Maana 100nan

Yesu bɛ nakɔ kɔnɔ

YESU ni a ka cidenw bɔlen kɔfɛ sankanso soba kɔnɔ, u taara Jetisɛmanɛ nakɔ la. U delila ka na o yɔrɔ la siɲɛ caman. Yesu bɛ k’a fɔ u ye sisan ko u ka to u ɲɛ na, ka Ala deli. Yesu tilala k’a mabɔ u la dɔɔnin. A y’i bin ka a ɲɛ biri duguma ka Ala deli.

O kɔfɛ Yesu seginna ka na a ka cidenw yɔrɔ. E hakili la, cidenw tun bɛ ka mun kɛ? U tun bɛ sunɔgɔ la. Yesu y’a fɔ u ye siɲɛ saba k’u ka to u ɲɛ na, nka o siɲɛ saba bɛɛ la, Yesu seginna ka na u sɔrɔ sunɔgɔ la. Yesu seginna ka na siɲɛ laban min na, a ko: ‘Aw bɛ se ka sunɔgɔ nin waati la cogo di? Ne bɛna don ne juguw bolo waati min na, o sera.’

O yɔrɔnin bɛɛ la, jamaba dɔ mankan bɔra. E ka mɔgɔw lajɛ bani! U nana ni npanw ni berew ye. Kala mɛnɛnenw bɛ u bolo walisa ka yeli kɛ. U surunyara Yesu ni a ka cidenw la tuma min na, cɛ dɔ bɔra jama cɛ la, ka sin ka na Yesu ma, ka Yesu da susu i ko i ɲɛ b’a la ja kan cogo min na. Juda Isikariɔti de don. Mun na a ye Yesu dasusu?

Yesu y’a ɲininka ko: ‘Juda, i bɛ ne janfa ni dasusuli ye wa?’ Dasusuli tun ye taamasiyɛn ye min b’a to mɔgɔ minnu ni Juda tun bɛ ɲɔgɔn kɔ, olu ka se ka Yesu dɔn ka bɔ tɔw la. O la sa, Yesu juguw gɛrɛla a la walisa k’a minɛ. Nka Piɛrɛ tun tɛna a to u ka taa ni Yesu ye o cogo la ten. O la sa, Piɛrɛ nana ni npan min ye a bolo, a ye o sama ka bɔ ka cɛ bugo min tun bɛ a kɛrɛfɛ. Npan ye cɛ kunkolo jɛ, ka a kininbolotulo caron. Nka Yesu magara cɛ tulo la, k’a kɛnɛya.

Yesu y’a fɔ Piɛrɛ ye ko: ‘I ka npan don a nɔ na. E t’a dɔn ko ne bɛ se k’a fɔ ne Fa ye a ka mɛlɛkɛ ba caman di ne ma walisa ka ne kisi wa?’ Siga t’a la ko Yesu tun bɛ se k’o kɛ! Nka, Yesu m’a ɲini Ala fɛ a ka mɛlɛkɛ si ci, bawo a tun b’a dɔn ko waati sera a juguw k’a minɛ. O kosɔn, a sɔnna mɔgɔw ka taa ni a ye. An k’a lajɛ fɛn min ye Yesu sɔrɔ.

Matiyu 26:​36-56; Luka 22:​39-53; Yuhana 18:​1-12.