Maana 20nan

Dina ye bɔnɛ lase a yɛrɛ ma

DINA nana bɔ mɔgɔ minnu ye, i ɲɛ bɛ olu la wa? A nana bɔ Kanan npogotiginin dɔw de ye. Yala o tun bɛ se ka diya a fa Yakuba ye wa? Ibrahima ni Isaka tun bɛ min miiri Kanan musow ko la, ni an ye an hakili to o la, o bɛna an dɛmɛ ka o ɲininkali jaabi sɔrɔ.

Yala Ibrahima tun b’a fɛ a denkɛ Isaka ka Kanan npogotiginin dɔ furu wa? Ayi. Yala Isaka ni Rebɛka tun b’a fɛ u denkɛ Yakuba ka Kanan npogotiginin dɔ furu wa? Ayi. I bɛ o kun dɔn wa?

Mɔgɔ minnu tun sigilen bɛ Kanan, olu tun bɛ boliw de bato. Mɔgɔ ɲumanw tun tɛ. Furucɛ, walima furumuso, walima teri tun tɛ se ka ɲini u cɛ la. O kosɔn, an bɛ se ka da a la ko Yakuba tun t’a fɛ a denmuso ka Kanan npogotigininw kɛ a teriw ye.

I ko mɔgɔ tun bɛ se ka sigi n’a ye cogo min na, Dina ye bɔnɛ lase a yɛrɛ ma. I ɲɛ bɛ nin kamalennin na ja la wa? A bɛ ka Dina lajɛ. O kamalennin tɔgɔ ye ko Sisɛm. Dina taara bɔ a terimusow ye tuma min na, Sisɛm ye Dina minɛ, ka a diyagoya a ka da a fɛ. O ye kojugu ye, bawo cɛ ni muso minnu furulen bɛ ɲɔgɔn ma, olu dɔrɔn de ka kan ka da ɲɔgɔn fɛ. Sisɛm ye o kojugu min kɛ Dina la, o nana ni kunko caman ye.

Dina balimakɛw ye o mɛn minkɛ, u diminna kosɛbɛ. A kɔrɔkɛ fila, Simeɔn ni Levi diminna fo u ye u ka npan ta, ka don dugu kɔnɔ, ka bala cɛw la, k’u kɛlɛ. Simeɔn ni Levi ni u balimakɛw ye Sisɛm ni cɛ tɔw bɛɛ faga. Yakuba diminna kosɛbɛ a denkɛw kɔrɔ, bawo u ye o kojuguba kɛ.

Mun nana ni o kow bɛɛ ye? O kow bɛɛ sɔrɔla bawo Dina y’a teriw kɛ mɔgɔw ye minnu tɛ Ala ka sariyaw sirataama. An t’a fɛ ka o mɔgɔ sugu kɛ an teri ye, tiɲɛ tɛ?

Jenɛse 34:​1-31.