛ. Mun na i b’a ɲini ka ne minɛ? Ne ye kojugu jumɛn de kɛ? I ka tama filɛ masakɛ. Cɛ dɔ bila a ka na a minɛ.’

Saul sɔnna a ma ko ale ye ko bɛnbali kɛ. A ko: ‘Ne ye hakilintanyako kɛ.’ O la sa, Dawuda taara a ka sira fɛ, Saul fana seginna a ka so. Nka, Dawuda y’a fɔ a yɛrɛ kɔnɔ ko: ‘Ni ne ma boli ka taa Filisitikaw fɛ, Saul bɛna ne faga don dɔ la.’ Dawuda ye o de kɛ. A bolila ka taa Filisitikaw ka jamana na. Dawuda selen Filisitikaw fɛ, a sera k’u lafili. A y’u bila ka miiri ko ale bɛ olu de fan fɛ sisan.

Kɔfɛ, Filisitikaw yɛlɛnna ka taa Israɛl kɛlɛ. Saul ni Jonatan fila bɛɛ sara o kɛlɛ la. O ye Dawuda dusu kasi kosɛbɛ. A ye dɔnkili cɛɲi dɔ sɛbɛn. A y’a fɔ o dɔnkili kɔnɔ ko: ‘Ne dusu kasira i kosɔn, ne balimakɛ Jonatan. I ko diyara ne ye kosɛbɛ!’

O kɔfɛ, Dawuda seginna Israɛl jamana na. A taara sigi Hebɔrɔn dugu kɔnɔ. Mɔgɔ minnu tun ye Saul denkɛ Isbosɛt ta ka kɛ masakɛ ye, ani mɔgɔ minnu ye Dawuda ta ka kɛ masakɛ ye, olu wulila ka kɛlɛ kɛ. Dawuda ka mɔgɔw sera Saul denkɛ ka mɔgɔw la. O la sa, Dawuda kɛra masakɛ ye. A si tun ye san 30 ye. San wolonwula ni tila kɔnɔ, a kɛra masakɛ ye Hebɔrɔn dugu kɔnɔ. A den dɔw wolola yen. Olu tɔgɔw ye ko Amnɔn, Absalɔm ani Adonija.

Waati sera, Dawuda ni a ka mɔgɔw taara dugu cɛɲi dɔ minɛ min tɔgɔ ye ko Jerusalɛm. Joab min tun ye Dawuda balimamuso Zeruja den dɔ wɛrɛ ye, ale de ye kɛlɛ ɲɛminɛ. O kosɔn, Dawuda ye Joab ladiya, k’a kɛ a ka sɔrɔdasi kuntigi ye. Dawuda ye mara daminɛ sisan Jerusalɛm dugu kɔnɔ.

1 Samuɛl 26:​1-25; 27:​1-7; 31:​1-6; 2 Samuɛl 1:26; 3:​1-21; 5:​1-10; 1 Tilew kibaru 11:​1-9.