Maana 94nan

A bɛ denmisɛnninw fɛ

YESU y’a bolo kɛ ka cɛnin lamini cogo min na, e ka o lajɛ. An bɛ se k’a fɔ ko Yesu tun bɛ denmisɛnninw fɛ tiɲɛ na. Cɛ minnu bɛ ka u lajɛ, o ye Yesu ka cidenw ye. Yesu bɛ ka mun fɔ u ye? An k’o lajɛ ɲɔgɔn fɛ.

Yesu ni a ka cidenw nana ka bɔ taama jan dɔ la. U tun bɛ sira fɛ ka na tuma min na, cidenw ye ɲɔgɔn sɔsɔ. U sera tuma min na, Yesu ye u ɲininka: ‘Aw tun bɛ ka ɲɔgɔn sɔsɔ mun ko la sira kan?’ Yesu tun b’a dɔn cɔ u tun ye ɲɔgɔn sɔsɔ min na. Nka, a ye ɲininkali kɛ walisa k’a dɔn ni cidenw tun bɛna o fɔ a ye.

Cidenw ma sɔn ka fɛn fosi fɔ Yesu ye, bawo u tun ye ɲɔgɔn sɔsɔ walisa k’a dɔn, min ye mɔgɔba ye olu la ka tɛmɛ tɔw bɛɛ kan. Ciden dɔw tun b’a fɛ k’a jira k’olu ye mɔgɔba ye ka tɛmɛ ciden tɔw kan. Yesu tun bɛna a ɲɛfɔ u ye cogo jumɛn na, ko a man ɲi k’a ɲini ka kɛ mɔgɔba ye ka tɛmɛ tɔw kan?

Yesu ye cɛnin dɔ wele, k’a jɔ cidenw bɛɛ ɲɛ fɛ, ka tila k’a fɔ u ye ko: ‘Ne b’a fɛ aw ka nin faamu tigitigi: ni aw ma yɛlɛma ka aw yɛrɛ kɛ i ko nin cɛnin, aw tɛna don abada Ala ka masaya kɔnɔ. Mɔgɔ min ka bon ni bɛɛ ye Ala ka masaya la, o ye mɔgɔ ye min bɛna a yɛrɛ kɛ i ko nin cɛnin.’ I b’a dɔn mun na Yesu ye o fɔ wa?

Yesu ye o fɔ bawo ka kɛ mɔgɔba ye ka tɛmɛ u denmisɛnnin ɲɔgɔn tɔw kan, o tɛ denmisɛnninw haminako ye. O la sa, sani cidenw ka kɛlɛ walisa k’a dɔn min ye mɔgɔba ye ka tɛmɛ u tɔw bɛɛ kan, u ka kan k’a dege ka kɛ i ko denmisɛnninw.

Yesu y’a jira waati dɔ wɛrɛw fana na ko a bɛ denmisɛnninw fɛ kosɛbɛ. Kalo damadɔw o ko kɔfɛ, mɔgɔ dɔw nana ni u denw ye walisa u ka Yesu ye. Cidenw y’a ɲini k’u bali u ka gɛrɛ Yesu la. Nka, Yesu ko a ka cidenw ma: ‘Aw k’a to denmisɛnninw ka na ne fɛ, aw kana u bali ka na ne ma, bawo Ala ka masaya ye olu ɲɔgɔnnaw de ta ye.’ O kɔfɛ, Yesu ye denmisɛnninw ta a bolo la, ka dugawu don u ye. Yala o tɛ koɲuman ye an bolo k’a dɔn ko Yesu bɛ denmisɛnninw fɛ wa?

Matiyu 18:​1-4; 19:​13-15; Marka 9:​33-37; 10:​13-16.