Maana 59nan

Mun na Dawuda tun ka kan ka boli ?

DAWUDA kɛlen kɔ ka Goliyati faga, Israɛl ka Sɔrɔdasi kuntigi Abnɛr nana ni a ye Saul ɲɛkɔrɔ. Saul nisɔndiyara kosɛbɛ Dawuda kɔrɔ. Saul ye Dawuda kɛ a ka Sɔrɔdasi kuntigi dɔ ye, ka Dawuda ta walisa a ka to ale ka so.

Sɔrɔdasiw natɔ ka bɔ Filisitikaw kɛlɛli la, musow ye dɔnkili da ko: ‘Saul ye mɔgɔ ba caman faga, nka Dawuda ye mɔgɔ ba tan caman faga.’ O kuma y’a to Saul keleyara Dawuda la, bawo u ye tanuli min kɛ Dawuda ye, o bonyara ka tɛmɛ ale ta kan. Nka Saul denkɛ, Jonatan tun ma keleya Dawuda la. A tun bɛ Dawuda fɛ kosɛbɛ. Dawuda fana tun bɛ Jonatan fɛ. O la sa, u fila ye layidu ta k’u bɛ kɛ teriw ye tuma bɛɛ.

Dawuda tun ye nkɔnifɔla ŋana ye. Saul tun b’a ka nkɔnifɔkan fɛ. Nka don dɔ la, Saul ka keleya y’a bila a ka kojuguba dɔ kɛ. Dawuda bɛ ka nkɔni fɔ tuma min na, Saul y’a ka tama ta ka Dawuda bon ni o ye, k’a fɔ ko: ‘Ne bɛna Dawuda gengen kogo la.’ Nka, tama ye Dawuda jɛ, bawo Dawuda y’i cɛ ka bɔ tama ɲɛ. Kɔfɛ , Saul y’a ɲini tuguni ka Dawuda bon ni a ka tama ye, nka Saul y’a jɛ kokura. Dawuda y’a dɔn o tuma na ko a ka kan ka a yɛrɛ kɔlɔsi kosɛbɛ.

 Saul tun ye layidu min ta, i hakili bɛ o la wa? A tun y’a fɔ ko mɔgɔ min bɛna Goliyati faga, ale bɛna a denmuso di o tigi ma furu la. Nka Saul tilala k’a fɔ Dawuda ye ko a bɛ se k’ale denmuso Mikal sɔrɔ, nka fo a ka Filisitika 100 faga fɔlɔ. I ye o ye! Saul tun b’a fɛ Filisitikaw ka Dawuda faga, nka u ma se. O la sa, Saul y’a denmuso di Dawuda ma, a ka kɛ a muso ye.

Don dɔ la tuguni, Saul y’a fɔ a ka jɔnkɛw bɛɛ ye ani Jonatan ye, ko a b’a fɛ ka Dawuda faga. Nka, Jonatan y’a fɔ a fa ye ko: ‘I kana kojugu kɛ Dawuda la. A ma kojugu si kɛ i la. Nka, a ye koɲuman caman de kɛ i ye. Don min na a ye Goliyati faga, a y’a ka ɲɛnamaya bila farati la. E yɛrɛ ye o ye, o diyara i ye fana.’

Saul ye a denkɛ lamɛn, ka layidu ta ko a tɛna kojugu kɛ Dawuda la. Dawuda seginna ka na Saul ka so, ka baara kɛ a ye kokura, i ko fɔlɔ la. Nka, don dɔ la k’a sɔrɔ Dawuda bɛ ka nkɔni fɔ, Saul ye a bon ni a ka tama ye tuguni. Dawuda y’i cɛ ka bɔ a kɔrɔ kokura, tama nana turu kogo la. Nin ye a siɲɛ sabanan ye ko Saul bɛ Dawuda bon ni a ka tama ye walisa k’a faga. Dawuda y’a dɔn sisan tiɲɛ na, ko ale ka kan ka boli.

O don sufɛ, Dawuda taara a yɛrɛ ka so. Saul ye cɛ dɔw bila walisa ka taa a faga. Nka, Saul tun b’a fɛ ka min kɛ Dawuda la, Mikal tun b’o dɔn. O kosɔn, a y’a fɔ a cɛ ye ko: ‘Ni i ma boli ka taa bi su in na, i na kɛ su ye sini.’ O don su yɛrɛ la, Mikal ye Dawuda dɛmɛ a ka boli fenɛtiri fɛ. San wolonwula ɲɔgɔn kɔnɔ, Dawuda tun ka kan ka a yɛrɛ dogo yɔrɔ ni yɔrɔ walisa Saul kana se k’a ye.

1 Samuɛl 18:​1-30; 19:​1-18.