Maana 2nan

Nakɔ cɛɲumanba

E KA dugukolo filɛ yan yɔrɔ la. A fɛnw bɛɛ cɛ ka ɲi. E ka bin, filɛruw, jiriw ani baganw bɛɛ lajɛ. Yala i bɛ se ka sama ni warabaw jira wa?

Nin nakɔ cɛɲumanba nana cogo di? An k’a lajɛ ɲɔgɔn fɛ Ala ye dugukolo labɛn an kosɔn cogo min na.

Ala y’a daminɛ ka binkɛnɛ falen dugukolo yɔrɔ bɛɛ la. A ye fɛn falentaw, jirininw ni jiriw  sugu bɛɛ da. O falenfɛn ninnu bɛɛ bɛ dugukolo cɛɲɛ. Nka, u ma da o dɔrɔn kama. U caman bɛ den, an bɛ u denw dun minnu ka di kosɛbɛ.

O kɔfɛ, Ala ye jɛgɛw da walisa u ka nɔn ji la. A ye kɔnɔninw da walisa u ka pan sankolo la. A ye wuluw, jakumaw ani sow da ani bagan belebelew ni bagan misɛnninw. Bagan sugu jumɛnw bɛ i ka yɔrɔ la? Yala an man kan ka nisɔndiya ko Ala ye o fɛnw bɛɛ da an kosɔn wa?

A laban na, Ala ye dugukolo yɔrɔ dɔ dilan k’o kɛ yɔrɔ kɛrɛnkɛrɛnnen ye. A ye o yɔrɔ wele ko Edɛn nakɔ. O nakɔ fɛnw bɛɛ tun dafalen bɛ. A fɛnw bɛɛ tun cɛ ka ɲi. Ala tun b’a fɛ dugukolo kuuru bɛɛ ka kɛ i ko nin nakɔ cɛɲumanba min dilanna ale fɛ.

Nka, e ka nakɔ ja lajɛ ko kura. Ala y’a ye ko fɛn dɔ tun bɛ nakɔ jɛ. E b’a dɔn o ye min ye wa? An k’o lajɛ ɲɔgɔn fɛ.

Jenɛse 1:11-25; 2:8, 9.