Maana 9nan

Nuhun ye kurunba dilan

MUSO ani denkɛ saba tun bɛ Nuhun bolo. Denkɛw tun tɔgɔ ye ko Sɛm, Kam ani Jafɛt. Muso tun bɛ a denkɛ kelen-kelen bɛɛ bolo. O la sa, Nuhun ka denbaya bɛɛ lajɛlen tun ye mɔgɔ segin ye.

Ala ye Nuhun bila a ka kabako baara dɔ kɛ. Ala ko Nuhun ka kurun belebeleba dɔ dilan. Ala ko: ‘I k’a kɛ etasi saba ye. I ka sodenw kɛ a kɔnɔ.’ O sodenw tun ka kan ka dilan Nuhun ni a ka denbaya, ani baganw kosɔn. U bɛɛ lajɛlen mago tun bɛna kɛ dumuni min na, o fana tun bɛna bila o sodenw kɔnɔ.

Ala ko Nuhun ka kurunba dilan ka ɲɛ walisa ji kana se ka don a fɛ. A ko: ‘Ne na sanjiba lana dugukolo kan, ka diɲɛ mumɛ bɛɛ halaki. Fɛn o fɛn tɛ kurunba kɔnɔ, o bɛɛ na sa.’

Nuhun ni a denkɛw ye Jehova ka kuma mɛn. U ye kurunba dilanni daminɛ. Nka, mɔgɔ tɔw yɛlɛla Nuhun ni a ka denbaya ma. U ma sɔn ka kojugu dabila. U si ma da Nuhun ka kuma la, tuma min na a y’a fɔ u ye Ala bɛna min kɛ.

 Kurunba dilanni ye waati caman ta, bawo a tun ka bon kosɛbɛ. Kurunba dilanna ka ban san caman tɛmɛnen kɔfɛ. Ala ko Nuhun ka baganw ladon sisan kurunba kɔnɔ. A ko Nuhun ka bagan sifa dɔw ladon kurunba kɔnɔ fila-fila, cɛ ani muso. Nka bagan tɔw ko la, Ala ko Nuhun ka olu ladon wolonwula-wolonwula. Ala ko Nuhun ka kɔnɔ sifa bɛɛ fana ladon kurunba kɔnɔ. Ala y’a fɔ Nuhun ye cogo min na, Nuhun y’a kɛ ten.

O bɛɛ kɔfɛ sa, Nuhun ni a ka denbaya fana donna kurunba kɔnɔ. Ala ye kurunba datugu u da la. Nuhun ni a ka denbaya tun bɛ makɔnɔni na kurunba kɔnɔ. E k’a miiri ko e yɛrɛ tun bɛ makɔnɔni na ni u ye kurunba kɔnɔ. Yala sanjiba bɛna na tiɲɛ na i ko Ala y’a fɔ cogo min na wa?

Jenɛse 6:9-22; 7:1-9.