Maana 87nan

Yesu denmisɛnman bɛ Alabatoso kɔnɔ

E KA denmisɛn lajɛ min bɛ ka kuma cɛkɔrɔbaw fɛ. Cɛkɔrɔba ninnu ye karamɔgɔw ye Alabatoso kɔnɔ Jerusalɛm. Cɛnin ye Yesu de ye. Sisan a si ye san 12 ye.

Karamɔgɔw kabakoyara kosɛbɛ k’a ye ko Yesu bɛ fɛn caman dɔn Ala ko la, ani fɛnw kan minnu sɛbɛnnen bɛ Bibulu kɔnɔ. Nka, mun na Yusufu ni Mariyama tɛ yan? Olu bɛ min? An ka o jaabiw ɲini ɲɔgɔn fɛ.

San o san, Yusufu bɛ taa ni a ka denbaya ye Jerusalɛm, seli dɔ la, min bɛ wele ko Tɛmɛnkan seli. Ka bɔ Nazarɛti ka na Jerusalɛm, o sira ka jan kosɛbɛ. Mobili tɛ mɔgɔ si bolo. Tɛrɛn fana tɛ yen. O bolifɛnw tun tɛ yen o waati la. Mɔgɔ fanba tun bɛ taama u sen de la. U tun bɛ tile saba ɲɔgɔn kɛ sira la sani u ka se Jerusalɛm.

Yusufu ka denbaya bonyara sisan. Dɔgɔkɛw ni dɔgɔmusow bɛ Yesu bolo, Yusufu ni Mariyama ka kan ka u jan to minnu na. O san na, Yusufu ni Mariyama ani u denw ye sira jan minɛ walisa ka segin u ka so Nazarɛti. Olu fɛ, Yesu ni taamakɛla wɛrɛw tun bɛ ɲɔgɔn fɛ sira kan ka na. Nka, u jɔra tuma min na tile bintuma na, u ma Yesu ye. U y’a ɲini u somɔgɔw ni u teriw cɛ la, nka Yesu ni olu si tun tɛ ɲɔgɔn fɛ. U seginna u kɔ Jerusalɛm walisa ka Yesu ɲini.

U labanna ka Yesu ni karɔmɔgɔw sɔrɔ kuma na Alabatoso kɔnɔ. A tun bɛ ka u lamɛn ani ka u ɲininka. Yesu ka hakilitigiya tun ye mɔgɔ bɛɛ kabakoya. Nka, Mariyama ko: ‘Ne den, mun na i ye nin kɛ an na? Ne ni i fa bɛɛ jɔrɔlen bɛ ka i ɲini.’

Yesu y’a jaabi ko: ‘Mun na aw bɛ ka ne ɲini? Aw t’a dɔn ko ne ka kan ka sɔrɔ ne Fa ka so kɔnɔ wa?’

Ɔwɔ, Yesu tun bɛ se ka kalan Ala ko la yɔrɔ min na, a tun ka di a ye ka kɛ o yɔrɔ la. An bɛ se ka kalan Ala ko la yɔrɔ min na, yala an fana t’a fɛ ka kɛ o yɔrɔ la wa? Yesu seginna tuma min na Nazarɛti, a tun bɛ taa lajɛw la dɔgɔkun o dɔgɔkun. O lajɛw tun dabɔra Ala bato kama. Ikomi Yesu tun bɛ a tulomajɔ tuma bɛɛ, a ye Bibulu kɔnɔko caman dɔn. An fana ka kɛ i ko Yesu. An ka a ladege.

Luka 2:​41-52; Matiyu 13:​53-56.