Maana 69nan

Sungurunnin ye mɔgɔba dɛmɛ

YALA i b’a dɔn nin dennin bɛ ka min fɔ wa? A bɛ ka Jehova ka kira kuma de fɔ muso ye. O kira tɔgɔ ye ko Elise. Jehova ye Elise dɛmɛ ka dakabanako minnu kɛ, a bɛ ka olu fana fɔ a ye. Muso tɛ fɛn fosi dɔn Jehova ko la, bawo a tɛ Israɛlka ye. Nka, mun na nin dennin bɛ muso ka so? An k’o lajɛ ɲɔgɔn fɛ.

Muso ye Sirika ye. A cɛ ye Sirikaw ka sɔrɔdasiw kuntigi ye. Cɛ tɔgɔ ko Naaman. Nin dennin bɛ bɔ Israɛl. Sirikaw y’a minɛ ka na a di Naaman muso ma, walisa a ka kɛ a ka baarakɛden ye.

Naaman tun ye kunatɔ ye. Bana jugu don, min bɛ se ka farisogo ɲimi. O kosɔn, dennin y’a fɔ Naaman muso ye ko: ‘Ni ne matigi tun bɛ se ka taa Jehova ka kira fɛ Israɛl, a tun bɛna a ka kuna kɛnɛya.’ O kuma lasera muso cɛ ma.

 Naaman tun b’a fɛ kosɛbɛ ka kɛnɛya. O kosɔn, a y’a latigɛ ka taa Israɛl. A sera yen tuma min na, a taara Elise ka so. Elise y’a ka baarakɛden bila ka taa a fɔ Naaman ye, ko a ka taa a yɛrɛ ko siɲɛ wolonwula Jurdɛn baji la. O ye Naaman dusu bɔ kosɛbɛ. A ko: ‘Baji minnu bɛ ne faso la, olu man fisa ni Israɛl baji bɛɛ ye wa?’ A kɛlen kɔ k’o fɔ, Naaman y’a kɔdon ka taa.

Nka, a ka baarakɛden dɔ ko a ma: ‘Makɛ, ni Elise tun y’a fɔ i ye i ka ko gɛlɛn dɔ kɛ, yala i tun tɛna o kɛ wa? Mun dun na i tɛna taa i ko dɔrɔn i ko Elise y’a fɔ i ye cogo min na?’ Naaman ye a ka baarakɛden lamɛn. A taara ba la, ka i su ji la siɲɛ wolonwula, ka tila ka bɔ. A ye o kɛ tuma min na, a farisogo ye barika sɔrɔ, ka kɛnɛya pewu!

Naaman nisɔndiyara kosɛbɛ. A seginna Elise fɛ k’a fɔ a ye ko: ‘Ne dara a la sisan ko Ala min bɛ Israɛl, ale kelenpe de ye Ala lakika ye dugukolo bɛɛ kunna. O la sa, nin ye ne ka bonya ye, ne bɛ i deli, i ka a minɛ.’ Nka, Elise y’a jaabi ko: ‘Ayi. Ne tɛna o bonya minɛ.’ Elise tun b’a dɔn ko a man ɲi ka sɔn o bonya la, bawo Jehova de ye Naaman kɛnɛya. Nka, Gehazi, n’o ye Elise ka baarakɛden ye, ale tun b’a fɛ ka dɔ sɔrɔ o bonya la.

O la sa, a ye min kɛ, o filɛ. Naaman taalen kɔfɛ, Gehazi bolila ka kun a la. A ko Naaman ma: ‘Elise ye ne ci i ma k’a fɔ i ye, ko i tun ko i bɛ bonya min di a ma, i ka o fɛn dɔw di, bawo a teri dɔw nana bɔ a ye sisan-sisan.’ Gehazi tun ye nkalon de tigɛ, nka Naaman tun tɛ o dɔn. O kosɔn, a ye fɛn dɔw di Gehazi ma.

Gehazi seginna ka na tuma min na, Elise y’a dɔn a ye min kɛ, bawo Jehova tun ye o fɔ a ye. O kosɔn, Elise ko: ‘Ikomi i ye nin kojugu kɛ, Naaman ka kuna bɛna yɛlɛma i la.’ O de kɛra, o yɔrɔnin bɛɛ la.

Nin maana b’an kalan mun na? A b’an kalan fɛn saba la. A fɔlɔ ye ko an ka kan ka dennin ladege, ka kuma Jehova kan. O bɛ se ka na ni koɲumanba ye. Filanan, an man kan ka kɛ kuncɛba ye i ko Naaman tun bɛ cogo min na a daminɛ na. Nka, an ka Ala ka baarakɛdenw ka kuma mɛn. Sabanan, an ka an yɛrɛ tanga nkalontigɛ ma. An kana kɛ i ko Gehazi. An bɛ se ka fɛn caman dɔn Bibulu kalan fɛ tiɲɛ na. Tari di?

2 Masakɛw 5:​1-27.