Maana 3nan

Cɛ fɔlɔ ni muso fɔlɔ

I ƝƐ bɛ mun na ja kan yan, ni o tun tɛ ja tɔ kelen na? I ɲɛ bɛ mɔgɔw de la. Cɛ fɔlɔ ni muso fɔlɔ don. Jɔni ye u da? Ala de ye u da. Yala i bɛ Ala tɔgɔ dɔn wa? Ala tɔgɔ ye ko Jehova. Cɛ tɔgɔ ye ko Hadama, muso tɔgɔ ye ko Hawa.

Jehova Ala ye Hadama da nin cogo la: A ye dugukolo buguri ta ka mɔgɔ farikolo dilan. O farikolo tun dafalen bɛ. O kɔfɛ, a ye ɲɛnamaya fiɲɛ fyɛ mɔgɔ nun kɔnɔ, Hadama kɛra fɛn ɲɛnama ye.

Jehova ye baara di Hadama ma. A y’a fɔ ko Hadama ka tɔgɔ da bagan suguya kelen-kelen bɛɛ la. Hadama ye baganw kɔlɔsi waati jan kɔnɔ walisa ka se ka tɔgɔ da u la min tun bɛnnen bɛ u ma. Nka, Hadama y’a daminɛ tuma min na ka tɔgɔ da baganw na, a ye fɛn dɔ kɔlɔsi. I b’a dɔn o tun ye min ye wa?

Bagan suguya kelen-kelen bɛɛ ni a tɔɲɔgɔn tun don. Samacɛw ni samamusow tun bɛ yen. Warabacɛw ni warabamusow tun bɛ yen. Nka, tɔɲɔgɔn tun tɛ Hadama la. O la sa,  Jehova ye sunɔgɔba bila Hadama la. A ye a galakakolo kelen ta ka muso dilan ni o ye. O kɛra Hadama muso ye.

Hadama nisɔndiyara kosɛbɛ sisan. E ka miiri Hawa ka nisɔndiya fana la, a kɛlen ka a yɛrɛ sɔrɔ nin nakɔ cɛɲumanba kɔnɔ ! Hadama ni Hawa bɛ se ka denw sɔrɔ sisan, ka ɲɛnamaya kɛ ɲɔgɔn fɛ hɛrɛ la.

Jehova tun b’a fɛ Hadama ni Hawa ka to ɲɛnamaya la badaa-badaa. A tun b’a fɛ u ka dugukolo kuuru bɛɛ kɛ yɔrɔ cɛɲumanba ye i ko Edɛn nakɔ tun bɛ cogo min na. O baara min tun dira Hadama ni Hawa ma, ni u tun miirila o la, o tun ka kan ka u nisɔndiya kosɛbɛ. Yala a tun na diya i ye ka i sen don baara la walisa dugukolo ka kɛ nakɔ cɛɲumanba ye wa? Nka Hadama ni Hawa ka hɛrɛ ma mɛn. Mun na? An k’o lajɛ ɲɔgɔn fɛ.

Zaburu 83:19; Jenɛse 1:26-31; 2:7-25.