Maana 76nan

Jerusalɛm dugu cira

A KA ca ni san 10 ye ko masakɛ Nebukadnezar ye Israɛlkaw bɛɛ cɛ minnu kalannen bɛ kosɛbɛ ka taa ni u ye Babilonɛ. Ko min bɛ ka kɛ sisan, e ka o lajɛ! Jerusalɛm dugu de bɛ ka jeni ka ban pewu. Israɛlka minnu ma faga, olu minɛna ka taa Babilonɛ.

I hakili jigin ko Jehova ka kiraw tun ye kangari da Israɛlkaw ye, ko ni u ma u ka sirajuguw bila, nin ko tun bɛna u sɔrɔ. Nka, Israɛlkaw ma kiraw lamɛn. U ma sɔn ka Jehova bato. U ye boliw bato ka taa a fɛ. O kosɔn, u tun ka kan ka ɲangi. An bɛ o dɔn bawo Israɛlkaw tun ye kojugu minnu kɛ, Ala ka kira Ezekiɛl ye olu fɔ an ye.

I b’a dɔn Ezekiɛl ye jɔni ye wa? Nebukadnezar ye kamalennin minnu cɛ ka taa ni u ye Babilonɛ, san 10 sani Jerusalɛm dugu ka ci, Ezekiɛl ye o kamalennin dɔ de ye. O waati kelen de fana na, Daniɛl ni a teri saba Sadrak ni Mesak ani Abɛd-Nego cɛra ka taa Babilonɛ.

Ka Ezekiɛl to Babilonɛ, Jehova y’a jira a la kojugu minnu bɛ ka kɛ Alabatoso kɔnɔ Jerusalɛm. O tun ye Jehova ka kabako kɛlen de ye, bawo tiɲɛ na, Ezekiɛl tun bɛ Babilonɛ, nka fɛn minnu tun bɛ ka kɛ Alabatoso kɔnɔ Jerusalɛm, Jehova ye o fɛnw bɛɛ jira a la. Ezekiɛl ye ko minnu ye, olu tun ye ko cɛjugubaw ye!

Jehova y’a fɔ Ezekiɛl ye ko : ‘E k’a filɛ Israɛlkaw bɛ ka ko haramulen minnu kɛ Alabatoso kɔnɔ. E k’a lajɛ kogow falen bɛ saw ni bagan wɛrɛw jaw la cogo min na. E ka Israɛlkaw lajɛ k’o fɛnw bato.’ Ezekiɛl ye o fɛnw bɛɛ ye, ka tila ka olu sɛbɛn.

Jehova tilala ka Ezekiɛl ɲininka ko: ‘Israɛl kuntigiw bɛ ka fɛn min kɛ dogo la, i ɲɛ bɛ o la wa?’ Ezekiɛl ye o fana ye. U cɛ 70 tun bɛ ka boliw bato. U tun bɛ k’a fɔ ko: ‘Jehova ɲɛ tɛ an na. Jehova ye jamana bila.’

O kɔfɛ, muso minnu tun bɛ Alabatoso saheliyanfan donda la,  Jehova ye olu fana jira Ezekiɛl la. U tun sigilen bɛ o yɔrɔ la ka boli dɔ bato min tɔgɔ ko Tamuz. Cɛ minnu tun bɛ Jehova ka Alabatoso donda la, Jehova ko Ezekiɛl ka olu fana lajɛ. U tun hakɛ ye cɛ 25 ɲɔgɔn de ye. U tun bɛ ka u biri k’u ɲɛsin kɔrɔn ma walisa ka tile bato.

Jehova ko: ‘Nin mɔgɔw tɛ ne bonya hali dɔɔnin. U tɛ dan kojugukɛ dɔrɔn ma. U bɛ na fo ne ka batoso laka nin fɛnw kɛ.’ O kosɔn, Jehova y’a fɔ ko: ‘Ne diminnen bɛ ka se hakɛ min na, u bɛna o dɔn. U halakituma na, ne tɛna hinɛ u la hali dɔɔnin.’

Israɛlkaw tun bɛ ka o fɛn minnu kɛ, Jehova ye olu jira Ezekiɛl la kaban tuma min na, san saba ɲɔgɔn o kɔfɛ, Israɛlkaw murutira masakɛ Nebukadnezar ma. O kosɔn, Nebukadnezar wulila ka taa u kɛlɛ. San kelen ni tila tɛmɛnen kɔfɛ, Babilonɛkaw ye Jerusalɛm kogobaw sɔgɔ, ka don o wow fɛ, ka dugu bɛɛ jeni. Jerusalɛm mɔgɔ fanba fagara, walima u minɛna ka taa Babilonɛ.

Mun na Jehova y’a to nin kojuguba ka Israɛlkaw sɔrɔ? Nin ko ye olu sɔrɔ, bawo u ma Jehova ka kuma mɛn, u ma tugu a ka sariyaw kɔ. Nin ko b’a jira an na ko a nafa ka bon kosɛbɛ an ka tugu tuma bɛɛ Jehova ka kuma kɔ.

A daminɛ na, masakɛ Nebukadnezar ye yamaruya di mɔgɔ damadɔw dɔrɔn ma u ka to Israɛl jamana kɔnɔ. A ye Gedaliya bila o mɔgɔw kunna. Gedaliya tun ye Yahutu ye. Nka, Israɛlka dɔw tilala ka Gedaliya faga. Ikomi o kojugu kɛra, mɔgɔw siranna ko Babilonɛkaw ka na ka u bɛɛ halaki. O kosɔn, u bɛɛ bolila ka taa Misira. U ye Jeremi diyagoya ka taa u fɛ.

Mɔgɔ si tun tɛ Israɛl jamana kɔnɔ tun. San 70 kɔnɔ, mɔgɔ si ma sigi jamana kɔnɔ. A lankolonba tora ten. Nka, Jehova ye layidu ta ko ni san 70 tɛmɛna, ale bɛna a ka mɔgɔw lasegin jamana kɔnɔ. O san 70 kɔnɔna na, mun ye Ala ka mɔgɔw sɔrɔ Babilonɛ? An k’o lajɛ ɲɔgɔn fɛ.

2 Masakɛw 25:1-26; Jeremi 29:10; Ezekiɛl 1:1-3; 8:1-18.