Maana 11nan

Ala-ka-murujan fɔlɔ

NUHUN ni a ka denbaya bɔra kurunba kɔnɔ tuma min na, i b’a dɔn a ye fɛn fɔlɔ min kɛ wa? Nuhun ye bagan dɔw faga, k’u saraka Ala ye. I ɲɛ bɛ ale de la yan yɔrɔ la. Nuhun ye baganw kɛ saraka ye walisa ka Ala waleɲumandɔn bawo a ye ale ni a ka denbaya kisi ka bɔ sanjiba la.

E fɛ, yala o diyara Jehova ye wa? Ɔwɔ, o diyara a ye kosɛbɛ. O kosɔn, Ala ye layidu ta Nuhun ye ko a tɛna diɲɛ halaki tun ni sanjiba ye.

A ma mɛn, ji minnu tun ye dugukolo datugu, olu bɛɛ jara. O la sa, Nuhun ni a ka denbaya ye ɲɛnamaya kura daminɛ. Ala ye dugawu don u ye ko: ‘Aw ka den caman sɔrɔ, aw ka caya fo ka dugukolo yɔrɔ bɛɛ kɛ mɔgɔw ye.’

 Nka, ni mɔgɔw nana sanjiba kuma mɛn kɔfɛ, u bɛ se ka siran ko o ɲɔgɔn bɛna kɛ dugukolo kan kokura. O la sa, Ala ye taamasiyɛn di mɔgɔw ma walisa ka u hakili jigin ko ale ye layidu ta ko a tɛna sanjiba lana dugukolo kan tuguni. I bɛ o taamasiyɛn dɔn wa? O taamasiyɛn ye ala-ka-murujan de ye.

Ni sanji tigɛra, ka tile bɔ, tuma caman na an bɛ ala-ka-murujan ye sankolo la. A kulɛriw ka ca, u cɛ ka ɲi fana. I delila ka ala-ka-murujan ye wa? I ɲɛ bɛ a la nin ja kan wa?

Ala ye min fɔ, o filɛ: ‘Ne bɛ layidu ta ko abada sanjiba tɛna hadamadenw ni baganw halaki tun. Ne bɛ ala-ka-murujan bila sankaba la, ni a bɔra tuma min na, ne na o ye, ne hakili na jigin ne ka layidu la.’

O la sa, ni i ye ala-ka-murujan ye, o ka kan k’i hakili jigin mun na? O ka kan k’i hakili jigin Ala ka layidu la, ko a tɛna diɲɛ halaki abada tun ni sanjiba ye.

Jenɛse 8:18-22; 9:9-17.