Maana 62nan

Dawuda ka du ye bɔnɛ sɔrɔ

DAWUDA kɛlen kɔ ka mara daminɛ Jerusalɛm dugu kɔnɔ, Jehova y’a kɛ Dawuda ka sɔrɔdasiw ka se u juguw la siɲɛ caman. Jehova tun ye layidu ta ko a bɛna Kanan jamana di Israɛlkaw ma. Sisan, Jehova ye u dɛmɛ fo jamana yɔrɔ bɛɛ labanna ka kɛ Israɛlkaw ta ye.

Dawuda tun ye masakɛ ɲuman ye. A tun bɛ Jehova fɛ. O kosɔn, a kɛlen kɔ ka Jerusalɛm minɛ, a ye fɛn fɔlɔ minnu kɛ, olu dɔ la kelen kɛra ka Jehova ka layidu wagande lana Jerusalɛm dugu kɔnɔ. Dawuda tun b’a fɛ ka Alabatoso dɔ jɔ walisa ka layidu wagande bila o kɔnɔ.

Nka, Dawuda kɔrɔtuma na, a ye kojuguba dɔ kɛ. A tun b’a dɔn ko a man ɲi ka mɔgɔ wɛrɛ ka fɛn ta. Nka, don dɔ wulada fɛ, k’a to a ka palɛ sanfɛ, a ye dugumana lajɛ, ka muso cɛɲi dɔ ye min tɔgɔ ye ko Batseba. Batseba cɛ tɔgɔ ye ko Uri. Uri tun ye Dawuda ka sɔrɔdasi dɔ de ye.

Dawuda ɲɛbɔra Batseba fɛ fo a y’a lana a ka palɛ kɔnɔ. Batseba cɛ tun taara kɛlɛkɛyɔrɔ la. Dawuda dara Batseba fɛ. Kɔfɛ, Batseba y’a ye ko a kɔnɔma don. Dawuda jɔrɔla kosɛbɛ. A ye ci bila a ka sɔrɔdasi kuntigi ma, n’o ye Joab ye, ko a ka Uri bila kɛlɛ ɲɛfɛ, a bɛ se ka faga yɔrɔ min na. Joab y’a kɛ ten. Uri sara kɛlɛkɛyɔrɔ la. O kɔfɛ, Dawuda ye Batseba furu.

Jehova diminna kosɛbɛ Dawuda kɔrɔ. O de la, Jehova ye a ka baarakɛden Natan ci Dawuda ma, walisa k’a jira Dawuda la ko a ye jurumu kɛ. I ɲɛ bɛ Natan de la ja kan ka kuma Dawuda fɛ. Dawuda nimisara kosɛbɛ a ka jurumuw la. O kosɔn, Jehova ma a faga. Nka, Jehova ko: ‘Ikomi i ye nin kojuguw kɛ, i bɛna bɔnɛ caman sɔrɔ i ka du kɔnɔ.’ A kɛra ten dɛ !

A fɔlɔ kɛra ko Batseba denkɛ sara. O kɔfɛ, Dawuda denkɛ fɔlɔ Amnɔn y’a dɔgɔmuso Tamar diyagoya ka da a fɛ. O ko ye Dawuda denkɛ Absalɔm dusu bɔ kosɛbɛ fo a ye Amnɔn faga. O kɔfɛ, Absalɔm  y’a yɛrɛ kodiya mɔgɔ caman ye, ka tila ka a yɛrɛ kɛ masakɛ ye. Nka a laban na, Dawuda sera Absalɔm na kɛlɛ la. Absalɔm fagara. Tiɲɛ yɛrɛ la, Dawuda ye tɔɔrɔ caman sɔrɔ.

Nka, o kow kɔnɔna na, Batseba ye denkɛ wɛrɛ sɔrɔ min tɔgɔ ye ko Solomani. Tuma min na Dawuda kɔrɔlen dalen bɛ bana bolo, a denkɛ Adonija y’a ɲini k’a yɛrɛ kɛ masakɛ ye. O kosɔn, Dawuda y’a fɔ sarakalasebaga ye min tɔgɔ ye ko Zadɔk, ko a ka tulu bɔn Solomani kunkolo kan, walisa k’a jira ko Solomani de bɛna kɛ masakɛ ye ale kɔ. A ma mɛn o kɔfɛ, Dawuda sara k’a si to san 70 la. A ye mara kɛ san 40 kɔnɔ. Solomani kɛra Israɛl masakɛ ye sisan.

2 Samuɛl 11:​1-27; 12:​1-18; 1 Masakɛw 1:​1-48.