Maana 10nan

Sanjiba

MƆGƆ minnu tun tɛ kurunba kɔnɔ, olu tɛmɛna u ka kow fɛ i ko u tun bɛ deli k’a kɛ cogo min na. U tun ma da sanjiba nali la halisa. A ka ca a la u yɛlɛla Nuhun ni a ka denbaya ma, i ko u ma deli ka yɛlɛ u ma cogo min na. Nka, sɔɔni u ye yɛlɛ dabila.

Yɔrɔnin kelen ji sinna ka bɔ san fɛ ka na dugukolo kan. Ji suurula dugukolo kan i n’a fɔ n’i ye palan ji suuru dugu ma. Nuhun tun ye tiɲɛ fɔ! Nka sisan, a banna. Mɔgɔ si tɛ se ka don kurunba kɔnɔ tuguni. Jehova yɛrɛ de y’a datugu.

Sɔɔni, ji ye dugumakolo yɔrɔ bɛɛ fa. Ji nana kɛ i ko baji belebelebaw. Ji ye jiriw ci ka taa ni u ye, ka kabakurunbaw kolonkolon, ka mankanba bɔ. Mɔgɔw siranna kosɛbɛ. U yɛlɛnna  kuluw kan. U nimisara kosɛbɛ, bawo u ma sɔn ka Nuhun lamɛn ka don kurunba kɔnɔ tuma min na a da tun yɛlɛlen bɛ. Nka, donwaati tɛmɛna sisan.

Ji min bɛ dugukolo kan, o yɛlɛnna, ka yɛlɛn. Sanji suurula dugukolo kan tile 40 ani su 40. Ji min bɛ dugukolo kan, o yɛlɛnna ka kuluw fan bɛɛ tunun. Sɔɔni kulu janmanjanbaw bɛɛ kun tununna ji fɛ. I ko Ala y’a fɔ cogo min na, mɔgɔw ni bagan minnu tun tɛ kurunba kɔnɔ, olu bɛɛ sara. Nka, fɛn o fɛn tun bɛ kurunba kɔnɔ, olu bɛɛ kisira.

Nuhun ni a denkɛw ye kurunba dilan ka ɲɛ. Ji ye kurunba kɔrɔta. A fogonna ji kan. Sanji jɔlen kɔfɛ, don dɔ la, tile bɔra. Dugukolo yɔrɔ bɛɛ tun kɛra baji ye. A kɛra jiko ye sa! Fɛn kelenpe min tun be se ka ye, o tun ye kurunba fogontɔ ye ji kan.

 Mɔgɔ janmanjanba kɔgɔlenbaw tɛ yen tun walisa ka mɔgɔw bugɔ ani k’u jogin. U bɛɛ sara. U wolobaw ni mɔgɔjugu tɔw bɛɛ fana sara. Nka, mun ye u wolofaw sɔrɔ?

Mɔgɔ janmanjanba kɔgɔlenbaw wolofaw tun tɛ hadamaden yɛrɛ-yɛrɛ ye. U faw tun ye mɛlɛkɛw ye minnu jiginna ka u yɛrɛ kɛ cɛw ye walisa ka na sigi dugukolo kan. O la sa, sanjiba nana tuma min na, olu ni mɔgɔ tɔw ma sa ɲɔgɔn fɛ. U tun ye hadamaden farikolo min dilan u yɛrɛ ye, u ye o bila, ka segin mɛlɛkɛya la kokura sankolo la. Nka, Ala ma sɔn u ka kɛ Ale ka mɛlɛkɛw kulu la tuguni. U kɛra Sitanɛ ka mɛlɛkɛw ye. Bibulu kɔnɔ, u bɛ wele ko jinɛw.

Ala ye fiɲɛ dɔ wuli sisan dugukolo kan. O la sa, ji ye jiginni daminɛ. Kalo duuru tɛmɛnen kɔ, kurunba nana sigi kulu dɔ kunna. Don caman tɛmɛna. Mɔgɔ minnu tun bɛ kurunba kɔnɔ, olu tun bɛ se ka kɛnɛmana filɛ, ka kulu kuncɛw ye. Jiw tora ka jigin ka taa a fɛ.

Nuhun ye kɔnɔ finman dɔ bila ka taa kɛnɛma. O kɔnɔ bɛ wele ko kaankaan. A panna ka taa, ka waati dɔ kɛ, ka tila ka segin ka na. A ma sigiyɔrɔ ɲuman sɔrɔ. A tora o la ten. Nka, ni a tun seginna ka na, a tun b’i sigi kurunba kunna.

Nuhun tun b’a fɛ k’a dɔn ni ji tun jara dugukolo kan. O la sa, a ye ntubanin dɔ bila ka taa kɛnɛma. Nka, ntubanin fana seginna ka na bawo a ma sigiyɔrɔ sɔrɔ. Nuhun ye a bila ka taa siɲɛ filanan na tuma min na, a seginna ka na ni olivejiri bulu kɛnɛ ye a dabɔlɔ la. Nuhun y’a dɔn o la sa ko ji jiginna. Nuhun ye ntubanin bila ka taa siɲɛ sabanan na tuma min na, a ye yɔrɔ sɔrɔ dugukolo kan, a tora yen. A ma segin ka na tun.

Ala kumana Nuhun fɛ sisan. A ko: ‘Bɔ kurunba kɔnɔ, e ni i ka denbaya bɛɛ. Baganw fana labɔ.’ U ye waati min kɛ kurunba kɔnɔ, o tun ka ca ni san kelen ye. An bɛ se ka miiri o mɔgɔ bɛɛ ka nisɔndiya la, tuma min na u ye u yɛrɛ ɲɛnama sɔrɔ kɛnɛma kokura.

Jenɛse 7:10-24; 8:1-17; 1 Piɛrɛ 3:19, 20.