Maana 6nan

Kaɛn ni Abɛl

E KA Kaɛn ni Abɛl lajɛ sisan. U fila bɛɛ kɔrɔbayara. Kaɛn kɛra sɛnɛkɛla ye. A b’a mago don sɛnɛfɛnw, jiridenw ni nakɔ kɔnɔfɛnw na.

Abɛl kɛra sagamarala ye. Ka a mago don sagadenninw na, o ka di a ye kosɛbɛ. A ka sagadenninw bonyara sisan ka kɛ saga belebelew ye. O la sa, sɔɔni Abɛl bɛna sagakuluba mara.

Don dɔ la, Kaɛn ni Abɛl nana saraka bɔ Ala ye. Kaɛn ye dumunifɛn minnu sɛnɛ, a nana ni olu dɔ ye. Abɛl nana ni a ka sagaw bɛɛ la ɲuman ye. Jehova sɔnna Abɛl ni a ka saraka la. Nka, a ma sɔn Kaɛn ni a ka saraka la. I b’a dɔn mun na wa?

Abɛl ka saraka tun ka fisa ni Kaɛn ta ye.  Nka, o dɔrɔn tun tɛ. Abɛl tun ye mɔgɔ ɲuman ye. A tun bɛ Jehova kanu, a tun b’a kɔrɔkɛ Kaɛn fana kanu. Nka, Kaɛn tun ka jugu. A tun tɛ a dɔgɔkɛ fɛ.

O kosɔn, Ala y’a fɔ Kaɛn ye ko a ka a sɔn yɛlɛma. Nka, Kaɛn ma sɔn ka Ala ka kuma mɛn. Ikomi Ala kɛra Abɛl fɛ ka tɛmɛ ale kan, Kaɛn dimina kosɛbɛ o la. O la sa, Kaɛn ko Abɛl ma: ‘An ka taa foro la.’ U fila dɔrɔn tun bɛ foro la tuma min na, Kaɛn ye Abɛl bugɔ, k’a bugɔ ka juguya fo a ye Abɛl faga. Kaɛn ye o min kɛ, yala o tun tɛ ko cɛjuguba ye wa?

Hali ni Abɛl sara, Ala hakili b’a la halisa. Abɛl tun ka ɲi. Jehova tɛ ɲinɛ abada o mɔgɔ sugu kɔ. O kosɔn, don dɔ la, Jehova Ala bɛna Abɛl ɲɛnamaya kokura. O waati la, Abɛl tɛna sa tun. A bɛna se ka balo dugukolo kan yan badaa-badaa. Yala a tɛna diya i ye ka mɔgɔw dɔn minnu bɛ i ko Abɛl wa?

Nka, mɔgɔ minnu bɛ i ko Kaɛn, olu ko man di Ala ye. O de y’a to tuma min na Kaɛn ye a dɔgɔkɛ faga, Ala y’a ɲangi, k’a gɛn ka taa yɔrɔ jan na, ka a mabɔ a somɔgɔ tɔw la. Kaɛn taatɔ ye a dɔgɔmuso dɔ ta ka taa ni o ye. O kɛra a muso ye.

Kaɛn ni a muso ye denw sɔrɔ. Hadama ni Hawa denkɛ ani denmuso tɔw ye furu kɛ , ka denw fana sɔrɔ. A ma mɛn mɔgɔw cayara dugukolo kan. An ka u dɔw ka maana lajɛ.

Jenɛse 4:2-26; 1 Yuhana 3:11, 12; Yuhana 11:25.