Maana 97nan

Yesu nana i ko masakɛ

YESU kɛlen kɔ ka fiyentɔ fila kɛnɛya, waati dɔɔnin dɔrɔn o kɔfɛ, a nana se dugunin dɔ la Jerusalɛm kɛrɛfɛ. A y’a fɔ a ka kalanden fila ye ko: ‘Aw ka taa dugu kɔnɔ. Aw bɛna falidennin dɔ ye, aw k’a foni ka na ni a ye.’

Kalandenw nana ni falidennin ye tuma min na, Yesu y’i sigi a kan ka Jerusalɛm sira minɛ. A surunyara dugu la tuma min na, jamaba bɔra k’a kunbɛn. U fanba ye u ka sanfɛ finiw bɔ u kan na, k’olu fɛnsɛn sira kan. Dɔw ye ntamarobuluw tigɛ, k’olu da sira kan. U pɛrɛnna k’a fɔ ko: ‘Ala ka duba masakɛ ye min bɛ na Jehova tɔgɔ la!’

Fɔlɔ-fɔlɔ, Israɛl jamana na, ni mɔgɔ dɔ tun kɛra masakɛ ye, a tun ka kan ka yɛlɛ falidennin kan ka don Jerusalɛm dugu kɔnɔ walisa k’a yɛrɛ jira jama la. Yesu tun bɛ ka o de kɛ. Nin mɔgɔw y’a jira  ko u b’a fɛ Yesu ka kɛ u ka masakɛ ye. Nka, mɔgɔ bɛɛ ma sɔn Yesu la. Ko min kɛra ka Yesu to Alabatoso la, o bɛ o jira.

Alabatoso kɔnɔ, Yesu ye fiyentɔw ni nabaraw kɛnɛya. Denmisɛnninw ye o ye tuma min na, u pɛrɛnna ka Yesu tanu. Nka, o ye sarakalasebagaw dusu bɔ. U ko Yesu ma: ‘I m’a mɛn denmisɛnninw bɛ ka min fɔ wa?’

Yesu ko: ‘Ɔwɔ, ne y’a mɛn kɛ. Aw ma deli k’a kalan Bibulu kɔnɔ ko “Ala bɛna a kɛ denmisɛnninw da bɛna tanulikumaw fɔ wa?” O kosɔn, denmisɛnninw bɛ taara a fɛ ka Ala ka masakɛ sugandilen tanu.

An b’a fɛ ka kɛ i ko nin denmisɛnninw, tari di? Mɔgɔ dɔw bɛ se ka a ɲini ka an bali ka kuma Ala ka masaya kan. Nka, Yesu bɛna dakabanako minnu kɛ hadamadenw ye, an tɛna o fɔli dabila.

Yesu tun bɛ dugukolo kan tuma min na, a ka masaya daminɛ waati tun ma se. O tun bɛna kɛ waati jumɛn na? Yesu ka kalandenw tun b’a fɛ k’o dɔn. An bɛna o de ye maana nata kɔnɔ.

Matiyu 21:​1-17; Yuhana 12:​12-16.