Maana 58nan

Dawuda ni Goliyati

FILISITIKAW nana Israɛl kɛlɛ kokura. Dawuda kɔrɔkɛ saba minnu ka kɔrɔ ni u bɛɛ ye, olu ye Saul ka sɔrɔdasi dɔw ye. Don dɔ la, Jese ko Dawuda ma: ‘Sumankisɛ ni nburu ta i kɔrɔkɛw ye, i ka taa a lajɛ ni u ka kɛnɛ.’

Dawuda sera tuma min na sɔrɔdasiw ka yɔrɔ la, a bolila ka taa kɛlɛda la k’a kɔrɔkɛw ɲini. Filisitikaw ka cɛ janmanjanba bɔra ka yɛlɛ Israɛlkaw ma. A tun bɛ o kɛ don o don, sɔgɔma ni wula, tile 40 kɔnɔ. A tun bɛ pɛrɛn k’a fɔ ko: ‘Aw ka mɔgɔ kelen ɲɛnatɔmɔ aw ka cɛw la, o ka na an ka kɛlɛ kɛ. Ni a sera ne la ka ne faga, an bɛna kɛ aw ka jɔnw ye. Nka, ni ne sera o tigi la, k’a faga, aw bɛna kɛ an ka jɔnw ye. Ne bɛ o kɛlɛ tigɛ aw ma tigitigi. Ni aw bɛ se, aw ka dɔ ɲɛnatɔmɔ a ka na an ka kɛlɛ kɛ.’

Dawuda tun bɛ sɔrɔdasi minnu kɛrɛfɛ, a ye olu ɲininka ko: ‘Mɔgɔ min bɛna nin Filisitika faga, ka maloya bɔ Israɛl kunna, o tigi bɛna mun sɔrɔ?’

U y’a jaabi ko: ‘Saul bɛna nafolo caman di o tigi ma. A bɛna a denmuso fana di o tigi ma furumuso ye.’

Nka, Israɛlkaw bɛɛ tun bɛ siran Goliyati ɲɛ, bawo a tun ka bon kosɛbɛ. A janya tun bɛ taa mɛtɛrɛ 3 ɲɔgɔn na. Sɔrɔdasi dɔ fana tun b’a ɲɛfɛ min b’a ka nɛgɛbɛnnan minɛ.

Sɔrɔdasi dɔw taara a fɔ Masakɛ Saul ye ko Dawuda b’a fɛ ale ni Goliyati ka kɛlɛ kɛ. Nka, Saul ko Dawuda ma: ‘I tɛ se ka nin Filisitika kɛlɛ. I ye denmisɛn ye, ale dun y’a ka ɲɛnamaya bɛɛ kɛ kɛlɛkɛ  la.’ Dawuda ye Saul jaabi ko: ‘Ursiwara ni waraba tun nana ne fa ka saga minɛ, nka ne ye olu faga. Nin Filisitika bɛna kɛ i ko olu dɔ la kelen. Jehova bɛna ne dɛmɛ.’ O la sa, Saul ko: ‘Taa. Jehova ka fara i kan.’

Dawuda taara kɔ dɔ la, ka kabakurun nugulen duuru ɲini, k’olu bila a ka bɔrɛ kɔnɔ. A tilala ka a ka kabakurun-bonnan ta ka taa cɛ janmanjanba kunbɛn. Goliyati y’a ye tuma min na, a ma se ka da a la. A kɛra a kɔnɔ ko a tun tɛna gɛlɛya a bolo hali dɔɔnin ka Dawuda faga.

Goliyati ko: ‘E ka na ne ma dɔrɔn. Ne bɛna i farisogo di kɔnɔninw ni baganw ma u k’a dun.’ Nka, Dawuda ko: ‘I bɛ na ne ma ni npan ni tama ni kala ye. Nka, ne bɛ na i ma ni Jehova Ala tɔgɔ ye. Jehova bɛna i don ne bolo bi. Ne na i faga.’

O la sa, Dawuda bolila ka Goliyati kunbɛn. A ye kabakurun kelen ta a ka bɔrɛ kɔnɔ, k’o don a ka kabakurun-bonnan kɔnɔ, k’o fili ni a fanga bɛɛ ye. Kabakurun sinna ka taa don Goliyati kunkolo kɔnɔ ten. O yɔrɔnin bɛɛ la, Goliyati binna duguma ka sa. Filisitikaw y’a ye ko u ka sɔrɔdasi ŋana binna minkɛ, u bɛɛ ye u kɔdon ka boli. Nka, Israɛlkaw ye u gɛn, ka se u la.

1 Samuɛl 17:​1-54.