Maana 67nan

Josafat dara Jehova la

YALA i b’a dɔn nin cɛw ye jɔni ye wa? I b’a dɔn u bɛ ka min kɛ wa? U bɛ ka taa kɛlɛ de la. Cɛ minnu bɛ ɲɛfɛ, olu bɛ ka dɔnkili da. Nka, i bɛ se k’i yɛrɛ ɲininka ko: ‘Mun na npanw ni tamaw tɛ u bolo?’ An k’o lajɛ ɲɔgɔn fɛ.

Josafat ye Israɛl ka kabila fila masakɛ ye. Masakɛ Akab ni Jezabɛl bɛ Israɛl ka kabila 10 kunna. Josafat ni olu tun ye waati kelen mɔgɔw ye. Nka, Josafat tun ye masakɛ ɲuman ye. A fa Asa fana tun ye masakɛ ɲuman ye. O la sa, kabila fila mɔgɔw ye u ka ɲɛnamaya kɛ hɛrɛ la san caman kɔnɔ.

Nka, fɛn dɔ kɛra sisan min ye jamana kɔnɔmɔgɔw lasiran kosɛbɛ. Cidenw nana a fɔ Josafat ye ko: ‘Kɛlɛbolo belebeleba natɔ don ka bɔ Moab ani Amɔn ani Seir kulu la, walisa ka na i kɛlɛ.’ O la sa, Israɛlka caman nana u lajɛ Jerusalɛm walisa ka Jehova ka dɛmɛ ɲini. U taara Alabatoso la. O yɔrɔ la yen, Josafat ye Ala deli ko: ‘O  Jehova, an ka Ala, an t’a dɔn an ka kan ka min kɛ. Barika si tɛ an na ka nin jamaba kɛlɛ. An b’an ɲɛsin i ma walisa i k’an dɛmɛ.’

Jehova ye o delili lamɛn. A ye a ka baarakɛden dɔ ci u ma k’a fɔ ko: ‘Kɛlɛ tɛ aw ka kɛlɛ ye, nka Ala ka kɛlɛ don. Aw tɛna kɛlɛ yɛrɛ kɛ. Aw ka filɛli kɛ dɔrɔn. Aw k’a lajɛ Jehova bɛna aw kisi cogo min na.’

O dugujɛ sɔgɔma, Josafat y’a fɔ a ka mɔgɔw ye ko: ‘Aw ye da Jehova la.’ A tilala ka dɔnkilidalaw bila sɔrɔdasiw ɲɛfɛ. U taamatɔ ka taa kɛlɛ la, u tun bɛ ka tanuli dɔnkili da Jehova ye. U surunyara u juguw la tuma min na, yala i b’a dɔn fɛn min kɛra wa? Jehova y’a kɛ o jugu minnu tun nana u kɛlɛ, olu yɛrɛw ka wuli ɲɔgɔn kama ka ɲɔgɔn faga. Israɛlkaw sera yen tuma min na, u y’a sɔrɔ u juguw bɛɛ sara.

Yala Josafat ma kɛ hakilitigi ye ka a ka dannaya da Jehova kan wa? An fana na kɛ hakilitigi ye, ni an bɛ an ka dannaya da Jehova kan.

1 Masakɛw 22:​41-53; 2 Tilew kibaru 20:​1-30.