Maana 91nan

Yesu ka kulukan waajuli

E KA Yesu sigilen lajɛ yan yɔrɔ la. A bɛ ka nin mɔgɔw bɛɛ kalan Galile kulu dɔ kan. Mɔgɔ minnu sigilen bɛ a kɛrɛfɛ, olu ye a ka kalandenw ye. Yesu ye cɛ 12 ta olu la ka u kɛ cidenw ye. Cidenw ye Yesu ka kalanden kɛrɛnkɛrɛnnenw de ye. I bɛ u tɔgɔw dɔn wa?

Simɔn Piɛrɛ ni a balimakɛ Andre bɛ yen. Yakuba ni Yuhana fana ye balimaw ye. Ciden dɔ wɛrɛ fana tɔgɔ ye ko Yakuba, ani dɔ wɛrɛ fana tun bɛ wele Simɔn. Ciden fila tun bɛ wele Juda. Kelen ye Juda Isikariɔti ye, tɔ kelen ye Juda Tade ye. Filipe ni Natanaɛl (min welela fana Bartɛlɛmi) bɛ yen, ani Matiyu ni Tɔma.

Yesu seginna ka bɔ Samari tuma min na, o de kɛra a siɲɛ fɔlɔ ye ka waajuli daminɛ ko: ‘Sankolola masaya surunyara.’ I b’a dɔn o masaya ye min ye wa? O masaya ye Ala ka gɔfɛrɛnaman yɛrɛ-yɛrɛ de ye. Yesu ye o gɔfɛrɛnaman masakɛ ye. A bɛna mara kɛ ka a to  sankolo la, ka hɛrɛ lase dugukolo ma. Ala ka masaya bɛna dugukolo bɛɛ yɛlɛma ka kɛ alijinɛ cɛɲumanba ye.

Yesu bɛ ka mɔgɔw kalan masaya ko la yan yɔrɔ la. A ye ɲɛfɔli kɛ ko: ‘Aw ka kan ka Ala deli tan: An Fa min bɛ sankolo la, i tɔgɔ ka bonya. I ka masaya ka na. I sago ka kɛ dugukolo kan, i n’a fɔ a bɛ kɛ sankolo la cogo min na.’ Mɔgɔ caman bɛ o delili wele ko ‘Matigi ka delili.’ Dɔw b’a fɔ o delili ma ko: ‘An Fa.’ Yala i bɛ se ka o delili kuuru bɛɛ fɔ i kun fɛ wa?

Mɔgɔw ka kan ka ɲɔgɔn minɛ cogo min na, Yesu ye u kalan o fana na. A ko: ‘Aw b’a fɛ mɔgɔ ka fɛn min kɛ aw ye, aw ka o ɲɔgɔn fana kɛ u ye.’ Yala a ka di i ye tɔw ka i minɛ koɲuman wa? Yesu bɛ k’a jira o cogo la ko an ka kan ka ɲɔgɔn minɛ ka ɲɛ. Yala a tɛna kɛ hɛrɛba ye, tuma min na mɔgɔ kelen-kelen bɛɛ bɛna o kɛ alijinɛ kɔnɔ, dugukolo kan wa?

Matiyu tilayɔrɔbaw 5 nan ka na 7 nan na; 10: 1-4.