Masamusojugu Jezabɛl
Maana 66nan
Masamusojugu Jezabɛl
MASAKƐ Jeroboam salen kɔfɛ, masakɛ minnu ye Israɛl ka kabila 10 mara, olu si tun man ɲi. Nka, masakɛ Akab tun ka jugu ni u bɛɛ ye. I b’a dɔn mun na wa? A kun belebele dɔ ye a musojugu Jezabɛl ye.
Jezabɛl tun tɛ Israɛlka ye. Sidɔn masakɛ denmuso tun don. A tun bɛ boli min bato, o boli tɔgɔ ye ko Baal. A ye Akab ni Israɛlka caman fana bila u ka Baal bato. Jezabɛl tun bɛ Jehova koniya. A ye Jehova ka kira caman fana faga. Kira tɔw bolila ka taa u dogo kuluwow la, walisa Jezabɛl kana u faga. Ni Jezabɛl kɔni tun bɛ fɛn dɔ fɛ, a tun bɛ sɔn ka mɔgɔ faga yɛrɛ, walisa ka se k’o fɛn sɔrɔ.
Don dɔ la, masakɛ Akab ɲɛnasisira kosɛbɛ. Jezabɛl y’a ɲininka ko: ‘Mun na i ɲɛnasisilen bɛ bi?’
Akab y’a jaabi ko: ‘Nabot ye kuma min fɔ ne ye, o de y’a to ne ɲɛnasisilen bɛ. Ne tun b’a fɛ ka a ka rezɛnforo san, nka, a ko ne tɛ se k’o sɔrɔ.’
Jezabɛl ko: ‘O kana i dusu kasi. Ne bɛna o di i ma.’
Nabot tun sigilen bɛ dugu min na, Jezabɛl ye lɛtɛrɛw ci o dugu kuntigi dɔw ma, k’a fɔ u ye ko: ‘Aw ka mɔgɔlankolon dɔw lajɛ, k’a don u da, u k’a fɔ ko Nabot ye Ala danga, ka masakɛ danga. O kɔfɛ, aw ka bɔ ni Nabot ye dugu kɔfɛ, ka a bon ni kabakurunw ye ka a faga.’
Jezabɛl y’a mɛn yɔrɔ min na dɔrɔn ko Nabot sara, a ko Akab ma: ‘Taa sisan ka a ka rezɛnforo ta.’ Jezabɛl ye o kojuguba min kɛ, yala i ma sɔn a ma ko a ka kan ka ɲangi o la wa?
A waati la, Jehova ye Jehu ci walisa a ka taa Jezabɛl ɲangi. Jezabɛl y’a mɛn tuma min na ko Jehu bɛ ka na, a ye kale da a ɲɛ la, k’a yɛrɛ labɛn walisa ka a yɛrɛ cɛɲɛ. Nka, Jehu sera yen tuma min na, ka Jezabɛl ye fenɛtiri la, a y’a fɔ palɛ kɔnɔmɔgɔw ye ko: ‘Aw k’a fili duguma!’ I ko i ɲɛ b’a la cogo min na yan yɔrɔ la, cɛw ye Jehu ka kuma mɛn. U ye Jezabɛl fili duguma. Jezabɛl sara. Masamusojugu Jezabɛl sara o cogo de la.
1 Masakɛw 16:29-33; 18:1-4; 21:1-16; 2 Masakɛw 9:30-37.